Complementarias

Rematamos unha intensa semana de actividades coas charlas nas que onte e mais hoxe están a participar os alumnos e alumnas de 1º ESO no marco do programa "Efecto dominó. Entre ríos", unha iniciativa das Concellarías de Educación e Medio Ambiente acollida polo Departamento de Bioloxía e Xeoloxía do noso centro.

Aproveitando que o pasado 22 de marzo celebrouse o Día Mundial da Auga  iniciamos a campaña "Efecto Dominó, entre ríos", o alumnado de 1º ESO participa no deseño dos contidos dun material divulgativo e didáctico sobre valores ambientais dos espazos naturais que constitúen as ribeiras dos ríos Verdugo e Oitavén, que atravesan e dan vida ao noso concello.

Ao participaren no proxecto, os rapaces e as rapazas recuperan boas prácticas ambientais, poñen en valor os recursos medio ambientais e convértense en axentes sensibilizadores para achegar estes valores ao maior número de persoas.  

Nesta primeira sesión, o alumnado asistiu a unha charla preliminar para activar coñecementos xerais, que se completará cun roteiro de xornada completa polos ríos dende o centro ata a Presa do Inferno co obxectivo de coñecer o terreo e elaborar paneis de sensibilización.

Esta mañá estivo connosco Francisco J. Fraga López, Profesor Titular de Universidade da Área de Física Aplicada e Decano da Facultade de Ciencias de Lugo (USC), para impartir a charla "Nanotecnoloxía, realidade ou ficción?", para o alumnado de 1º BACH B, co obxectivo de dar a coñecer os campos de investigación que se están abrindo dende hai anos neste campo e como xa hai logros que mudarán aspectos básicos das nosas vidas.

Esta actividade foi organizada polos Departamentos de Orientación e Tecnoloxía no marco do programa A Ponte entre o ensino medio e a USC, promovido pola USC para achegar aos centros de ensino secundario o traballo que se desenvolve na universidade.

O pasado venres 5 de marzo o alumnado de 1º de Bacharelato asistiu a unha charla-obradoiro sobre Escaneado 3D de obxectos reais, impartida por Juan Pedro Ortíz Sanz, profesor de Enxeñería Agroforestal da USC no Campus Universitario de Lugo. Na parte teórica desta actividade, o profesor explicoulle aos rapaces e ás rapazas que os modelos 3D son figuras virtuais tridimensionais que representan un obxecto real e que se están empregando xa en múltiples campos como a medicina, arquitectura, videoxogos, ou no deporte. Na parte práctica, o alumnado utilizou unha aplicación gratuíta para móbiles coa que crearon un modelo en 3D dunhas cunchas de vieira, a partir de 10 fotografías tomadas por eles mesmos.

A actividade foi organizada polos Departamentos de Orientación e Tecnoloxía no marco do programa A Ponte entre o ensino medio e a USC, promovido pola USC para achegar aos centros de ensino secundario o traballo que se desenvolve na universidade.

O luns 22 de febreiro tivo lugar a derradeira charla impartida polo ponente do Banco de Santander, Juan Carlos Pérez Pazos, do programa "Finanzas para Mortais", ao alumnado de Economía de 4º ESO C.

Nesta ocasión faloulles dos préstamos e os créditos, de como manexar as tarxetas no estranxeiro e do destino que se lles pode dar aos aforros: depósitos, seguros, produtos de renda fixa como as Letras do Tesouro, Bonos e Obrigacións do Estado, e tamén dos produtos de renda variable, como as accións e os Fondos de investimento.

O alumnado participou activamente ao longo da sesión, preguntando as súas dúbidas e facendo as suas achegas. quedando moi satisfeitos tanto eles como o ponente. Ámbolos dous mostraron a súa intención de levar a cabo futuras colaboracións.

O programa encádrase no Plan de Emprendemento no Sistema Educativo Eduemprende, no que colaboran a Consellería de Educación, a Fundación da Universidade de Cantabria para o estudo e a investigación do sector financeiro (UCEIF) e o Banco Santander S. A.

Non esaxeramos nada se dicimos que esta mañá foron necesarias moitas mans de alumnos e alumnas de 2º de Bacharelato para repartir centos de mensaxes e cartas de amor polo centro.

O correo do amor fixo un grande traballo, moi dilixente, ben organizado e seguindo sempre as medidas de seguridade e hixiene que requiren estes tempos. Noraboa e grazas por encher os corredores e aulas de sorrisos e nervios, e moita alegría, que boa falta fai.