Ao longo do trimestre tamén nos tocou festexar os ANIVERSARIOS dos nenos/as que cumpriron un ano máis. E para iso, continuamos levando a cabo o ritual da “celebración da vida”, ao estilo Montessori. Para dito ritual colocamos o noso tapete no chan no cal aparece representado o sol, e os nomes dos 12 meses do ano (de diferentes cores, dependendo da estación á que pertenzan). O neno ou nena que está de aniversario colle na man o globo terráqueo, e colócase ao lado do mes no que naceu. Entón comezamos a explicar que naceu “x” día nese mes, e poñemos a primeira foto de bebé ao lado do nome do mes e o neno/a comeza a camiñar ao redor do tapete a medida que explicamos que mentres que van pasando os meses ese bebé vai medrando ata cumprir un ano (momento no que volve estar ao lado do mes no que naceu), e nese momento colocaríamos a foto de cando cumpriu o 1º ano de vida, e así sucesivamente ata chegar ao nº de anos que cumpre na actualidade. Durante ese proceso tamén explicamos que un ano, é o tempo que tarda a terra en dar a volta ao sol, e que durante ese tempo se van sucedendo as 4 estacións.

Esta celebración gústanos moito, pois fai que nos sintamos protagonistas no noso día e que poidamos compartir cos nosos/as compañeiros/as momentos moi significativos da nosa vida, sendo conscientes ademais de todos os cambios que se produciron dende o momento do noso nacemento ata o día de hoxe.  

E posto que seguimos sen poder soprar as velas, algo que sempre nos gustaba moito, este ano tamén mantivemos o momento da sorpresa: o neno/a que está de aniversario recibe unha pequeniña sorpresa que ten que coller na “nosa caixa misteriosa”. Todos/as agardamos con moita intriga dito momento e nos fai moita ilusión!

 

                        

 

                                                                                                 

 

O presente curso seguimos incidindo tamén na importancia de alimentarnos dunha forma saudable para contribuír desta forma ao benestar da nosa saúde, e para manter ao mesmo tempo as nosas defensas moi altas. Así pois, tratamos de concienciarnos da importancia que ten o consumo de froita no noso día a día, e aínda que non a todos/as nos gustan da mesma forma, todos/as estamos intentando acompañar as nosas merendas diarias cunha peza de froita. En relación a isto, colocamos na aula un panel, o panel do “Club da froita” no que levamos a cabo un rexistro diario, sempre e cando comemos a peza de froita que traemos. Cada día estamos máis motivados/as, e xa houbo varios compañeiros/as que conseguiron completalo!! E como recompensa a dito logro recibimos unhas medallas moi particulares!

 

 

                                                                                                    

 

 

Este curso tamén lle demos continuidade ao traballo iniciado o ano pasado cos membros da asociación AVOAR, a través do proxecto que leva por título: VIDA, LECER E AFECTO, a través do cal afondamos:  nos estereotipos de xénero, no bo trato, na autonomía, o coidado persoal, o coidado social, crear un “bo patio”, como xogar ben, relacións no patio...

 Durante a primeira sesión, coñecémonos a través duns xogos de presentación e logo lemos un conto, que nos levou a grandes reflexións, pois o seu protagonista, chegaba a perder a súa identidade ao tratar de compracer a todos os que o rodeaban e deixar de lado os seus gustos e necesidades. Como remate da sesión fixemos unha valoración da mesma.

 

                                                     

 

              

 

 

 

    Durante a segunda sesión, abordamos o coidado dos nosos patios e a contorna. Por último, fixemos valoración da sesión.

 

 

                                                            

 

                        

 

 

Como cada curso tamén levamos a cabo algunha que outra celebración e conmemoración.

Así pois a primeira delas, foi a celebración do Magosto, na que pasamos unha xornada moi animada levando a cabo diversos xogos en común como por exemplo: xogos de destrezas e habilidades, os zancos, relevos con culleres... Tamén gozamos dunha merendola a cargo de doces caseiros, etc. proporcionados polas familias, así como tamén das ricas castañas asadas.

 

              

 

               

 

               

 

               

 

              

 

 

Outra celebración que tamén nos gustou moito, foi a do Samaín. Durante esa semana levamos a cabo un taller de decorado de cabazas, disfrazámonos de cousas terroríficas, e levamos a cabo un conxuro para queimar e espantar os nosos medos.

As palabras que diciamos no conxuro eran as seguintes:

“cabaza cabaciña,

aquí deixo os meus medos,

para que saian da miña cabeciña”

 

 

E por outra parte os nenos/as da aula de primaria dramatizaron o conto de Corre Corre Cabaciña, o cal nos gustou un montón!

 

        

 

        

 

         

 

         

 

 

             

 

                                 

 

                                                                                                                               

 

                                       

 

                                                                          

 

              

 

 

O 25 de novembro conmemoramos o Día internacional contra a violencia de xénero, e para iso a partir da lectura do conto “Os bonobos con lentes” fixemos uns debuxos nos que representamos aquelas cousas que podemos facer tanto homes como mulleres, nenos coma nenas, avós como avoas, etc. de forma que todos/as independentemente do xénero ao que pertenzamos nos poidamos sentir ben e felices. 

 

 

 

                                                                                                                            

 

 

 

 No mes de novembro tivemos unha saída ao Auditorio de Rianxo para gozar dun Concerto Didáctico de música jazz, e pasámolo xenial cantando algunhas das cancións que coñecemos.

 

                                               

 

 

 E xa para cerrar o trimestre, durante as últimas semanas de cole, estivemos facendo algunha que outra manualidade de NADAL para decorar un pouco a escola, tamén xogamos con algúns xogos de temática de nadal, e o último día do trimestre contamos coa visita das familias para elaborar entre todos/as algunhas manualidades e tamén nos reunimos no patio nunha gran roda para celebrar as 12 badaladas a modo de despedida. 

 

 

                                                                     

 

           

 

                                                                

 

                                                                 

 

                                                                        

 

                                                                        

 

                                                                         

 

                                                                  

 

                  

 

Vémonos á volta das vacacións, coas pilas ben cargadas de novo, e con moitos momentos e aventuras novas aínda por compartir!

 

 

BO NADAL E FELIZ ANO NOVO PARA TODOS/AS!