Complementarias

O pasado 16 de novembro puidemos volver gozar dunha das celebracións máis tradicionais do calendario festivo galego, o Magosto, que voltou ao noso centro dous anos despois coas castañas asadas, os xogos populares, a música popular e mesmo algún baile. Este ano contamos cun pasarrúas no que participaron Rebeca, Raúl, Noelia, Elisa e Marta. Ghaiteir@s!

Aínda que fose por un tempo moi limitado, e sempre cumprindo co protocolo COVID, o obxectivo era poder voltar a partillar dun momento de convivencia máis alá das aulas e os recreos, que boa falta fai.

Coma sempre, temos que agradecer a colaboración de Nati, a nosa castañeira, e de Luís, que nos achegou o tren-asador das castañas e tamén botou unha man no asado e reparto de castañas. Sen eles, e sen as familias que achegaron as castañas, non sería posible recuperar o magosto.

Moitas grazas!

Ver álbum de imaxes da cerimonia

Botamos o telón a unha etapa da nosa vida e comezamos outra nova, na que cada un de nós tomará rumbos diferentes. Espéranos un futuro cheo de erros pero tamén de acertos que nos farán madurar aínda máis e formarnos como futuros profesionais, lembrando sempre o aprendido, tanto dentro como fóra das aulas, polos profesores que nos acompañaron todos estes anos.
Hai uns meses desexábamos con forza que este curso rematase canto antes, sabendo o moito que botaríamos en falta as experiencias vividas. Hoxe estamos aquí, despedindo esta etapa con alegría á vez que con nostalxia por deixar atrás o instituto, o profesorado, compañeiros e compañeiras e, en moitos casos, a vila onde crecemos.
Unha gran parte da nosa vida quedará para sempre gardada nas nosas lembranzas, ao igual que as persoas que formaron parte dela.

Con estas palabras, a Promoción de Bacharelato 2019-2021 do IES de Soutomaior despediu o acto de graduación que tivo lugar este mércores, véspera do San Xoán, antes de prender o lume novo.

Despois dun curso tan esixente e difícil, aínda tiveron tempo para autoorganizar un acto, sinxelo, fermoso e emotivo, no que,  arroupados polas familias, o profesorado e o Concello na persoa do alcalde, puxeron un punto e seguido nas súas vidas.

Noraboa e moita sorte! O mundo é voso!

Os mozos e mozas dos clubs de lectura do centro avalían a experiencia e despídense ata o curso que vén. Agora tócalles gozar dunhas merecidas vacacións... e das lecturas do verán!

E lembremos que non hai mellor recomendación dun libro que a que fan os propios lectores, así que non deixedes visitar o blogue da biblioteca e de inculcar o hábito da lectura no seo das familias.

O pasado venres o alumnado de Bioloxía e Debuxo Artístico de 1º BACH A inaugurou inaugurou o mural “Vida Submarina”, realizado no marco do proxecto DepoRuarte da Deputación.

O acto contou coa presenza da deputada de Turismo e Xuventude, Ana Laura Igrexas, a Concelleira de Igualdade de Soutomaior, Cristina González, ademais da artista Laura Navarrete, que guiou o alumnado neste traballo. As alumnas Marta Alonso e María Orge tomaron a palabra en representación dos seus compañeiros e compañeiras, que traballaron arreo e moi ben en equipo durante varias sesións anteriores para rematar a obra. Podedes ver as imaxes do seu traballo aquí.

A actividade comezou o 25 de maio cunha charla ben interesante e dinámica sobre a vida submarina, que impartiu a bióloga e educadora ambiental Ana Vázquez. Baixo o obxectivo de concienciar o alumnado de que os océanos moven sistemas que fan que a Terra sexa habitable para a humanidade, tomamos en consideración que elementos como as precipitacións, a auga potable, o clima, o tempo, as costas e gran parte dos nosos alimentos e mesmo o osíxeno do aire que respiramos proveñen, en última instancia, do mar e son regulados por este. E todo isto non acontece lonxe de nós senón ao noso arredor, por iso a nosa convidada achegou o alumnado aos ecosistemas da nosa enseada ou das Illas Cíes.

Baixo o lema 'Pensando no 2030', o programa DepoRúarte céntrase na importancia do cambio climático no marco da Axenda 2030 e foi acollido no noso centro polas profesoras Beatriz Fervenza e Ana Aguiar, dos Departamentos de Bioloxía e Educación Plástica.

Logo do aprazamento desta saída, programada para finais de abril, os grupos de 1º ESO A e 1º ESO C puideron participar no roteiro da "Campaña efecto dominó, entre Ríos", que promoveu o Concello de Soutomaior en colaboración co Departamento de Bioloxía e Xeoloxía do noso centro.

Como xa fixeran antes os seus compañeiros de B e D, o alumnado puido coñecer e valorizar in situ os recursos ambientais dos espazos naturais que constitúen as ribeiras do Verdugo e do Oitavén da man das monitoras Carla e Nerea e acompañados polas profesoras Ana e Montse.

Máis imaxes nesta galería de fotos.