Actividades

Alumnado de 3º ESO de Educación Dixital e Cultura Clásica realizou un proxecto de podcast

Mar, 25/06/2024 - 16:30 — IES de Valga

O alumnado de Educación Dixital e Cultura Clásica de 3º ESO elaborou un podcast destinado a ser distribuído nas RRSS e na páxina Web do IES de Valga.
O alumnado de Cultura Clásica foi quen decidiu o mito que ían tratar no podcast, Eco e Narciso. Así mesmo elaborou o guión e conformou maioritariamente o grupo de locución, participando tamén na fase técnica da creación do podcast escollendo parte da música e editando dixitalmente distintas partes da locución. Pola súa banda, o alumnado de Educación Dixital, non só participou na elaboración técnica do podcast, na edición do audio e da música ambiente, senón que tamén contribuíu na locución da historia do famoso mito.
Trátase dunha colaboración, como explican os profesores Diego Botana e Raúl Gómez, que pretenden levar a cabo, se é posible, o próximo curso 2024-25, ampliándoa a todo o periodo lectivo anual, desenvolvendo máis mitos e conectando desta maneira o mundo clásico co mundo tecnolóxico máis actual. “Poidera ser que este proxecto acabe nun ABP, é dicir, nunha Aprendizaxe integral baseada nun proxecto no que “a colaboración e o desenvolvemento activo do alumnado sexa o motor da aprendixaxe”, coinciden os dous profesores.
O podcast, resultado desta integración de dúas materias aparentemente incompatibles e tan diferentes, poderá ser escoitado unha vez que estea a disposición do público xeral na propia Web do IES e no Instagram e no Facebook do IES de Valga.

1 adxunto

Alumnado de Latín do Bacharelato asistiu á XXIII edición do Festival de Teatro Grecolatino en Lugo

Mér, 28/02/2024 - 23:35 — IES de Valga

Alumnado de Latín de 1º e 2º Bacharelato asistiu, o mércores 28 de febreiro, á XXIII edición do Festival de Teatro Grecolatino que, organizada pola Sección Galega da Sociedade Española de Estudos Clásicos, tivo lugar no Auditorio Municipal Gustavo Freire de Lugo. Nestas xornadas de teatro clásico puideron contemplar pola mañá a obra "Medea" de Eurípides e, en sesión de tarde, a obra "Anfitrión" de Plauto, ambas representadas pola Compañía de Teatro Noite Bohemia de A Coruña. Foron acompañados polos profesores Raúl Gómez e Diego Botana. A actividade foi organizada polo departamento de Cultura Clásica.

Alumnado de 3º (Cultura Clásica) e 4º ESO (Latín) xunto co de 1º Bach. Humanidades (Latín I) asistiu á representación da obra teatral “Crónicas clásicas”

Ven, 19/05/2023 - 17:40 — IES de Valga

Nas últimas horas lectivas da mañá do venres 19 de maio e na Biblioteca, o alumnado de Cultura Clásica de 3º ESO xunto co de Latín de 4º ESO e de Latín e Grego de 1º Bacharelato asistiu á representación da divertida obra teatral "Crónicas clásicas", a cargo dos actores Lois Blanco e Pablo Carrera da compañía Vicus Teatro. Nesta montaxe repasaron a historia do teatro dende a Antigüidade clásica, a partir dos textos desa época. O espectáculo reinterpreta a esencia das comedias clásicas e abre a porta a coñecer e situar aquela linguaxe teatral que se daba na Atenas e Roma da Antigüidade. A través da comedia, o alumnado achegouse aos mitos populares antigos, ás festas na honra dos deuses, ... A actividade foi organizada polo departamento de Cultura Clásica en colaboración co Equipo da Biblioteca.

Alumnado de Cultura Clásica e Latín asistiu á XXII edición do Festival de Teatro Grecolatino en Ourense

Mér, 01/03/2023 - 20:51 — IES de Valga

Alumnado de Cultura Clásica de 3º ESO e de Latín de 4º ESO e 1º Bacharelato asistiu, o mércores 1 de marzo, á XXII edición do Festival de Teatro Grecolatino que, organizada pola Sección Galega da Sociedade Española de Estudos Clásicos, tivo lugar no Auditorio Municipal de Ourense. Nestas xornadas de teatro clásico puideron contemplar pola mañá a obra "Agamenón" de Esquilo e, en sesión de tarde, a obra "El Persa" de Plauto, ambas representadas pola Compañía de Teatro El Ruiseñor de Culleredo. Foron acompañados polo profesorado Raúl Gómez, Víctor González, Nieves Gómez e Nuria Casal. A actividade foi organizada polo departamento de Cultura Clásica.

Iria, Herea e Alba de 1º Bacharelato Humanidades na final estatal do Concurso Odisea 2023

Lun, 13/02/2023 - 20:40 — IES de Valga

O mércores 8 de febreiro, as alumnas de 1º Bacharelato: Alba Blanco, Iria Collazo e Herea Eitor participaron na fase final estatal do Concurso de Cultura Clásica ODISEA 2023. Tras acadar o primeiro posto na fase autonómica galega, o equipo "ΝΈΦΟΣ" volveu acertar un número alto das respostas e conseguiu un máis que meritorio 11º posto nesta fase final. Noraboa de novo a Herea, Iria e Alba e ao seu profesor Raúl!!!.