Blogue de admin

Desde o día 1 e ata o 20 de marzo permanecerá aberto o prazo de solicitude de admisión no IES de Soutomaior para o vindeiro curso 2020-2021 sempre que haxa prazas dispoñibles nos diferentes cursos (información da Consellería).

Pódese consultar as prazas vacantes por curso e itinerario (Bacharelato) accedendo a este documento (actualización 28-02-2020).

Así mesmo, o vindeiro martes 3 de marzo abriremos as portas do instituto para que todas as familias interesadas poidades coñecer o noso proxecto, a oferta educativa para o Curso 2020-2021 e as instalacións do centro.

A actividade comezará ás 16:45 (1ª quenda) e ás 17:30 (2ª quenda) cunha acollida no recibidor da entrada e seguirá cunha visita guiada polo centro. Rematará na Aula de Usos Múltiples cunha breve reunión informativa na que se responderán todas as dúbidas e consultas que queirades realizar.

O alumnado de 4º ESO achegouse esta mañá as instalacións do Centro de Formación e de Investigación Agroforestal de Lourizán (Pontevedra) para coñecer as diferentes saídas profesionais vinculadas ao ámbito rural. Así, os rapaces e rapazas do IES visitaron o arboreto e os viveiros para identificar diferentes especies de plantas e árbores para poder, xa despois na aula, replicar estes coñecementos e realizar uns obradoiros prácticos que permitan integrar estes coñecementos no noso centro. Da man do profesorado e do persoal especialista de Lourizán, o alumnado achegouse dun xeito moi didáctico a un lugar máxico e cheo de historia no que actualmente se forman moitas persoas nun amplo abano de especialidades cunha gran proxección profesional.

Esta saída enmárcase no programa educativo que impulsan a Concellería de Educación e Medio Ambiente de Soutomaior en colaboración co Departamento de Bioloxía e a dirección do IES para promover os recursos naturais da nosa contorna e como facer un aproveitamento responsable e sostible deles. 

Fonte: Educación Soutomaior.

A Comisión de Normalización Lingüística da Facultade de Ciencias da USC, co apoio do Servizo de Normalización Lingüística da USC, convoca o concurso de vídeos “Cambio climático e Nós”, enmarcado no compromiso da USC coa Axenda 2030 de Desenvolvemento Sustentable da ONU, “Unha oportunidade coas persoas e o planeta”. Os seus obxectivos son:

• Conectar a USC coas novas xeracións, sensibilizadas con cambio climático.
• Reflexionar sobre este fenómeno, as súas causas e consecuencias.
• Dotar a mocidade de coñecemento, habilidades e motivación para comprender e abordar os obxectivos de desenvolvemento sustentable (ODS) da Axenda 2030.
• Fomentar a busca científica de alternativas e solucións, a eliminación de hábitos contaminantes e a investigación de fontes de enerxía menos contaminantes.
• Atraer a participación do alumnado na actividade científica, usando a lingua galega de xeito natural e con formatos audiovisuais atractivos.

Poden participar no concurso o alumnado de ESO, bacharelato e FP, así como membros das comunidades universitarias da UdC, USC e UVigo. Deberán presentar un vídeo en galego dun máximo de 2 minutos sobre o cambio climático ata o día 24 de abril de 2020. Hai dous premios por valor de 500 euros e outros dous por 250 euros.

As bases pódense consultar aquí.

Este pasado mércores 19 de febreiro recibimos a visita da escritora Eva Mejuto, que fixo un oco na súa axenda, moi apretada por mor dos preparativos dunha nova edición do Salón do Libro Infantil e Xuvenil de Pontevedra, que ela coordina, para conversar sobre dúas das súas obras, 22 segundos e Memoria do silencio.

E non falamos apenas dun encontro, senón de varios (Galería de imaxes), pois a autora reuniuse en primeiro lugar co alumnado de 2º ESO e, posteriormente, cos membros do Clube de Lecturas pola Igualdade.

Lucía Castrillo e Sabela Magariños conduciron o encontro que Eva Mejuto mantivo co alumnado que leu 22 segundos. Nel, a escritora explicounos como deu o salto da literatura infantil a unha novela coma esta, como foi o seu proceso de creación, das vivencias dos e das adolescentes transexuais e da necesidade de empatizar tanto con este colectivo historicamente silenciado e coas persoas LGTBi como en xeral con todas as persoas que nalgún momento se senten bechos raros nunha sociedade que marca certos patróns de conduta e comportamento que limitan a nosa liberdade para expresármonos tal e como somos e que, en non poucas ocasións, oculta e mesmo persegue a diversidade. O alumnado de 2º ESO, ao que lle encantou a novela, quixo saber máis dos seus personaxes, tanto que Eva case nos anticipa por onde irá a segunda parte desta historia que nos fixo reflexionar sobre a vida e nos emocionou a partes iguais.

A seguir, Laura, Brais, Miguel, Lucía, Abril e a profesora Marta compartiron coa nosa convidada un café, unhas pastas e unha charla moi amena, cercana e enriquecedora sobre Memoria do silencio, unha novela baseada na historia das irmáns Touza, mulleres ourensás que na IIª Guerra Mundial salvaron a vida de centos de xudeus que fuxían da barbarie nazi. Con Eva Mejuto, os nosos lectores e lectoras foron debullando as claves dunha historia que os sorprendeu e atrapou e que xa fora obxecto dunha posta en común na sesión que na tarde anterior mantiveran coa profesora Cristina, a coordinadora do clube, e con Marta.

Dende aquí queremos agradecerlle a Eva a súa xenerosidade e o cariño que mostrou co noso alumnado (grazas pola visita!), así como a Lucía e Sabela pola súa magnífica estrea pública como presentadoras dun coloquio, aos rapaces e rapazas dos clubes de lectura porque nos fan medrar con eles e ás profesoras Merce, Marta e Cris por darlle ao alumnado a oportunidade de achegarse a estas historias. E, como non, á Edicións Xerais por facer posible esta visita.