O alumnado de 5º e 6º de primaria, enmarcado no noso proxecto Tepomisión: protexamos os nosos montes, participou nun obradoiro de Ecoloxía na vida cotiá.

Coñeceron como realizar receitas ecolóxicas de limpeza e droguería: antical, abrillantadores de mobles, limpadores de chans e azulexos, limpafornos...

Tamén observaron o proceso de elaboración de xabón reutilizando aceite.

No CEIP de Rebordáns, alumnado, mestres e familias estamos en continua formación, neste caso en primeiros auxilios.

Todas e todos moi concienzados sobre como realizar os primeiros auxilios, as técnicas de reanimación cardiopulmonar (RCP) e o manexo de asfixia.

Os nenos e nenas desfrutaron aprendendo como axudar a outras persoas, gañaron confianza e aprenderon a manter a calma en situacións de emerxencia.

Grazas a anpa pola súa colaboración, e destacamos a labor do persoal de Protección Civil, que tan xenerosamente compartiu o seu tempo e coñecementos con nós.

Tepo e Tepa aportaron tamén todas a novidades relacionadas coa saúde que temos na biblio.

Tepo e Tepa convidaron a un amigo moi especial a pasar un tempiño nas aulas de infantil.

Trátase de Naturizo, un erizo cacho veciño da serra de San Mamede en Ourense.

Xuntos compartiron historias e aventuras, contos e manualidades!

Que ben o pasaron! Sen dúbida unha boa forma de continuar o noso proxecto de centro;

Tepomisión: protexamos os nosos montes.

 

Tepo e Tepa teñen o pracer de presentarvos... o voso Poemario da Natureza.

Parabéns, familias, polo fantástico traballo!

Como cada ano, conmemoramos o día 8 de marzo o Día Internacional da Muller, neses días realizamos distintas actividades co noso alumnado: 

- Os/as máis pequenos/as elaboraron unhas fantásticas coroas co número 8 relacionado co día no que se festexa.

- A través do conto Daniela Pirata traballouse ao longo da semana a importancia da igualdade e levaron un recordo unha pulseira.

- O alumnado poido participar nun Obradoiro de igualdade sobre mulleres artistas coñecendo a escultora Soledad Penalta e a pintora Maruxa Mallo. A rapazada poido deixar solta a súa creatividade facendo a súa propia escultura con arxila branca e o seu debuxo libremente. Dito obradoiro foi impartido por "Donde Viven los Cuentos".

- Os máis maiores, xogaron ao xogo de cartas "We Can Play" de Julivert.

- Tamén tivemos tempo de facer algunha manualidade relacionada con este día.

Para traballar sobre este tema e reflexionar sobre a situación de moitas mulleres no mundo, traballouse a figura dunha muller Wangari Maathai que foi moi importante para o seu pobo natal, en Kenia pero tamén unha referente para o mundo. A continuación, poderedes desfrutar da actuación e de todo o traballo realizado por 3º e 4º de Primaria.

A semana do 19 de marzo celebramos St. Patrick’s Day. 

Aprendimos sobre Irlanda , sobre St. Patrick’s e a súa historia, limos o conto “How To Catch a Leprechaun”, fixemos un mural colaborativo, cantamos e bailamos ata quedar cansos!

O día 19, o leprechaun Finn deixounos unha nota no cole como agradecemento polo traballo sobre St. Patrick’s Day e tamén unhas moedas de chocolate. Que ricas que estaban!

Hoxe é o día da árbore, un día moi importante para o noso centro xa que a nosa Tepomisión é precisamente "o coidado dos nosos montes".

Levamos semanas traballando a figura de Wangari, unha mulller referente para nós, xa que grazas a ela, o seu pobo natal, en Kenia, volve a ter árbores onde antes soamente había deforestación.

No cole fixemos a nosa pequena aportación cultivando sementes.

Liñas, liñas e máis liñas...de diferentes cores, grosores, formas... hoxe comprendimos que pode ser unha boa opción, e moi orixinal, colorear un debuxo con raias. Decidimos experimentar e facer a nosa propia versión do monte Aloia! Bo traballo moz@s!!

As nenas e nenos de sexto vanse meter de cheo no mundo da robótica. Probarán dous modelos: o Mbot e o MiiBot. Despois de construilo terán que programalo. O traballo levará varias sesións e vos iremos contando paso a paso. Polo momento...aula de Steam preparada para comezar mañá.

CONTINUARÁ...

Tepo e Tepa sorprendéronnos unha vez máis cunha interesantísima visita. 

O educador ambiental, Marcos Guiadanes, enriquecía o noso proxecto de centro cunha charla sobre o Bosque Atlántico.

Explicounos a importancia que teñen as árbores autóctonas no equilibrio ecolóxico, para a fauna e especialmente para as aves; coñecemos as especies forestais foráneas máis daniñas para o equilibrio ecolóxico e recoñecemos as vinte e cinco especies arbóreas autóctonas da nosa contorna.

Nós estivemos encantados e encantadas!

Por un bosque de coñecemento!