Complementarias

Como que nos entra nunha lingua e nos sae por outra? De que estamos a falar? De linguas! Si, de linguas, en concreto, dos estudos e do traballo de Tradución e Interpretación que nos veu presentar a doutora Lara Domínguez Araújo, profesora da Universidade de Vigo, no marco do noso ciclo de charlas divulgativas e temáticas das universidades.

Tras establecer as diferenzas que hai entre as actividades da tradución e a interpretación, esta docente e investigadora achegou o alumnado aos estudos que se imparten na Facultade de Filoloxía e Tradución viguesa e a multitude de ámbitos en que desenvolven o seu traballo estes profesionais unha vez licenciados: dende os filmes aos videoxogos pasando pola publicidade, o turismo e sectores económicos e artísticos de todo tipo.

Así mesmo, dende o coñecemento de quen tamén se dedica á tradución e interpretación profesional, salientou o papel activo que xoga a lingua galega como vantaxe competitiva no mundo globalizado e, como exemplo disto, mostrou unha extensa nómina de empresas tecnolóxicas, multinacionais de todo tipo, institucións e e asociacións locais e internacionais que demandan o traballo de tradutores/as e intérpretes galegos/as saídos da UVigo (Das Lagoas a Silicon Valley: vivir da tradución e a interpretación en Galicia). 

Finalmente, explicou os procesos cognitivos que interveñen na aprendizaxe da interpretación, unha habilidade que precisa de moito estudo e preparación continuos, dunha grande capacidade de concentración e coordinación... e moita práctica,, pero que tamén regala moitas satisfaccións, coñecementos e experiencias. E así rematou a charla, coñecendo as diferentes modalidades da interpretación e practicando nunha actividade na que os rapaces e rapazas fixeron de intérpretes e oíntes de inglés-galego e galego-castelán. E aínda houbo tempo para o coloquio con Lara, á que lle agredecemos todo canto aprendemos hoxe e que sementase o interese pola súa profesión entre o alumnado. Para máis información: Grao de T&I, AGPTI e Rede Vértice. 

Máis imaxes da exposición e a charla nesta galería fotográfica

“Esta historia comezou hai miles de anos, cando as nosas antepasadas miraron o ceo e observaron o sol, a lúa e as estrelas...”.

Con estas liñas comeza a exposición Astrónomas, unha serie de 16 paneis que destacan o papel da muller na Astronomía, e que temos á nosa disposición no centro desde o pasado 9 de decembro, e ata o próximo 15 de xaneiro, dentro das actividades organizadas polo Departamento de Matemáticas.

A exposición AstrónomAs, patrocinada pola FECYT (Fundación Española para a Ciencia e a Tecnoloxía ) e a SEA (Sociedade Española de Astronomía), está dispoñible en formato físico e dixital, e atópase traducida a varias linguas (castelán, catalán e galego). Pódese visitar na ligazón AstrónomAs, onde ademais de atopar os descargables que temos no centro encontramos actividades e información adicional.

Con motivo desta exposición, tivemos a sorte de contar, o pasado venres 17 de decembro, con Josefina F. Ling Ling, profesora na Facultade de Matemáticas da USC, investigadora no Observatorio Astronómico Ramón María Aller Ulloa (Santiago de Compostela) e unha gran divulgadora científica.

Durante a súa visita, Josefina Ling convidounos a reflexionar sobre o papel da muller na Astronomía e na ciencia, tomando como marco de referencia a exposición AstrónomAs. Por outra banda, puidemos coñecer da súa man a figura de Antonia Ferrín Moreiras, que foi a primeira astrónoma galega, a primeira muller española en defender unha tese sobre a Astronomía e tamén a primeira persoa en defender unha tese na Facultade de Matemáticas da USC.

Dende o noso centro, felicitamos a astronomas.org por esta extraordinaria exposición e agradecer a Josefina Ling o seu labor a prol da divulgación científica e do recoñecemento da muller na ciencia.

O centro acolleu onte, mércores 15 de decembro, dúas charlas formativas que achegaron o alumnado ao noso medio, tanto ao medio natural como ás nosas formas de vida tradicionais.

Por unha banda, o alumnado de Ciencias da Terra e do Medio Ambiente (2º BACH) e de Ciencias Aplicadas á Actividade Profesional (4º ESO) asistiu á charla "Experiencias co pH no solo" dentro do Programa Revitaliza, que impulsa a Deputación de Pontevedra. Nela, destacouse a importancia da compostaxe dende un punto de vista estratéxico para a reciclaxe de residuos orgánicos, e das propiedades e aplicacións do compost como enmenda orgánica para solos agrícolas e para restauración de solos degradados a causa dos incendios forestais. Ademais, mostrouse a importancia do pH do solo na dispoñibilidade de nutrientes para as plantas, e caracterizáronse dun xeito sinxelo e práctico un solo alcalino e un solo ácido.

Por outra banda, o alumnado de 4º ESO participou na segunda (a 1ª realizouse o venres 3) das charlas do programa Relevo 2. A mocidade Abordo, promovidas polos GALP (Grupos de Acción Local do sector Pesqueiro). Nestas sesións achegámonos ao sector pesqueiro (pesca, marisqueo, acuicultura) dende o punto de vista laboral, é dicir, das diferentes posibilidades a nivel laboral que ofrece (mariscador, pescador, persoal administrativo, capitán de barco, mentemento de instalacións, persoal investigador...). Así mesmo, deuse a coñecer o abano de posibilidades formativas que hai en Galicia enfocado a estas profesións, dende ciclos de grao medio e superior ata graos universitarios.

Estas actividades foron organizadas polo Departamento de Bioloxía e Xeoloxía en colaboración con outros seminarios.

O pasado mércores 22 de novembro o Departamento de Inglés e a editorial Burlington Books organizaron a "English Culture Class", ou sexa, un obradoiro no que Damien, o noso convidado, introduciu o alumnado de 1º e 2º da ESO en diversos aspectos da cultura e  a realidade dos países anglófonos dunha maneira amena, moi divertida e participativa, o que facilitou a interacción en inglés co alumnado. En febreiro, haberá unha segunda quenda para os grupos de 2º C e 1º C.