Complementarias

As Brigadas ecolóxicas: lixus marítimus, compostas polos mozos e as mozas de 2º ESO, realizaron unha acción de limpeza e reciclaxe de plástico os pasados 25 e 26 de maio para demostrar que os residuos que ameazan o noso planeta non están moi lonxe, senón que están na nosa contorna máis inmediata, que os xeramos nós mesmos e que somos responsables directos da súa redución, a súa reciclaxe e a súa reutilización.

A actividade, organizada pola Concellería de Educación de Soutomaior e acollida polos Departamentos de Bioloxía e Tecnoloxía, procura a sensibilización sobre o uso excesivo de plásticos nas nosas vidas e a súa posterior xestión, descontrolada, como residuo que afecta de maneira directa á nosa contorna e ao noso planeta. Despois dunha charla introductoria no propio instituto a cargo das educadoras medioambientais, o alumnado realizou a acción de limpeza e reciclado do lixo, cumprimentou unha ficha técnica e logo participou dun obradoiro de estampaxe de sumidoiros sobre bolsas de tea. E, por suposto, houbo tempo para a convivencia e para gozar dun día de sol na natureza, como ben se pode ver nesta galería de imaxes.

Coma sempre, agradecemos a proposta da Concellería de Educación e a implicación total das monitoras, da OMIX e Protección Civil por facer posible esta xornada formativa e de convivencia, xunto co profesorado implicado.

O mal tempo obrigou a adiar as saídas de 1º ESO A e C e do alumnado de Bioloxía de 4º da ESO e 1º de Bacharelato, mais os rapaces e rapazas de 1º ESO B e D si que puideron gozar do roteiro polos ríos Verdugo e Oitavén que tivo lugar o pasado martes 4 de maio.

Esta andaina enmárcase no programa "Efecto dominó. Entre ríos", unha iniciativa das Concellarías de Educación e Medio Ambiente acollida polo Departamento de Bioloxía e Xeoloxía do noso centro e que xa no mes de marzo contemplou unha primeira fase formativa con charlas que tiñan como finalidade activar coñecementos xerais do alumnado.

Neste roteiro, o alumnado de 1º ESO coñeceu os valores ambientais dos espazos naturais que constitúen as ribeiras do Verdugo e do Oitavén, os ríos que atravesan e dan vida ao noso concello, da man das monitoras Carla e Nerea.

Máis imaxes da xornada neste álbum de fotos

O roteiro partiu da Ponte da Comboa e da Presa do inferno e rematou na praia fluvial da ponte colgante, na que o alumnado gozou do merecido xantar e da convivencia a carón das augas do Verdugo. Durante o roteiro fixeron diferentes actividades, como unha de orientación por parellas, na que aprenderon a ubicar as pontes, a confluencia dos ríos, etc. no mapa. Tamén fixeron unha actividade de identificación de fauna e flora, especies invasoras incluídas, tarefa que realmente os ocupou durante toda a andaina estimulados polos retos e xogos propostas polas monitoras.

Ao participaren no proxecto, os rapaces e as rapazas recuperan boas prácticas ambientais, poñen en valor os recursos medio ambientais e convértense en axentes sensibilizadores para achegar estes valores ao maior número de persoas. 

O alumnado de Tecnoloxía Industrial de 1º de Bacharelato participou esta mañá nunha visita (virtual) á empresa Naturgy no marco do Programa EduTecEmprende, da Consellería de Educación, que ten como finalidade motivar e sensibilizar o alumnado de diferentes niveis educativos no espírito emprendedor a través do coñecemento da realidade empresarial e tecnolóxica da súa contorna, así como promover a súa achega ás áreas STEM.

Os rapaces e as rapazas do clube de lectura "Narrando con imaxes" fixeron esta mañá unha intervención nun espazo común do instituto para convocarnos ao resto da comunidade educativa á reflexión que encabeza esta entrada, reflexión motivada pola lectura e a posta en común da obra Subnormal, de Miguel Porto e Fernando Llor.  

Máis finormación e imaxes no blogue da biblioteca.

Parva, idiota, maricón, gordo, puta, marimacho, zombi, imbécil... subnormal! 

Subnormal, esta foi a lectura que este venres reuniu o alumnado que forma parte do clube "Narrando con imaxes". A obra, de Fernando Llor e Miguel Porto, baséase nas vivencias de Iñaki Zubizarreta, ex-xogador de baloncesto que cando tiña 11 anos sufriu acoso escolar, "ese monstro con cara de neno que estraga infancias, marca vidas e, nos casos máis extremos, chega a provocar que nenos de curta idade atenten contra si mesmos", tal e como afirma o protagonista no epílogo deste cómic.

Este libro xa esá dispoñible na nosa biblioteca para toda a comunidade educativa. Animámosvos a coñecer de primeira man as reflexións e a ollada dos rapaces e as rapazas do clube entrando no blogue da biblioteca.