O Equipo de Dinamización da Lingua Galega (EDLG) e mais o departamento de plástica do IES organizaron un concurso entre o alumnado de 1º e 3º da ESO de deseños xeométricos con lema en galego.

A intención final era realizaren deseños para colocar en bolsas que se repartirían no IES.

Houbo deseños moi ben elaborados e con gran calidade, o que provocou que fose un o escollido para que decore as bolsas do IES, como 1º premio, pero outros dous van ser recoñecidos imprimíndose como marcadores que se van repartir no Día do libro.

O alumnado premiado é o seguinte:

• 1º premio: Gabriela Leis, 1º ESO A
• 2º premio: Noa Mesías, 1º ESO B
• 3º premio: Aroa Riveiro,  1º ESO A

Accésit:

• Noa Varela, 1º ESO B
• Antía Casavella, 1º ESO B

Os premios vanse entregar o vindeiro martes 25 de xaneiro, no primeiro recreo, na biblioteca.

O  IES do Milladoiro está a participar nun programa Erasmus+, programa europeo no que participan sete centros de ensino e dous centros culturais baixo o título Euro a de repente. Os socios deste programa son, ademais do noso centro, outros dous galegos (o IES Marco de Camballón de Vila de Cruces e mais o CEIP Labarta Pose de Baio) e catro doutros países europeos: Madeira (Portugal), Iparralde e Córcega (Francia) e Tortona (Italia). A coordinación lévase desde  o CFR da Coruña, delegación de Vimianzo.

Con este programa vaise coñecer o panorama actual da improvisación oral en Europa e mais difundir o estado das diferentes manifestacións do repentismo.

Nesta semana comezou a  primeira visita a Madeira, polo que dous docentes do IES do Milladoiro se desprazaron durante catro días ata a illa para avanzar in situ neste obxectivo. Realizáronse numerosas entrevistas e gravacións a persoas de moi diferentes idades para compoñer un documentario que visibilice cal é a situación actual do repentismo nesta illa portuguesa. Este é o primeiro material audiovisual que conforma o conxunto de vídeos que se expoñerán no final do proxecto para o alumnado.

Yomara Ferreiro arrancou de novo co programa Sinag, que botara a andar o curso pasado. Neste pasado mes de decembro gravou dous novos episodios, de temáticas diferentes e ambos moi interesantes.

O episodio 3 vaivos resultar entretido ao escoitar as súas reflexións a partir de citas de cine e literarias.

No episodio 4  vai a unha temática diferente e moi interesante. Desta vez centrouse en dar conta dunha enfermidade que xa está bastante estendida, pero que aínda é moi descoñecida: a fibromialxia.

Pechamos o trimestre coa entrega de premios  ás alumnas participantes no mes da ciencia en galego. Lucía Romar, Irene Vázquez e Alba Sueiro (foto de arriba) foron dobremente premiadas, por un lado pola participación nos vídeos para o "Medio minuto de ciencia en galego" (xunto con Antía Somoza que non puido acudir á entrega), e por outro porque entre as tres participaron no concurso de Igaciencia e recibiron un accésit polo seu poliedro. Tamén recibiron o seu galardón, de mans do director, Antía Casavella e Alicia Lariño (foto de abaixo) polo vídeo gañador no "Medio minuto de ciencia" na modalidade A (1º e 2º ESO).

E hai unhas semanas tamén se entregaron os diplomas que enviou a Consellería para o alumnado que participou o curso pasado no proxecto Radio na biblio. A entrega estivo amenizada pola actuación musical de Diego Jiménez Jiménez (4º ESO A) e de Alejando Buela Pampín (4º ESO B). A música que podedes escoitar co vídeo é da actuación.

En colaboración co Comité de Igualdade, adornamos a entrada do centro. Desde o EDLG  aproveitamos para facer reflexionar sobre o uso do galego nos agasallos e mais animar a buscar agasallos en galego.

Por un lado, quixemos provocar a reflexión sobre o uso do galego:

Por outro, demos unha mostra de uso do galego en determinados elementos, que poden servir de agasallo, ou non, pero queda aí o recoñecemento polo uso do galego en produtos comerciais:

 A Real Academia Galega e a Fundación Barrié abren, a través do Portal das Palabras, a fase de votación popular para escoller a Palabra do Ano 2021. Tras a fase de recollida de suxestións, as voces finalistas que optan a se converter na Palabra do Ano 2021: coada, gromo, resiliencia, tanxugueiras e vacinódromo.

