O alumnado de 5º e 6º de Primaria asistiu a unha charla de sensibilización de AVANTE, Asociación de personas con discapacidade de Val do Dubra. Faláronnos do que é a discapacidade, das actividades e talleres que fan na asociación. No CEIPP de Sigüeiro cremos na inclusión social. Gracias Avante por compartir con nós as vosas experiencias!

O mércores 25 de maio recibimos a visita dos compañeiros/as do CRA de Oroso que o próximo curso se unirán ás nosas aulas. Primeiramente realizouse unha recepción dos 8 alumnos/as e as súas familias no salón de actos e quen mellor que antigos alumnos/as do CRA para contarlles a súa experiencia no noso cole.

A continuación, actuación sorpresa do alumnado de 6º de Primaria, que representaron a obra "O restaurante Farruco".

Despois fixemos unha visita polo centro para que os novos alumnos/as e as súas familias coñezan as nosas instalacións: aulas, biblioteca, comedor, patio, orientación, administración... E antes de saír ao recreo co alumnado de 2º de Primaria, unha saborosísima merenda no comedor. 

Por último, para rematar a xornada, o alumnado de 3º deleitounos cun canto e baile tradicional mentres que o de 4º tíñanos preparada outra pequena obra de teatro: "O lobo vello e as sete cabuxiñas espelidas".

Foi un gran día. Agardamos que o disfrutarades tanto coma nós e poder compartir moitas máis actividades o vindeiro curso!

Estes días o alumnado de 3º, 4º, 5º e 6º de Primaria estivo participando na actividade "Grand Prix" de educación financeira de Afundación, obra social Abanca, dentro do Programa da Consellería EDUEMPRENDE. Un dos obxectivos deste programa é desenvolver o espírito emprendedor dos nosos rapaces e rapazas. Dúas monitoras estiveron durante tres días no colexio levando a cabo diversas actividades e xogos para que o alumnado aprenda, dun xeito activo e en primeira persoa, as primeiras pautas de como adaptarse a un orzamento e á importancia do aforro na vida.

Sabedes que é o "sexting", como usar as RRSS (redes sociais) con seguridade ou os perigos de internet? O alumnado de 5º e 6º de Primaria xa o sabe grazas á charla do Plan Director para a mellora da Convivencia nos Centros Escolares e os seus entornos da Garda Civil que hoxe impartiron no noso centro.

Fíxonos reflexionar acerca do número de seguidores das RRSS que non coñecemos persoalmente e cos que estamos compartindo imaxes ou informacións que poden poñernos en perigo a nós mesmos e tamén ás nosas familias. Pareceunos unha charla moi interesante e productiva. 

O noso centro participa no proxecto "Eu sei da UE" do centro de información da Comisión Europea da Deputación da Coruña "Europe Direct A Coruña". Esta iniciativa enmárcase dentro da celebración do Día de Europa o vindeiro 9 de maio. Trátase dun proxecto audiovisual coa participación directa de oito nenos e nenas, e unha profesora. Que ben o pasamos con este fántastico equipo que nos acompañou durante toda a mañá. Unha experiencia xenial!!! 

Hoxe, xoves 2 de decembro, tivo lugar no salón de actos do noso centro unha charla que nos ofreceu a Garda Civil, para o alumnado de 5º e 6º, dentro do "Plan Director para a Convivencia e a mellora da seguridade nos centros educativos e os seus entornos". Neste caso, a temática xirou arredor da violencia de xénero. A educación é unha ferramenta fundamental para a eliminación da violencia contra as mulleres. Falouse de cuestións tan importantes como o respecto, a tolerancia, a confianza ... e comprendemos que mozos e mozas somos iguais e temos os mesmos dereitos.

 A  Asociación Compostelá de Esclerose Múltiple, para conmemorar o Día Mundial desta enfermidade, que se celebra o 30 de maio de cada ano, organizou a campaña Cores para a Esclerose. Unha das actividades estaba enfocada ao alumnado de Primaria que podía participar nun concurso de debuxo. Algún do noso alumnado tamén quixo sumarse a esta boa causa aportando o seu debuxo. Entre os participantes dúas alumnas nosas resultaron finalistas, o que significa que o seu debuxo formará parte dun calendario que promoverá a Asociación no vindeiro curso. As alumnas son Alicia Fernández Fuentes de 4º C e María Colinas Bello de 6º A, ás que a xefa de estudos fixo entrega do correspondentre diploma. Parabéns!

Hoxe acompañounos no colexio David Navarro ex xogador do Obradoiro. Presentounos o seu libro "O Soño de Liam" e firmou os exemplares que tiñamos. Aprendemos que os soños se os perseguimos pódense cumprir. Grazas David

Hoxe recibimos no colexio a familias e alumnado do CRA de Oroso, que se incorporarán ao centro no vindeiro curso. Foi unha xornada moi agarimosa. Primeiro tivo lugar unha recepción no salón de actos, alí alumnado noso de 4º de Primaria, que tamén viñeron no seu momento do CRA, puideron trasladarlle a súa experiencia no cambio de centro. Por outra banda alumnado de 6º de Primaria agasallounos cun par de representacións, estiveron xenial! Xa despois visitamos algunha aula, a biblioteca... e no comedor esperábanos unha merendiña. Nada máis e nada menos que pizza e unha copa de chocolate!!! Por último visitamos os patios, onde descubrimos que había un montón de nenos e nenas no recreo. E para rematar volta para as nosas casas cunha bolsiña que nos deron cun zume e magdalenas.    

O Consello para a Convivencia Escolar da Comunidade Autónoma de Galicia promove unha enquisa para a avaliación da convivencia nos centros escolares. Cada membro da comunidade educativa deberá cubrir o seu cuestionario para contribuir aos resultados.

A enquisa é anónima. Dende o centro repartimos claves de acceso que non identifican ás persoas que fan a enquisa.

O cuestionario leva cubrilo uns 15 minutos, e só se pode facer unha vez. Se se pecha sen rematalo, a clave de acceso non poderá volver usarse. A enquisa estará operativa desde o 12 de abril ao 29 de abril de 2021 (ambos dous días incluídos).

É probable que o enlace dea unha mensaxe de erro de seguridade. Nesa pantalla, haberá que "añadir excepción", "confirmar excepción", "aceptar certificado" ou outro botón similar que indique que aceptas continuar.

Enquisa familias: https://edu.xunta.es/convfamil

Enquisa alumnado de 5º a 6º de Primaria: https://edu.xunta.es/convobrig

Enquisa profesorado: https://edu.xunta.es/convdoce

Enquisa persoal administración e servizos https://edu.xunta.es/convpas