A MeGaBiblio acolleu este pasado mércores 23 de outubro o acto de entrega de diplomas aos estudantes que o curso pasado participaron no programa de Voluntariado nas Bibliotecas Escolares, promovido pola Dirección Xeral de Ordenación e Innovación Educativa da Consellería de Cultura e Educación e a Dirección Xeral de Xuventude da Consellería de Política Social.

Os diplomas foron entregados por Sandra Ferreiro, escritora e ex-alumna, que fixo de mestra de cerimonias no acto tras presentarnos o seu libro "Castelos de cristal".

Mañá no 2º recreo, na MeGaBlio, estaremos con Sandra Ferreiro, ex-alumna do MGB, que nos vai presentar o seu libro "Castelos de cristal". Será esta xove escritora tamén a que faga entrega dos diplomas acreditativos aos axudantes da Biblioteca do ano anterior e a que presente aos novos axudantes deste ano.

Pásate por alí!

Recorda, no 2º recreo (12:25-12:45 h)

Noutrora erixíanse brillantes castelos de cristal máis aló do ceo. Agochaban todo tipo de historias e segredos:

os contos que a noite recitaba, as lembranzas dalgunha serea, o po das estrelas fugaces... mesmo o cantar das ondas.

Mais os castelos de cristal estaban destinados a romper e a caer.

Deles xa só quedan fragmentos esparexidos polo mundo e polo tempo, á espera dalgún camiñante que se atreva a internarse no caos

e recolla os restos desas historias perdidas.

* Sandra Ferreiro constrúe, en Castelos de cristal, uns relatos que invitan á lectura pausada e reflexiva a través dunha prosa poética chea de profundidade e sosego.

Non pero case, porque o estradense e exalumno do MGB Adrián Ferreiro traballa no proxecto da plataforma orbital lunar Gateway, unha estación espacial que orbitará a Lúa e que constará de varios módulos, un da NASA e outro da Axencia Espacial Europea.

Podes ler toda a información neste artigo de La Voz de Galicia publicado onte.

O pasado venres o alumnado do ámbito Científico-Tecnolóxico de 4º da ESO realizou unha actividade educativa fóra do centro para desenvolver un reto da vida cotiá do mellor xeito posible:facer unha compra saudable para un almozo-xantar-cea (e argumentalo) cun orzamento axustado (12 euros).

A actividade levouse a cabo en colaboración co supermercado Froiz da Estrada, ubicado nas inmediacións do centro, e aínda que a competencia foi dura, pois o alumnado foi quen de argumentar con moita propiedade os menús escollidos, finalmente Mateo Sánchez resultou o gañador por unha boa combinación de produtos sen superar o orzamento máximo permitido.

Regresa a MGB LEAGUE, o torneo de fútbol sala que xa é tradición no noso instituto e no que poden participar alumnos de 4ºESO, 1ºBAC e 2ºBAC. 

O Prazo de inscrición remata o venres 18 de outubro e o comezo do torneo será a vindeira semana.

Publicaremos horarios, resultados, fotos e outro tipo de información…

(correo de contacto carla.campos@iesgarciabarros.org)

A MeGaBiblio inicia este curso escolar cunha nova iniciativa: a publicación dun boletín mensual coa recomendación dunha lectura elixida por un Departamento Didáctico, iniciativa esta que é continuación daquelas "Receitas de lectura" que iniciaramos o curso pasado.

Neste mes de outubro, o Departamento e Lingua Castelá e Literatura propónnos "Saboreando el cielo", de Ibtisam Barakat, unha obra que nos transporta á máis “rabiosa actualidade”, dito isto con todo o sentido da palabra, que nos permite coñecer de primeira man a realidade da vida cotiá nos territorios palestinos ocupados polo exército israelí.

Picando nesta ligazón poderas ler un breve resumo, as razóns polas que se recomenda e a quen vai dirixido.

Seguro que non sabías da súa existencia, pero na MeGaBiblio temos xoias bibliográficas e queremos compartilas. Son libros distintos, especiais, que ben merecen a túa atención.

Témolos con ilustracións, con solapas, con recortables, pequenos ou extragrandes. Abranguen todo tipo de temas: Ciencia, Literatura, Arte, Historia, Deseño. Hai Atlas (xeográficos e literarios), Cómics, Liñas de tempo, Manuais, Clásicos eternos con un "toque" (Frankestein), Ensaios, Mundos Máxicos (o universo de Tolkien), Libros Museo (Planetarium), Bestiarios, Rock and Roll, e moito máis.

Ven coñecelos!

O próximo martes 1 de outubro comeza o extraordinario concurso "PROBLEMÁTTICOS" no que poderá participar todo o alumnado de 1º e 2º da ESO.

PROBLEMATTICOS é un concurso mensual organizado polo departamento de Matemáticas. Ao longo do curso os alumnos poderán obter puntos e no mes de xuño aqueles que acadasen maior puntuación obterán un fantástico premio.

As distintas probas publicaránse na páxina web do concurso, á que podedes acceder tamén dende a páxina do centro (apartado PROBLEMATTICOS, menú lateral dereito). Para acceder tedes que facer clic sobre a icona (tedes que estar rexistrados na conta do instituto).

Animádevos!

O pasado día 20 de setembro o alumnado de 1º Bach acudiu a una Xornada técnica sobre Orientación Laboral e Profesional levada a cabo no recinto Feiral do moble.

O Servizo público de Emprego e o de Orientación Educativa complementáronse para dar información a todo o alumnado asistente sobre formación, saídas profesionais e laborais.