05.12.2023

 O alumando de 1º Bacharelato ven de participar nunha actividade organizada polos departamentos de Física e Química e Bioloxía e Xeoloxía, que se desenvolveu o pasado martes día 5 de decembro na cidada da Coruña.

A xornada comezou cunha visita á Casa das Ciencias para continuar cunha interesante experiencia no MUNCYT (Museo de Ciencia e Tecnoloxía) onde o alumnado tivo a oportunidade de participar nun obradoiro de electricidade e electrónica. Resultou unha xornada de convivencia moi interesante!

Queremos destacar de xeito moi positivo a felicitación por parte dos responsables dos museos visitados polo bo comportamento e actitude do alumnado durante o desenvolvemento das actividades.

Álbum: Escolares -> 2023_12_05_1ª AVA_1º BACH_MUNCYT_Casa das Ciencias_BioXeo_F&Q

O alumnado de 4º ESO xa está inmerso na recadación de fondos para a súa excursión de Fin de Curso.  Para iso, elaboraron oito cestas con produtos doados polos comercios de Monforte de Lemos. Se che gustaría ser o/a afortunado/a de levar unha delas, só terás que mercar rifas (como as que aparecen na imaxe) ao alumnado de 4º ESO do IES Río Cabe.

Queremos agradecer a ANPA a súa colaboración no pagamento íntegro das rifas a todo o alumnado deste curso.

Moita sorte a todas e a todos!

O sorteo realizarase o 15 de xaneiro de 2024 na entrada do IES Río Cabe e publicaranse os números gañadores e a cesta asociada a cada níumero na web e nun cartel informativo na porta do IES. No ca so de non aparecer os gañadores/as repetiríase o sorteo o 1 de febreiro de 2024.

Tamén queremos dar as grazas a todos os comercios que achegaron os seus produtos para que se puidesen elaborar as cestas. Os comercios de Monforte de Lemos son os seguintes:

29.11.2023

Coma todos os anos, alumnado, profesorado e persoal non docente conmemoramos o Día Internacional da Eliminación da Violencia contra as Mulleres. Este curso, dende o IES Río Cabe, tivemos varias actividades na Biblioteca: lectura dun manifesto por parte do alumno Demetrio Álvarez de 1º Bacharelato, coreografía do tema ""Reina" de Ruth Lorenzo e Tanxugueiras por parte do alumnado de 2º ESO e a continuación actuación do grupo musical de Bibliocabe "Os Furanchos". 

Para rematar esta xornada entregóuselle a toda a comunida deducativa do IES Río Cabe unha chapa impresa con debuxos feitos polo alumnado en relación ao 25N.

Dende o IES Río Cabe dicimos NON á violencia contra as mulleres e a calquera tipo de violencia. 

Pica AQUÍ para ver a galería de fotos.

27.09.2023

O día 27 de setembro baixamos á pista de deportes exterior con alumnos/as de 3º ESO, para recoller os datos que logo empregaremos na realización dos cálculos do perímetro terrestre tal e como o mediu por primeira vez hai dous mil douscentos anos Eratóstenes. Os alumnos/as por grupos fixeron distintas tomas de datos, soportando un forte sol.

Eratóstenes é coñecido por ser a primeira persoa en calcular o diámetro e a circunferencia da Terra comparando a altitude do Sol ao mediodía, en dous lugares que se atopan separados unha distancia coñecida.

Trátase de describir cando é mediodía no lugar onde se vive, e determinar o raio terrestre a través da inclinación dos raios solares. Tamén se potencia o traballo en equipo, xa que estes datos serán compartidos con diferentes centros de todo o mundo para determinar o raio da Terra e o seu perímetro, mostrando así a importancia do traballo en equipo na ciencia.

Álbum: Escolares -> 2023_09_27_1ª AVA_3º ESO_ Club de Ciencias_Proxecto Eratóstenes

22.11.2023

O 22 de novemebro o alumnado de 4º ESO recibiu un obradoiro impartido por Paula do Centro de Información á Muller (CIM) cuxo título é CON (SENTIDO) Prevención da violencia sexual. Nel puideron explicar e debater sobre as relacións afectivas e tratar o tema da prevención da violencia sexual. Foi un obradorio que contou con grande acollida por parte do alumnado e do profesorado.

21.11.2023

Información picando nesta LIGAZÓN

Pica AQUÍ para inscribrte na II Acción Formativa Virtual. 21 de novembro de 2023. 17:00 a 20:00 horas.

