Skip to Content

Complementarias

Charla sobre o conflicto de Palestina no IES de Soutomaior

Xov, 06/06/2024 - 11:59 — admin

O xoves 30 de maio, a asociación Araguaney veu ao IES de Soutomaior a falar do conflicto entre Palestina e Israel. Esta foi unha charla organizada pola ANPA "Facendo Camiño" e levouse a cabo coa colaboración do Departamento de Filosofía.

Para poder explicar ben a situación na actualidade contamos con Sara Ashour, galega de orixe palestino que ten información de primeira man do día a día da xente que vive nestes momentos neste país de oriente medio. Por outra banda, Ana Rodrígues trouxo un breve documental que nos amosou imaxes da crudeza da guerra e de como os conflictos armados deixan as cidades completamente arrasadas e moitas víctimas e feridos.

Dende o centro queremos agradecer á ANPA por ofrecer unha actividade tan interesante que promove a reflexión e o pensamento crítico. Sempre cómpre animar á rapazada que busquen información contrastada para poder ter unha opinión independente e libre.

IV Campionato de Xadrez de Redondela Intercentros

Mar, 28/05/2024 - 13:38 — admin

O venres 24 de maio, unha selección de alumnado de 1º e 2º da ESO, pasou a mañá na alameda de Castelao de Redondela nunha saída organizada pola Biblioteca do IES de Soutomaior. A visita tivo como fin a participación no IV Campionato Intercentros de Redondela.

A xa tradicional competición favorece a competitividade nun deporte tan sano coma educativo así como a interacción con rapaces doutros centros.

O centro quere agradecer a Orlando Molareas e a Alicia Pazos a implicación na excursión.

O resto das imaxes pódense consultar premendo na seguinte ligazón: galería

O IES de soutomaior participa no Correlinguas

Mar, 28/05/2024 - 13:21 — admin

No contexto do Día das Letras Galegas, os tres grupos de 3º da ESO do IES de Soutomaior participaron nunha actividade Intercentros organizada pola OMIX do Concello de Soutomaior que tivo lugar o martes 21 de maio.

Os obxectivos principais da actividade foron, por uha banda, a celebración das letras Galegas defendendo a utilización da nosa lingua e, por outro lado, a participación conxunta de alumnado do IES de Soutomaior, o CPR Santiago Apóstolo e alumnado de infantil do EEI de Romariz favorecendo a cohexión entre a rapazada do Concello.

A actividade contou coa participación de Policía e Protección Civil que cortaron o tráfico para a realización da correlinguas/caminata ata o Pavillón da Montesiña. Xa alí o alumnado participou en varias actividades, recibiu un almorzo por parte da organización e puido disfrutar da actuación dun ilusionista.

Para ver o resto das imaxes da actividade hai que premer na seguinte ligazón: galería

III Feira da Ciencia de Soutomaior

Xov, 23/05/2024 - 13:01 — admin

 

Como colofón a todo o programa de Divulgaciencia organizado polo Concello de Soutomaior, o 13 de maio tivo lugar a III Feira da Ciencia na alameda de Talo Río.

O alumnado do centro que estivo interesado en participar na feira contou coa axuda dos departamentos de ciencias do instituto. Como froito do traballo realizado, o alumnado estivo en 6 postos explicando con paixón as características do seu proxecto a todo aquel que se achegaba amosando interese.

Durante a mañá, o alumnado de 1º da ESO achegouse á feira a ver os postos. Para facer a visita máis didáctica o Concello organizou de novo as visitas guiadas cunha recepción e unha pequena actividade. Dende o centro esperamos que esta visita favoreza a participación da rapazada en futuras feiras que se organicen.

Finalmente, o xurado puido valorar o gran traballo feito por tódolos grupos e tivo a dificil tarefa de escoller aos máis destacados para darlles os premios.

Dende o centro queremos dar a noraboa aos agraciados e agradecer a todo o alumnado e profesorado participante. Esperamos poder contar convosco a vindeira edición.

Para visualizar as imaxes do evento pódese acceder á galería  premendo nesta ligazón.

Semana das Letras Galegas no IES de Soutomaior

Mér, 15/05/2024 - 15:09 — admin

O Equipo de Dinamización da Lingua Galega organizou para o luns 13 e martes 14 de maio varias actividades no contexto das Letras Galegas, que este ano conmemora a vida e obra de Luisa Villalta.

O alumnado de 4ºESO e 1º de Bacharelato puido asistir a actuación de Paz Fernández  que consistiu nunha declamación poético-musical coa que o alumnado puido disfrutar dunha sesión de poesía en galego en directo.

Por outra banda, o martes tivo lugar un concerto onde houbo varias actuacións:

  • Participou o grupo Calimontxo no que a voz foi interpretada polo profesor de inglés Antonio Ricón.
  • Participaron varios alumnos e alumnas que interpretaron cancións tradicionais na nosa lingua.
  • Por último, o alumnado puido disfrutar da actuación de Myriam Cortizo Pires e Ariel García Tagliani.