O prazo de votación permanecerá aberto ata as 23:59 horas do sábado 25 de decembro de 2021 nesta ligazón:

http://portaldaspalabras.gal/palabradoano/

O pasado luns 13 de decembro, o alumnado de 1º ESO A tivo a oportunidade de recibir un dos dous obradoiros que se celebraron no noso centro por parte de María Lobo, da Asociación AGARESO, e organizados desde a Secretaría Xeral de Política Lingüística baixo o título de Dicionarios de ida e volta. O primeiro deles desfrutárao, o pasado 10 de novembro, o grupo de 1º ESO C. 

Se queredes máis información sobre a cuestión, só tendes que escoitar o podcast do programa que dirixe, desde o curso pasado, Diego Madarnás Iglesias ("Entrevistas con Diego"), pois aproveitou que estaba María Lobo no centro para facerlle unha entrevista ben interesante:

Gústache escribir? Xa te enteraras que estaba en marcha o concurso "Coa pel de galiña" pero non tiveches tempo cos exames? Pois agora ampliouse o prazo e tes uns días máis para presentarte!

Ah, ti non sabías nada? Pois aínda te informas a tempo, porque nesta semana aínda estás a tempo para presentar o teu relato. Ata o venres 17 ás 12,50h tes tempo para depositar o teu texto na "Caixa do terror" que está na biblioteca.

Que como vai? Atende:

O IES  de Ames (Bertamiráns) leva organizando desde hai catro anos un concurso de relatos de terror en galego ao que lle chamaron "Coa pel de galiña" e propúxonos que este curso o organizásemos conxuntamente. Daquela convidámosvos a escribirades os vosos relatos de terror para poñer a todo o xurado, de un e outro centro, cando os lean, coa pel de galiña.

Lede con calma neste enlace do blog do EDLG as bases, pero lembrade que son dous folios máximo, a ordenador (letra Arial ou Times, 12) e escritos en galego.

Durante o mes de novembro, o EDLG organizou o mes da ciencia en galego. Unha das actividades foi o concurso "Medio minuto de ciencia en galego". Convidouse a toda a comunidade educativa a que participase gravando un vídeo de medio minuto arredor dalgunha cuestión científica.

Estes foron os vídeos gañadores:

Alba e Lucía (3º ESO) fixeron unha explicación moi interesante sobre as cores do outorno:

Antía e Irene (3º ESO) presentaron a Isabel Zendal:

Antía e Alicia (1º ESO) mostraron o resultado do seu estudo de densidades: Parabéns ás seis gañadoras!

Este ano tamén volvemos ter en funcionamento o programa de voluntariado lingüístico seguindo o protocolo COVID. Esta iniciativa, que arrancou no curso 2018-2019 baixo o nome "Recreos coa lingua", pretende axudar ao alumnado de fóra de Galicia que se incorpora novo ao centro para que poida, de forma lúdica, irse achegando á nosa lingua e á nosa cultura.

Grazas ás persoas voluntarias dispostas a colaborar nos recreos!

Como sabedes, en novembro centrámonos na promoción da ciencia en lingua galega, lingua tan válida coma calquera para facer ciencia.

Este ano, desde IGACIENCIA lanzáronnos un reto. Propuxeron o seguinte:

Imos testar a capacidade do galego para dar nomes universais coma poliedros, por exemplo. Sabemos xa que podemos nomear cada poliedro coñecido e dicilo perfectamente en galego. O galego pode cos poliedros. Pero o que nunca fixemos é inventar novos poliedros,  e darlles nome galego. Un novo paso de nivel para o galego.

Pasámoslle a proposta a un grupo de alumnas do EDLG que cursan 3º ESO e aceptaron o reto. Fixeron un poliedro e puxéronlle o nome de “Estrela desaparecida”, así nolo conta Irene Vázquez, unha das artífices:

Nós  queremos  igualdade, composta  e interpretada  polos  Pitifláuticos (Lorena,  Noelia,  Ana, Nacho, Matías,  Aldán,  Alberto, Álex, Iria  e  Uxía, alumnas  e  alumnos de  2º  ESO D  e  2º  ESO E)  vén  de  gañar  o premio á  regueifa  máis  diversa  na  categoría  escolar.

Por  outra  banda, o  dúo Rimas  coma  balas, formado por  Inés  e  Adrián (2º  ESO F),  resultaron  agraciados  co premio á  reguifa máis  reivindicativa por  Exprésate  rimando.

