Esta semana estamos celebrando a "Semana da Ciencia" no noso centro. Desenvolvemos unha serie de sesións sobre a figura do científico destacando o papel da muller na ciencia, a importancia do traballo en equipo no eido da investigación, os materiais empregados habitualmente nun laboratorio e a execución de apaixoantes experimentos prácticos: fósiles vivos, a historia do planeta; a maxia da ciencia; o corpo humano: alimentación e plásticos...  

Ademais hoxe, xoves, tivemos a xornada de convivencia co alumnado do CRA de Oroso que se incorpora ao noso centro o vindeiro curso.

Aquí algunhas imaxes das prácticas levadas a cabo:

Álbum: Curso 2018 - 2019 -> Semana da Ciencia

Onte e hoxe os alumnos/as de 5º e 6º de Primaria recibimos a visita de Amador, un mestre xubilado con moita enerxía, pero sobre todo un "maker" dos pés á cabeza.

Con moi pouco, él é capaz de facer moito. E esta filosofía de reciclar o que xa non usamos e darlle unha nova vida, é a que transmitiu ao noso alumnado. Case todos os electrodomésticos que temos na casa teñen un pequeno motor que podemos reutilizar para facer unha chea de cousas. 

Nós fixemos unha tira de luces led de cores que acendían ao xirar e tamén convertemos un pequeno cepillo nun coche en movemento. Incrible, verdade? 

Pois as nosas cabezas xa se contaxiaron da imaxinación de Amador e xa estamos argallando novos trebellos. Gracias por visitarnos e ensinarnos tantas cousas!

Álbum: Curso 2018 - 2019 -> Taller maker con Amador

Esta semana estanse levando a cabo as II Xornadas de programación, robótica e impresión 3D; desenvolvendo así as liñas do Contrato Programa de "Mellora da competencia matemática e ciencia e tecnoloxía".

Onte, luns, tocoulle o turno aos de 3º e 5º de Primaria, que experimentaron coas posibilidades dos mBots.

Hoxe, martes, obradoiros de impresión 3D con 4º e 6º de Primaria.

E o xoves, máis sesións de programación de ozobots con 1º e 2º de Primaria.

Álbum: Curso 2018 - 2019 -> Robótica primaria

Seguimos coas xornadas de mellora da convivencia. Por niveis o alumnado de 3º, 4º, 5º e 6º visionou a película "Zootrópolis" para facer posteriormente unha reflexión sobre a mesma a través da dinámica "Embaixadores da terra", traballando diferentes aspectos como igualdade, roles e estereotipos, inclusión, emocións, respecto...

Hoxe deron comezo as xornadas para a mellora da convivencia e promoción da igualdade, desenvolvendo a liña 3 do Contrato Programa. A partires do conto "Caperuchiña de cores" e a posterior dinámica "Receita do bo trato" traballáronse diferentes valores co alumnado de Infantil, 1º e 2º. Promoveuse o respecto, os bos modais cos demais, a responsabilidade, a igualdade....

Hoxe, 8 de marzo, sumámonos ao berro conxunto que propuxo a Mancomunidade de Ordes ás comunidades educativas para conmemorar o Día Internacional da Muller.

Pero antes, os nenos e nenas de E. Infantil, 1º e 2º de Primaria asistiron no salón de actos do cole ao espectáculo "Maxia pola Igualdade" organizado polo Concello, no que tamén nos acompañou o alumnado e profesorado do CRA de Oroso. Tamén houbo representación de contos polo alumnado de 6ºB para o alumnado do CRA na biblioteca.

Despois, todos/as xuntos/as, saímos ao patio e mostramos mensaxes de rexeitamento á desigualdade e/ou a prol da igualdade entre homes e mulleres mentres soaba a canción "Non son fada" do álbum Admirando a Condición de Sés.

A ANPA promoveu, como cada ano, unha exposición arredor da figura da muller. Nesta ocasión as homenaxeadas son as distintas xeracións das familias do noso alumnado.

 Premede na imaxe para ver máis fotos. 

Tristeza, alegría, amizade, soidade,...... complicado resulta poñer en palabras o que sentimos en tantos momentos do día. E o noso alumnado sábeo ben, por iso, este curso máis ca nunca, a semana das cartas emocionantes foi todo un ¡Éxito!

Feliz, abraida, satisfeita, afortunada....síntese Nica pola gran participación. Incluso ela recibiu unha carta que a encheu de ledicia.

Accede ó albúm e emociónate con nós.

  “La paz es hija de la convivencia, la educación y el diálogo”: Rigoberta Menchú, premio Nobel de Paz.

Hoxe, 30 de xaneiro, é o aniversario da morte de Mahatma Gandhi, que morreu asasinado en 1948 na India. Foi un gran loitador que empregou todo tipo de estratexias, pero nunca a violencia. Detestaba as inxustizas e defendía a xente máis débil. 

No colexio quixemos celebrar este día cun pequeno acto, no que cada nivel nos mostrou o mellor dalgún persoeiro, que dalgunha maneira traballou en prol da PAZ. O alumnado de 3º A agasallounos cunha fermosa versión da canción "No dudaría", que nos invitou a reflexionar para non empregar nunca a violencia. Así mesmo algúns dos alumnos/as de 6º B, nos interpretaron o tema "Imagine" de John Lenon, en francés e inglés, sen dúbida unha das cancións que máis representa a unión de culturas. Noraboa a todos/as!!!

Máis fotos no seguinte álbum.

Esta semana tivo lugar outra charla da Garda Civil para o alumndo de 5º e 6º, dentro do Plan Director para a convivencia e mellora da seguridade nos centros educativos. A temática xirou en torno á seguridade nas novas tecnoloxías e nas redes sociais. Foi moi interesante e aprendemos e reflexionamos sobre moitos riscos cos que nos atopamos a diario cando navegamos por internet. 

O 20 de decembro, os nenos/as do noso cole disfrutaron das actuacións de teatro, contos e panxoliñas que tiñan preparadas os seus compañeiros de 4º, 5º e 6º.

Abriuse o telón coa representación teatral "Isto non é un conto" por parte do alumnado de 6º. Despois interpretarían a coñecida panxoliña "Vive le Vent" ou "Jingle Bells" nas dúas linguas estranxeiras que estudan este curso. 

A continuación, os compañeiros de 5ºB representaron "O misterio de Papá Noel" e relatáronnos o conto "Qué bonito é o Nadal!".

De seguido, un grupo de alumnas de 4º que acude os venres a Let's Sing A Song cantaron "We wish you a Merry Christmas"

O broche final puxérono os músicos do cole dirixidos pola profe Begoña con "Adestes Fideles".

Foi un gran día! Moi bo traballo rapazas e rapaces!