Proxecto VEDRA MEDRA

Se por algo é coñecido este concello lucense é polo seu pasado mineiro. Xunto ás de Viveiro, as da Pontenova foron na 1.ª metade do século XX unhas das minas de ferro máis grandes de Galicia. Da súa explotación, entre os anos 1901 e 1965, quedan numerosos restos patrimoniais que se converteron en verdadeiros sinais de identidade da Pontenova: os cinco fornos de fundición, a estación de ferrocarril ou a senda verde que discorre polo trazado da liña ferroviaria que unía a vila co porto de Ribadeo.

Ata o nordés de Lugo, acudiu Vedra medra co alumnado de 3.º da ESO. Alí tivemos ocasión de acceder á mina Consuelo, unha galería subterránea de grande interese espeleolóxico, de percorrer a ruta dos fornos e de baixar en tirolesa. Esta, de 330 m. de lonxitude e que hai pouco que se puxo en funcionamento, recrea o antigo teleférico aéreo, construído en 1905, que servía para trasladar o mineral ata o forno do Boulloso.

Aprendemos o que era o “leite de lúa”, apreciamos as cores dos restos de mineral dentro da mina, imaxinamos como sería a vida e o traballo dos mineiros, reparamos nas infraestruturas que trouxo consigo esta actividade industrial para unha comarca rural coma esta... abrimos camiños para o coñecemento dun patrimonio que non coñeciamos ata agora.

→Album de fotos e video

A cativada do primeiro ciclo de educación infantil asistiu o pasado 20 de marzo a dúas sesións de contacontos no centro educativo.

Trátase dnha actividade máis dentro do proxecto "Vexo, vexo Xacobeo" que este curso estamos a desenvolver e que pasamos a resumir en imaxes.

Ver fotografías do Contacontos

Xulia Marqués

Coordinadora do EDLG e de Vedra medra

Para festexar o Día de Rosalía e a Festa local de exaltación da camelia, o alumnado de 1.º ESO participou nas seguintes actividades:

    1. Lectura do manifesto Día de Rosalía 2023 “Cumpriuse a xustiza…” (AELG). Interveñen 7 alumnos de 1º ESO-B: Mateo, David, Xoel, Artur, Daniel, Pablo, Alex.

    2. Recitado de poemas de Rosalía de Castro (as rapazas de 1.º A e 1.º B): “Nasín cando as prantas nasen” (Africa, Naiara, Nuria, Paula, María); “Campanas de Bastavales” (Lucía e María, Carlota e Malak; “Adiós ríos, adiós fontes” (Mara, Ariadna, Melisa, Xiana, Xulia); “Airiños, airiños, aires” (Martina). 

    3. Recitado de poemas de Rosalía de Castro (os rapaces de 1.º A e 1.º B): “Castellanos de Castilla” (Adrián, Gael, Hugo, Beltrán, Iván); “Unha vez tiven un cravo…” (Miguel, Adam, Álvaro, Iker, Borja); “Que pasa ó redor de min” (Sergio); “Ladraban contra min que camiñaba” (Paulo, Iker, Mateo, Lorenzo; Brais, Ángel, Marcos); “Mais ve qu’o meu corazón…” (Juan, Joel).

Xulia Marqués

Coordinadora do EDLG e Vedra medra

O venres 27 de xaneiro estivemos en Santiago no Centro Galego de Arte Contemporánea convidados polo Departamento de Educación Plástica co alumnado de 3.º e de 4.º da ESO da dita materia. Comezamos o percorrido pola exposición “Camiños III”. 

Segundo puidemos ler na presentación, ofrecía ao visitante “o camiñar como pegada cultural que condiciona a mirada e xera paisaxe e consecución de sensibilidade”.

E vimos que “Camiños III” contiña diversas accións performativas rexistradas en vídeo, cadernos de campo e mapas. Nestas, os artistas axudaban a reflexionar sobre o camiñar da contemplación. 

Un pracer para os que este curso decidimos seguir Camiñando con Vedra medra. Aínda que como ben se sabe, os galegos non camiñamos, andamos polos camiños…

Xulia Marqués

Coordinadora do EDLG e de Vedra medra

Outro ano máis (e xa van 8!!), festexamos o DÍA INTERNACIONAL DO PATRIMONIO MUNDIAL no CPI de Vedra.

Cómpre recordar que neste día se conmemora o 50.º aniversario da Convención do patrimonio mundial, cultural e natural asinada en París un 16 de novembro de 1972.

Grazas vedreses por estar á nosa beira nesta andaina tan emocionante e chea de aprendizaxes patrimoniais.

Xulia Marqués

Coordinadora do EDLG e de Vedra medra