Moitos  parabéns  aos  afortunados! Neste  enlace podedes  acceder  a  toda  a  información sobre  a  convocatoria  e, como  non, a  todas  as   demais regueifas  premiadas. 

Vida  infinita, creada  e  interpretada por  Mary  Iglesias  Bermúdez, resultou  gañadora  no XLII Certame  "Terra  Chá"  de  creación  infantil  e  xuvenil  organizado pola  asociación  Xermolos  de  Guitiriz. Os premios  entregaranse  na XLII edición  do  Festival  de  Pardiñas, que se  celebrará  o 28  de  agosto ás 19h no  Campo  da Feira  de  Guitiriz. Parabéns!

Hoxe, 15  de maio, en  Outeiro  de  Rei, lugar onde  está  a  Casa-Museo  Manuel  María, déronse  os premios  de  videopoemas da  IV Edición  do  Concurso de  videopoemas  sobre  composicións poéticas  de  Rosalía  e  Manuel  María. Eloi  Zabala  González, alumno  de  4º ESO A, conseguiu  un  dos premios  outorgados  cun vídeo realizado  a partir  do poema "Cando non  haxa"  de  Manuel  María.

Hoxe, 5 de maio, é o Día da Lingua portuguesa, segundo instaurou no ano 2009 a CPLP (Comunidade de Países de Lingua Portuguesa). O galego, como lingua irmá, permite comunicarnos con falantes da CPLP, con todo o mundo lusófono. Pero, ademais, hai alumnado que estuda portugués no instituto e que fixo un par de programas aproveitando o que aprendeu nas aulas.

O grupo de 3º ESO C gravou un programa específico sobre o Día da Lingua portuguesa, e o grupo de 4º ESO fixo, para o 25 de abril, día da Revolución dos Cravos, un programa especial. Este contou coa colaboración de alumnado que non estuda portugués pero que se implicou aprendendo a canción da revolución, Grándola, vila morena. Co agradecemento a Eloi Zabala e a María Iglesias, deixámosvos os podcast para que escoitedes e mais tamén a gravación que se fixo da actuación en directo destes dous artistas, acompañados polo profesor de música Manolo Maseda, o pasado luns 26 de abril.

O proxecto Enreguéifate foi adiante tamén este curso. Con máscaras, con distancia e con grupos reducidos, o alumnado de 2º ESO aprendeu a regueifar da man de Lupe Blanco, mais tamén  aprendeu moitas cousas sobre improvisación oral. Nos seguintes vídeos podedes ver a potencialidade dalgún alumno do IES, e mais unha "lección" en verso sobre a improvisación oral no mundo.

 O número Pi é o protagonista de dous contos realizados no marco das actividades organizadas para o 14 de marzo (Día de Pi). Xa vistes que se fixeron bastantes actividades para esta conmemoración, demostrando ademais que se pode usar o galego para tratar de cuestións matemáticas, neste caso, do número Pi.

Paula Mosquera e Elena Núñez conxugaron literatura e matemáticas con cadanseu conto: Pi, o doutor inesperado é o título de Paula, Crimes detrás de Pi o de Elena. Non deixedes de escoitalos!

O pasado 14 de marzo celebrouse o Día do número Pi e no noso IES a rapazada de diferentes niveis fixo bastantes actividades arredor do famoso 3,14...

Mary Iglesias Bermúdez, alumna de 2º ESO A, compuxo unha peza musical titulada Vida infinita, que ademais interpretou cantándoa acompañada do ukelele. Desde o Equipo de Dinamización da Lingua Galega gravouse o vídeoclip coa canción, nunha actividade na que participaron os departamentos de Matemáticas e de  Música e na que colaborou todo o alumnado de 2º ESO A.

Arranca un novo programa dirixido por Yomara Ferreiro. Chámase Sinag, que quere dicir "raio de luz", un nome aberto para un programa que non está enfocado a un tema concreto.

O primeiro podcast recollía unha reflexión a propósito da situación que levamos vivindo este ano e o segundo centrouse nos conceptos que se manexan para atender a diversidade sexual.

Neste vídeo recóllense as imaxes do Photocall feito o pasado mércores para conmemorar o Día de Rosalía. A actividade, organizada polo EDLG en colaboración co Comité de Igualdade, titulouse "Rosalía tamén tivo teito de cristal" e estivo centrada no papel da autora como defensora dos dereitos da muller.