Pica AQUÍ para ver a información en .PDF

16.11.2023

O xoves 16 de novembro foi un día de celebración no IES Río Cabe. O noso alumnado do curso de Capacitación Dixital festexou a súa graduación. Tivemos a honra de contar neste evento coa xefa territorial, Sagrario Sánchez, coa inspectora de educación María Bóveda e coa deputada autonónima Katy Varela.

En primeiro lugar, o director do noso instituto, Carlos Parada, agradeceu a alta participación que tivo este curso de capacitación dixital ao tempo que felicitou ao alumnado por conseguir os obxectivos propostos. De seguido, o profesor José Manuel Gil, en nome de todos os docentes que impartiron docencia durante estas semanas, quixo ter unhas palabras de agradecemento ao alumnado que xa forma parte da familia riocabense. A continuación, Gonzalo, Rodolfo, Natalia e César, alumnos do dito curso, tamén manifestaron o seu contento. Seguidamente, Sagrario Sánchez e Katy Varela ofreceron unhas verbas felicitando ao alumnado e ao profesorado por levar adiante esta actividade.

Xa no ecuador do acto a nosa vicedirectora, Ana Otero, foi chamando ao alumnado para que as autoridades presentes entregasen os diplomas a cada un dos participantes.

Antes de chegar ao final, o alumnado da quenda de diúrno de 1º de Bacharelato, Demetrio Álvarez e Sabela López, recitaron cadanseus poemas, concretamente “Galicia” de Manuel María recollido na obra Os soños na gaiola e “Iceberg” de Yolanda Castaño da súa obra Materia (Premio Nacional de Poesía 2023).

Xa para rematar, Xurxo Rodríguez e Nerea Iglesias, docentes do IES Río Cabe, e Ariadna Valdés, alumna de 2º de Bacharelato, puxeron a nota musical a un acto cheo de emoción.

Posteriormente, todas e todos tomamos uns petiscos na cafetería do instituto.

Dende o IES Río Cabe estamos tremendamente orgullosos de todas e todos por ter participado no curso e agardamos poder ofrecer máis actividades deste tipo.

Parabéns ás persoas graduadas e ata a seguinte!

Pica AQUÍ para ver a galería de fotos.

Pica AQUÍ para ver os vídeos do acto de graduación. 

Outubro 2023

As actividades fóra da aula do CS de Guía, información e asistencia turísticas do mes de outubro tiveron como destino Pantón e o Museo de Arte Sacro das Clarisas.

Próxima ao Mosteiro de San Salvador de Ferreira visitamos unha das casas grandes máis importantes da contorna, a Casa de Maside. Conxunto arquitectónico do século XVIII que durante un tempo funcionou como aloxamento rural. 

Tamén en Pantón, Marcos e Reda propietarios de Pantón Rural -complexo de vivendas de uso turístico con gran aceptación entre os visitantes que se achegan á Ribeira Sacra lucense- exerceron de anfitrións na visita aos seus establecementos de aloxamento e tiveron a xentileza de convidarnos a facer un xogo de escape room entre viñedos, “El Secreto de la Abadesa”. Unha experiencia ideal para disfrutar en grupo en plena natureza e con unhas vistas excepcionais! Foto 1

Pechamos as actividades do mes cunha visita ao Museo de Arte Sacro das Clarisas de Monforte de Lemos. É un dos museos de arte sacro máis importantes de España grazas, na meirande parte, ao legado artístico doado polos VII Condes de Lemos -escultura, téxtiles, relicarios,  pinturas e outros obxectos suntuarios- froito do seu virreinato en Nápoles. Das adquisicións en España son pezas destacadas o Cristo Xacente e as Inmaculadas de Gregorio Fernández. Foto 2

Pica AQUÍ para ver a galería de fotos.

10.11.2023

Xa estamos inmersos coa preparación da Semana Branca en Andorra! Este venres 10 de novembro tivemos unha reunión co alumnado de 1º Bacharelato para comezar a organizar a viaxe. Agardamos que poidan ir xa que se trata dunha experiencia que non esquecerán nunca. Adiante Semana Branca!

09.11.2023

O xoves 9 de novembro, alumnado e profesorado da ESA acudiu ao Edificio Multiusos de Monforte de Lemos para gozar da obra teatral O porco de pé de Vicente Risco da man de Producións Excéntricas. Foi unha tarde ben entretida!