Clubes de lectura

O alumnado do Club de lectura "Piratas do Ulla" deste curso académico finaliza as súas xuntanzas. En palabras do coordinador deste club de lectura, o profesor Víctor González: "Esas rapazas e rapaces que posan aí diante vosa son xente perigosa, ollo con eles; semellan xente inocente pero non vos fiedes. Coñecen as artimañas dos delincuentes, que moitos deles tiveron tratos con Sherlock Holmes nada menos, e viaxaron a illa de Bowen, con César Mallorquí, o que significa que a imaxinación a teñen fértil, e unha imaxinación así, fecunda e luminosa, con tanta liberdade, semella poderosa, e pode mudar a orde do mundo, vencer as leis da gravidade e cousas así, a "imaxinación ao poder", que diría o outro. Si, que dúbida cabe, convén ter coidado cos retratados no IES Plurilíngüe de Valga, que poden reverter a orde das cousas, son xente libre, son lectores, do Club de lectura "Piratas do Ulla" e ata tiveron tratos cun tal Roald Dahl, sóavos?, e non se andaron con delicadezas no trato, non o adozaron, como queren facer algúns... mellor deixalo correr e non entrar en polémicas; e con todo o "perigosos" que poidan parecer, a relación con eles e con elas é excelente. Saúde e grazas"

O Club de lectura de adultos da nosa Biblioteca tivo, na tarde do mércores 19 de abril, unha nova sesión que contou coa presenza do escritor Diego Giráldez. A xuntanza xirou arredor do libro deste autor porriñes, "O meu sangue". En palabras do coordinador deste Club de lectura, o profesor Víctor González: "O mércores 19 de abril houbo xuntanza do Club de lectura Veigas de Campaña, acompañounos vrtualmente Diego Xiraldez, un dos mellores escritores en lingua galega que temos hoxe en día, O veredes aí na foto, na esquina dereita. Presentou a súa obra "O meu sangue", unha novela romántica, aínda que non o pareza, quizais sería mellor dicir que é unha obra inclasificable, inclasificable porque se ben é unha novela de amor, tamén é de misterio, e ata de antropoloxía polas reflexións que se atopan nela sobre a aldea galega e sobre... en fin, inclasificable. É unha ledicia, e a charla con el outra. Desfrutamos moito, da letura do libro, no seu momento, e a tarde de mércores da boa compaña das mulleres do club de lectura e de Diego Giráldez. Na Biblioteca, foi. Outra ledicia. Saúde"

Na tarde do xoves 9 de marzo, tivo lugar unha nova sesión do Club de lectura de adultos do noso centro, para conversar sobre o libro "Azucre", da escritora e xornalista galega, Bibiana Candía. En palabras do coordinador do Club de lectura, o profesor Víctor González: "Estamos ante unha nova sesión do Club de Lectura "Veigas de Campaña". A charla xirou en torno a "Azucre", de Bibiana Candía, unha obra breve, non moi extensa en número de páxinas, pero inmensa en calidade. Moi ben escrita, unha obra dura de contidos pero escrita cunha delicadeza que endulza, e nunca mellor dito, a lectura, non en vano a prosa da narración foi vertida por mans poéticas, as de Bibiana Candía. Parabéns!
Galegos escravos na Cuba de mediados do século XIX, colonia española entón, ... século XIX? Unha lectura atenta demostrou, e así quedou de manifesto na charla que tivemos, que os galegos escravos entón son os inmigrantes de hoxe, tratados en réxime de escravitude ou semiescravitude, da igual, en calquera caso, en condicións infames nos mares de plástico de Almeria e noutros lares. Non hai dereito. Non hai progreso, nin progreso nin retroceso, mais ben voltas e revoltas sobre o mesmo, un eterno retorno tráxico do que xa nos falou o filósofo Nietzsche. Así non hai remedio; se cremos co filósofo que todo volve, que a historia non é lineal, senón circular, por que non a enchemos de vida e solidariedade para que sexa a vida e a solidariedade a que retorne e non mortos, morto e mais mortos?, .... ben, si, hai unha diferencia, os galegos viaxaron a Cuba en condicións infames, certo, pero foron en barco, os inmigrantes veñen en pateras e caiucos... se chegan. Ao final, retroceso, logo.
En fin, sobre a mesa veredes libros, papeis, doces, amor pola lectura, afán por saber e alegría polo encontro; pouco máis se pode pedir. Saúde para tod@s".