Blogue de admin

Logo do cribado masivo de onte (alumnado, profesorado e persoal non docente), esta mañá comunicáronnos que se detectaron  dous casos positivos e asintomáticos. Estes positivos xa están illados nas súas casas. Tamén nos puxemos en contacto coas familias dos contactos estreitos para que garden a corentena. Estes contactos foron comunicados ao Sergas para que lles fagan un seguimento.

• Non ter recibido mensaxe Abalar do grupo de clase do voso fillo ou da vosa filla significa que todo está correctamente.
• Nos casos detectados e nos contactos comunicados será o Centro de Seguimento e Control quen dará as indicacións directamente, establecendo as pautas a seguir.

Esperamos que estas medidas tamén axuden a mellorar a situación da contorna e aproveitamos a ocasión para destacar a profesionalidade do equipo do SERGAS desprazado ao centro, a axilidade na organización dos membros da comunidade educativa e a boa predisposición e colaboración das familias. Moitas grazas a todos/as.

O pasado venres 5 de marzo o alumnado de 1º de Bacharelato asistiu a unha charla-obradoiro sobre Escaneado 3D de obxectos reais, impartida por Juan Pedro Ortíz Sanz, profesor de Enxeñería Agroforestal da USC no Campus Universitario de Lugo. Na parte teórica desta actividade, o profesor explicoulle aos rapaces e ás rapazas que os modelos 3D son figuras virtuais tridimensionais que representan un obxecto real e que se están empregando xa en múltiples campos como a medicina, arquitectura, videoxogos, ou no deporte. Na parte práctica, o alumnado utilizou unha aplicación gratuíta para móbiles coa que crearon un modelo en 3D dunhas cunchas de vieira, a partir de 10 fotografías tomadas por eles mesmos.

A actividade foi organizada polos Departamentos de Orientación e Tecnoloxía no marco do programa A Ponte entre o ensino medio e a USC, promovido pola USC para achegar aos centros de ensino secundario o traballo que se desenvolve na universidade.

O club de lectura Narrando con imaxes reuniuse esta mañá para facer unha posta en común de Supersorda, de Cece Bell, unha historia autobiográfica sobre a xordeira da protagonista que non deixou indiferentes aos mozos e mozas do club.

Por iso, queren partillar connosco as súas impresións e recomendar vivamente esta lectura que está dispoñible na Biblioteca do instituto.

Emilio J. Puime tróuxonos un pouco de Uganda á clase de música. Un galego, etnomusicólogo e cooperante internacional, tratou de fortalecer o noso pensamento sobre os dereitos humanos relacionándoos coa música tradicional en Uganda. Ademais, Emilio coordina a ONG Destino Uganda, que se adica a mellorar a vida de nenos e nenas en situación de vulnerabilidade e pobreza extremas, sendo a música o que se converteu no medio de vida para estes rapaces.

Durante a charla con Emilio, púidose ver como a etnomusicoloxía pode traballar coa cooperación ó desenvolvemento, xa que garantir o cumprimento dos dereitos humanos e dos obxectivos da Axenda 2030 (ODS) é a maneira de convervar o patrimonio cultural inmaterial en áreas desfavorecidas.

Apareceron termos como a globalización, cultura, relativismo cultural ou tradición; este foi seguido da visualización de exemplos de música tradicional en Uganda, para entender que non é mellor nin peor, simplemente diferente.

De maneira conxunta, chegouse á conclusión da necesidade da conservación do patrimonio e o cumprimento dos dereitos humanos, xunto cos obxectivos de desenvolvementos sostible (Axenda 2030), pois así poderemos ter un mundo máis humano e habitable.

O 23 de febreiro, entre as 18:30 e as 20:00, terá lugar a primeira das charlas dunha nova edición da Escola de Familias que promove o Concello de Soutomaior.

A primeira ponencia  achegarase a unha cuestión de especial interese nestes tempos, "Familias ante a COVID-19: convivencia ou supervivencia?", e versará sobre as dificultades que se están a dar na contorna familiar e de convivencia para xestionar emocionalmente esta crise e todas as súas posibles consecuencias. A sesión estará guiada por un membro de ASEIA (Asociación para a Saúde Emocional na Infancia e na Adolescencia), entidade especializada na atención integral en saúde emocional e mental comunitaria dos nenos, adolescentes e as súas familias.

Para participar nesta charla a través de videoconferencia as persoas interesadas deben inscribirse a través deste formulario antes do xoves 18 de febreiro.