Pola tarde, Aroha Brandón, Ana Caamaño, Uxía Reyes e Alba Vidal foron as encargadas de ler parte do manifesto que escribiu Anne Figueirido para a AELG e que se leu nun acto sinxelo diante da casa de Barbazán en Bertamiráns, onde Joseba Muruzabal pintou "as Rosalías"

 A primeira actividade que deseñou o Equipo de Dinamización da Lingua Galega para conmemorar o Día de Rosalía, que se celebra o 24 de febreiro, deu como resultado este vídeo, titulado "Rosalía internacional". Aproveitando a riqueza que supón a multiculturalidade do noso centro, vinte alumnas e alumnos de nacionalidades diferentes, leron un dos poemas máis coñecidos da autora. A rapazada que se está a integrar no Milladoiro do século XXI ponlle voz á internacional poeta galega que lle cantou á emigración.

"No día a dia reproducimos estereotipos machistas sen nos decatar porque vivimos nunha sociedade patriarcal; as familias, os medios de comunicación e tamén o sistema educativo contribúen a perpetualos. A incoherencia entre o que pensamos e o que facemos (curriculum oculto) delata o peso da socialización do que non somos conscientes, unha influencia tan sutil que resulta moi eficaz. Polo tanto hai que estar alerta, e para desvelar a desigualdade teremos que por os lentes violeta". Con estas palabras de Chis Oliveira e Amada Traba arrancan Paula García e Carlota Vicente o terceiro podcast do seu programa "Igualdade e Saúde", centrado na coeducación.

A entrevista fixéronlla a Carme Moure, profesora no IES Xelmírez I de Santiago, das materias de Igualdade de xénero (2º ESO) e Coeducación para o século XXI (1º BAC).

Xa temos a segunda entrega do programa Igualdade e Saúde.

Dirixido por Carlota Vicente e Paula García. Nesta ocasión trataron o tema das mulleres na física. A entrevista fixéronlla a Encina Calvo, profesora no grao de Enxeñaría química da USC.

Estade atentas e atentos que xa vai saír en breve o podcast seguinte deste programa.

Desde o Equipo de Dinamización da Lingua Galega do IES do Milladoiro quixemos pechar o ano dedicado a Ricardo Carvalho Calero coas seguintes accións:

• Actuación de Serafín Marcos para o alumando de 4º ESO.
• Programa de radio coa entrevista a dúas ex-alumnas do autor, unha delas a profesora de inglés do noso centro: Rosa López Boullón.
• Proxecto "Aos quatro ventos"- Leitura colaborativa-expansiva da obra do autor.

Imos por partes:

 Serafín Marcos achegouse ao centro o pasado 18 de decembro. No blog do ENDLG hai unha breve crónica sobre a actividade e mais a dedicatoria que nos deixou. Tamén lle concedeu unha entrevista a Diego Madarnás, que se pode escoitar na sección de podcast da radio MillaFalaDoiro.

 Sara, Alba e Lucía fixeron o último programa de radio do trimestre dedicado a Carvalho Calero e decidiron entrevistar a dúas profesoras que foran alumnas do autor homenaxeado. Unha delas, Rosa López Boullón, do departamento de inglés do noso centro; a outra, a profesora de Lingua galega e literatura, Merche Espiño, docente nos últimos anos do IES Eduardo Pondal de Santiago. Entre as dúas achegan unha panorámica, desde a propias experiencia persoal, da calidade humana e profesional do profesor Calero, tanto no instituto Rosalía de Castro, coma na universidade compostelá.

O proxecto "Aos quatro ventos" naceu no noso centro coma unha proposta de acción cooperativa-expansiva entre os centros de Galicia que se quixesen sumar. Lanzouse a principios de decembro e, a pesar das datas, sumáronse 30 centros desde os que se fixeron lecturas de fragmentos de obras do autor, tanto literarias como non literarias. O repositorio está colocado desde este 22 de decembro na canle de Youtube do EDLG e a partir del, desde o IES Perdouro de Burela, coa colaboración do profesor Bernardo Penabade, realizaron un espectacular programa de radio.

Desde aquí podedes acceder a todos os centros que leron: poesía, teatro, novela (con varios capítulos d'A xente da Barreira, algunha mostra de Scórpio ou todo o relato As pitas baixo a chuvia, moitos fragmentos da súa obra en prosa  ensaística, xornalística...

