Dentro do marco da orientación académica e profesional é necesario achegar un coñecemento presiso do sistema educativo e das súas posibilidades para que o alumnado poda afrontar con éxito a toma de decisións cara os próximos cursos. Por iso o pasado 29 de febreiro o noso alumnado de 4º ESO, 1º BAC e 2º FPB tivo unha saída a Lugo, onde coñecimos de primeira man a oferta educativa do CIFP As Mercedes e o CIFP Politécnico. No primeiro coñeceron os ciclos de grao medio e grao superior das familias de Transporte e mantenemento de vehículos, Comercio e Márketing, Enerxía e Auga e Instalacións e Mantenemento. No Politécnico, o graos de Sanidade e industria alimentaria, Fabricación mecánica, Electricidade e electrónica e Actividades físicas e Deportivas.

Álbum: Curso académico 2023/24 -> Visita ao Politécnico de Lugo

Este 4 de marzo o INSTITUTO DE ESTUDOS ULLOÁNS presentou no centro un calendario do 2024 con texto e ilustracións da fauna da finca de Quintas. O biólogo e Xurxo Mouriño, Coordinador da Sección de ciencias, medioambiente e educación ambiental, falou e comentou cada un dos animais que co seu debuxo, elaborado polo alumnado do centro coa colaboración do departamento de Ciencias Naturais e Artes Plásticas, e texto, do propio Xurxo Mouriño e Cristina Varela, acompañan aos meses.

A avefría de xaneiro, a papuxa do mato en xullo, ou o tritón marmorado de decembro, entre outros animais, van colmando o decurso do ano mes a mes. Coñecemos costumes deles, reparamos en que existen e nos acompañan na biodiversidade, lembramos e recuperamos os seus nomes e vocabulario propio.

O IES do Camiño agradece ao IEU, e en especial a Hilda García Cabanas e a Xurxo Mouriño, o seu traballo e achega nesta iniciativa para que rapaces e rapazas ulloáns coñezan, valoren e estimen a riqueza natural na que viven.

Álbum: Curso académico 2023/24 -> Finca de Quintas

O pasado 28 de febreiro os nosos alumnos competiron en Lugo na carreira de orientación, cumprindo coa tradición de competir nesta disciplina dos últimos anos. 

Álbum: Curso académico 2023/24 -> Carreira de orientación

O ENDL organizou a charla O galego e as redes sociais, impartida por Borxa González, de Orgullo Galego. Asistiu a ela o alumnado de 4º ESO e 1º Bacharelato, que puido decatarse do abundante contido na nosa lingua en redes tan punteiras como Tik Tok, Twitch, Instagram, etc. e os milleiros de seguidores que teñen.  Porque crear e compartir contido en galego nas redes non resta, moi ao contrario: suma centos de miles de adeptos/as.

Álbum: Curso académico 2023/24 -> O galego nas redes

O pasado 23 de febreiro o noso alumnado de 1º, 2º e 3º ESO asistiu á charla: A violencia de xénero e o sexismo na publicidade, na que se tratou esta temática tanto desde o punto de vista dos medios audiovisuais, coma nas redes sociais.

Álbum: Curso académico 2023/24 -> Charla de violencia de xénero

O pasado 9 de febreiro celebramos no instituto o noso particular entroido cun concurso de baile, que gañaron os alumnos de 2ºBAC, e cunha incrible cata de doces de entroido cortesía das familias do alumnado. Moitas grazas a todas!

Álbum: Curso académico 2023/24 -> Entroido

O alumnado de 4º ESO e 1º de Bacharelato tivo un encontro co entroido da man de Xosé Manuel Seixas, investigador desta festa. Nesta charla estiveron presentes unhas convidadas moi especiais: as máscaras que elabora, de xeito artesán, o propio relator. A través destas fíxose un percorrido moi visual polos entroidos de Galicia, do norte de Portugal e mesmo da illa de Sardeña.

Álbum: Curso académico 2023/24 -> Charla sobre o entroido

O día 30 de xaneiro celebramos na biblioteca do IES do Camiño o Día da Paz cunha actividade na que situamos xeograficamente os conflitos dos que nos falan, de xeito diverso, unha serie de libros previamente seleccionados. As rapazas e rapaces buscaban os libros, marcábamos e comentabamos onde situalos dentro dun mapamundi tendo en conta o argumento ou o contexto no que se desenvolve a trama.

Para a realización da actividade foi imprescindible a colaboración dos voluntarios/as da biblioteca no tempo de lecer, pero tamén do profesorado.

Grazas a todas/os!

Álbum: Curso académico 2023/24 -> Día da paz e non violencia

O día 26 de xaneiro fixemos un obradoiro de braille na biblioteca que consistía en familiarizarse con este sistema táctil de escritura colocando en celas de seis puntos baleiras, os puntos en relevo correspondentes a cada una das letras do nome en braille, de tal xeito que o alumnado puido elaborar un chaveiro.

No obradoiro participaba o alumnado de Proxecto Competencial de 3º da ESO que está desenvolvendo un proxecto sobre diversidade funcional, no que tamén se traballa o braille.

Álbum: Curso académico 2023/24 -> Obradoiro de Braille

O venres 19 de xaneiro tivemos a cuarta xuntanza co alumnado do club de lectura do IES do Camiño que, nesta ocasión, consistiu nun encontro coa autora do último libro lido: A malferida de Irene Rega Jul.

Tivemos a oportunidade de falar con ela sobre o acoso, tema principal do libro, pero tamén sobre as lecturas obrigadas, o proceso de escritura ou os finais abertos e ambiguos. Grazas a todas/os por ler e participar e, especielmente, grazas a Irene pola humildade, o agasallo para a rapazada e a boa conversa.

Álbum: Curso académico 2023/24 -> Reunión do club de lectura