Complementarias

Esta mañá deu comezo o programa "Finanzas para mortais" no que participa o alumnado de Economía de 4º ESO C e que contará cunha segunda sesión o 22 de febreiro. A charla foi impartida por José Carlos Pérez Pazos e abordou cuestións financeiras básicas como activar contas e tarxetas bancarias, operar na banca on line, a seguridade nas operacións e novos modelos de pagamento como Bizum.

Esta actividade ten por obxecto fomentar o emprendemento e a cultura financeira no sistema educativo non universitario como motores da innovación, a competitividade e o crecemento da economía, e encádrase no Plan de Emprendemento no Sistema Educativo Eduemprende no que colaboran a Consellería de Educación, a Fundación da Universidade de Cantabria para o estudo e a investigación do sector financeiro (UCEIF) e o Banco Santander S.A.

Dous equipos formados por Marta Alonso, Laura Lorenzo Comesaña, Miguel Velasco e Álvaro Domínguez (IES Soutomaior 1) e Laura Amoedo, Paula Estévez, Blanca Quiñones, Ángel Otero e Laura Lorenzo Meira (IES Soutomaior 2), respectivamente, participaron no III Torneo de Debate Académico de Galicia que se está disputando dende o 25 de xaneiro de forma non presencial coa participación de 44 equipos escolares de toda Galiza.

O torneo organizado pola Fundación Barrié ten como finalidade ofrecer aos máis novos e ás máis novas unha ferramenta excepcional para o seu desenvolvemento académico e persoal, a oratoria, e nesta edición formulou a pregunta: “Deben os países membros da Unión Europea limitar as liberdades fundamentais para salvagardaren o benestar colectivo?”.

O alumnado dedicou semanas á investigación e á preparación das posturas A Favor e En Contra desta pregunta, traballo que acadou unha intensidade importante no último mes e que foi premiado cuns resultados máis ca meritorios, tanto en puntuación como en vitorias. Pero, máis alá disto, é preciso felicitalos pola súa implicación e estamos seguros de que os moitos nervios e as moitas horas dedicadas foron compensadas coa convivencia, o progreso na súa aprendizaxe e a experiencia acumulada nos debates cos outros equipos, así como co aproveitamentos das observacións das xuízas que valoraron o seu desenvolvemento ao longo de tres xornadas.

Agora, comeza a preparación da próxima cita, o Parlamento Xove 2021, que propón o seguinte tema de debate: "Debería un estado establecer como obrigatoria a vacinación entre a súa poboación?"

Este venres 29 de xaneiro contamos coa visita de Francisco Dubert, profesor do Departamento de Filoloxía Galega da USC, membro do Instituto da Lingua Galega e codirector da revista Verba, que nos aproximou ao apaixonante mundo das linguas en contacto nunha viaxe que nos levou dende a orixe da humanidade ata a realidade sociolingüística galega pasando por Estados Unidos, Papua Nova Guinea, Australia ou os idiomas de Europa. 

A actividade coorganizada polos Departamentos de Orientación, Lingua Galega e o Equipo de Normalización Lingüística, enmárcase dentro do programa A Ponte entre o ensino medio e a USC, promovido pola USC para achegar aos centros de ensino secundario o traballo que se desenvolve na universidade.

A conferencia, de ton ameno e salferida de exemplos e casos prácticos, achegou o alumnado ao contacto de linguas, unha situación que se dá de forma habitual ao longo de todo o mundo e que suscita a reflexión sobre as súas implicacións no noso día a día tanto a nivel individual como no que ten a ver coa forma en que nos relacionamos en socidade. 

Y entonces nos perdimos... Este foi o suxerente título do cómic de Ryan Andrews que reuniu unha vez máis o alumnado que forma parte do club "Narrando con imaxes".

É a Festa do Equinoccio e o pobo reúnese para lanzar ao río centos de farois. A lenda conta que unha vez que os perdes de vista, voan cara á Vía Láctea e se converten en estrelas, mais Ben e os seus amigos queren averiguar qué sucede realmente. O plan é ir en bici seguindo o río o tempo que faga falla ata descubrir a verdade.

E, para partillar esta emocionante aventura e moito máis, os rapaces e rapazas do club se reuniron nun lugar tamén orixinal para gardar as medidas de seguridade, o ximnasio, onde foron xurdindo conversas e ilustracións que vos animamos a ver no blogue da biblioteca. Para mostra, un exemplo.

Onte deu inicio no noso instituto o ciclo de charlas científico-divulgativas que as Universidades de Vigo e Santiago de Compostela ofertan ao alumnado de Bacharelato para achegalo aos estudos universitarios, ás investigacións que desenvolven nos seus centros e ás saídas profesionais que poden ter nun futuro non tan afastado. Así mesmo, estas xornadas organizadas polo Departamento de Orientación e os Departamentos Didácticos do IES tamén procuran informar e orientar o alumnado como futuro estudante universitario, para que poida elixir os estudos que máis se adapten ás súas preferencias.

Que se fai na Informática industrial?

Esta foi a temática que Manuel Pérez Cota, Catedrático do Departamento de Informática da Escola de Enxeñaría Industrial da UVigo, abordou onte co alumnado de 2º BACH A na primeira das charlas do ciclo. O profesor deu a coñecer os principais avances na informática industrial, desde a utilización dos computadores ata a impresión 3D, facendo ver como é posible que se deseñe calquera cousa utilizando unha computadora e seguindo o seu proceso ata que se fabrica con control por computadora. Entender o marabilloso mundo da programación para sistemas industriais de control, visión artificial, internet das cousas (IoT), robots, etc.