Entrevistas con Diego é o programa de entrevistas que Diego Madarnás Iglesias (2º ESO) vén de botar a andar. A primeira entrevista fíxolla a unha compañeira, Lucía Sobrado, alumna de 4º ESO, que vai comezar  co seu programa Diario  dunha  estudante, dedicado aos libros e outras cuestións relacionadas e que vai soar en breve. 

Este curso vén de botar a andar o proxecto de radio que se desenvolve desde o Equipo de Dinamización da Lingua Galega (EDLG) e da Biblioteca do IES do Milladoiro, proxecto que comezou o curso pasado, pero que non se puido concretar en ningún programa, porque a pandemia non deixou gravar. Mais agora, coas medidas de seguridade pertinentes, arranca o primeiro dos varios programas deseñados pola rapazada do EDLG: Remendando música. Pensouse este programa para dar a coñecer a música que se fai en galego e, en especial, a música feita por mulleres.

Este primeiro programa empeza forte, cunha entrevista a Guadi Galego coa primicia do seu novo disco, Costuras. Sara Rey, Alba Sueiro e Lucía Romar, alumnas de 2º ESO e xa formantes do Equipo de Dinamización desde o curso pasado, foron as encargadas de presentar e entrevistar á artista, ao tempo que pincharon cancións do seu novo disco, que vén de presentarse este pasado venres 20, pero que Guadi lles adiantou en exclusiva.

Escoita o programa  aquí!

O doutor en Ciencias Biolóxicas e especialista en neurofisioloxía, Xurxo Mariño,  estivo este venres no IES con motivo do Día da Ciencia en galego, organizado polo EDLG. Debido ás restricións impostas pola COVID, só un grupo de 1º de  bacharelato puido escoitar en persoa a súa charla sobre móbiles, radiación electromagnética e cerebro.

Presentárono  Paula García e Yomara Ferreiro, alumnas desa clase e membros do Equipo de dinamización. A exposición de Xurxo ocupou dúas sesións de clase e o alumnado tivo oportunidade de facerlle preguntas.

Este ano a celebración do Samaín no centro foi algo estraña, pero quixemos facer un vídeo para celebrar este Samaín confinado.E sobre todo, quixemos volver incidir nas semellanzas desta galega coa festa irlandesa, reivindicando as orixes celtas da nosa cultura.

A rapazada do equipo, axudada por algunha voluntaria máis, elaboraron un vídeo que ten versión galega e versión inglesa. Sara, Lucía e Alba puxeron as voces do relato sobre as orixes e significado do Samaín en galego e Paula e Carlato locutaron a versión en inglés.

Deixámosvos os dous vídeos:

Grazas a todas as persoas participantes que axudaron a que, un ano máis, fagamos a nosa pequena homenaxe a esta tradición milenaria que nos liga coas nosas orixes celtas.

Un número importante de alumnado e profesorado participou na homenaxe que desde o Equipo de normalización e dinamización da lingua galega quixemos renderlle a Rosalía.

Esta actividade, que desenvolvemos en colaboración coa biblioteca, realizouse desde a volta do entroido e ata o 4 de marzo. Durante os recreos houbo lecturas por parte de profesorado e alumnado, ademais un grupo de alumnas e alumnos inscribíronse no concurso de recitado. O xurado estivo composto por dúas profesoras: unha representante do EDLG (Maruxa Fernández) e unha da biblioteca (Margarita Rodríguez), e mais cinco membros do alumnado que son axudantes de biblioteca (Manuel Caamaño, Claudia Bretaña, Miriam Villaverde, Clara García e Aida Otero)

Os premios foron para Diego Madarnás (1º premio), María Pampín (2º premio) e Adrián Dubra (3º premio).

Un número importante de alumnado e profesorado participou na homenaxe que desde o Equipo de normalización e dinamización da lingua galega quixemos renderlle a Rosalía.

Esta actividade, que desenvolvemos en colaboración coa biblioteca, realizouse desde a volta do entroido e ata o 4 de marzo. Durante os recreos houbo lecturas por parte de profesorado e alumnado, ademais un grupo de alumnas e alumnos inscribíronse no concurso de recitado. O xurado estivo composto por dúas profesoras, unha representante do EDLG (Maruxa Fernández) e unha  representante da biblioteca (Margarita Rodríguez), e mais cinco membros do alumnado que son axudantes de biblioteca (Manuel Caamaño, Claudia Bretaña, Miriam Villaverde, Clara García e Aida Otero)

Os premios foron para Diego Madarnás (1º premio), María Pampín (2º premio) e Adrián Dubra (3º premio).