O IES de Soutomaior agradece o gran traballo do EDLG con Antonio Ricón á cabeza e sobretodo, ao alumnado participante que co seu esforzo e gañas fan que estas actividades consigan ter a pegada que busca un centro educativo.

 

 

Obradoiros Divulgaciencia: Departamento de EPVA

Ven, 03/05/2024 - 13:34 — admin

Dentro do programa de Divulgaciencia e en colaboración co Departamento de EPVA, o Concello preparou dous obradoiros levados a cabo os dous na aula de Debuxo do IES de Soutomaior. Tamén foron preparados e presentados polo Divulgador científico David Ballesteros, sinónimo de garantía neste tipo de actividades.

O 19 de abril, o alumnado de 4º da ESO de Expresión artística puideron participar no obradoiro de "Arte, polímeros e NFC". Nel o alumnado puido ver e particiar en varias actividades nas que o arte e a ciencia van da man.

 

O martes 23 e mércores 24 de abril, o alumnado de 3º da ESO traballou no obradoiro de "Arte UV". Neste puideron coñecer un pouco máis en profundidade as características da luz así como as posibilidades artísticas dunha parte do espectro electromagnético: a luz ultravioleta.

Dende o centro agradecemos de novo á OMIX do Concello de Soutomaior a súa colaboración e ao Departamento de EPVA por promover e facilitar que este tipo de actividades poidan chegar ás aulas.

Obradoiros Divulgaciencia: Departamento de Tecnoloxía

Ven, 03/05/2024 - 13:20 — admin

O Concello de Soutomaior organizou dous Obradoiros solicitados polo Departamento de Tecnoloxía. Os dous foron deseñados e impartidos polo divulgador científico David Ballesteros que procurou en todo momento manter ao alumnado conectado con propostas moi interesantes e de actualidade.

O Obradoiro "Intelixencia artificial" levouse a cabo no Taller do IES de Soutomaior o martes 16 de abril e asistiu o alumnado de TIC de 1º de Bach e o alumnado de Dixitalización de 4º da ESO. Nel o alumnado puido utilizar programas de IA de actualidade vendo as súas posibilidades e descubrindo que o seu uso non é complicado.

 

O Obradoiro "Deseño de APPs" levouse a cabo no Taller o mércores 24 de abril.  Participaron nel o alumnado de 3º ESO B e 3º ESO C que imparten a materia de Educación Dixital.

Dende o centro non deixamos de agradecer ao Concello a colaboración á hora de presentar actividades moi enriquecedoras e atractivas para o alumnado. Tamén agradecemos ao Departamento de Tecnoloxía o seu entusiasmo por apoiar estas iniciativas.

 

Excursión ao Courel

Mar, 23/04/2024 - 13:19 — admin

Tódolos cursos o Equipo de Normalización da Lingua Galega do IES de Soutomaior organiza unha viaxe ao Courel dirixido ao alumnado de 2º da ESO.

Este ano, o alumnado que se apuntou á excursión, saiu o 3 de abril seguindo o seguinte programa: visita ás Médulas, Monte Furado, andaina pola Devesa da Rogueira, Mina da Toca, O Cebreiro e a cidade de Lugo. O alumnado e profesorado pernoctou dúas noites nos Bungalós do Acampamento do Courel.

Dende o centro queremos agradecer ao alumnado o seu bo comportamento en todo momento. Tamén agradecer especialmente a Lucía López e Gabriel Muñiz, os profesores acompañantes, por teren aceptado a responsabilidade de acompañar a todo o grupo.

Finalmente, agradecemento moi especial a Antonio Ricón Rodríguez, por organizar a viaxe.

As imaxes da excursión están colgadas na galería do instituto.

Excursión de fin de etapa a París

Mar, 23/04/2024 - 12:59 — admin

Este 2023/24, o alumnado de 4º ESO do IES de Soutomaior optou por realizar unha viaxe a París para celebrar que pronto terminarán os seus estudos da ESO.

Despois de estar dende principio de curso vendendo productos ofertados por distintas empresas para poder financiar esta excursión, 54 alumnos e alumnas partiron con catro profesores este 4 de abril cara o aeroporto de Oporto para comezar a súa aventura.

A viaxe, como todas as organizadas polo instituto, combinou actividades de ocio como o día en Eurodisney con outras máis culturais necesarias para coñecer un pouco da cultura e lugares de interese do país de destino.

 

Dende o centro queremos agradecer a boa comunicación coas familias e a súa colaboración en todo momento así como agradecer ao alumnado o seu bo comportamento en todo momento.

Tamén queremos agradecer a Lara Rodríguez Rodríguez, Orlando Molares Molares, Lucía Galván Fernández e Beatriz Díaz López por teren aceptado a gran responsabilidade de acompañar ao alumnado nunha viaxe a París, un lugar nada doado de xestionar. Moitas grazas.

As fotos que vaiamos conseguindo serán colgadas na galería do Instituto.

Saída do IES de Soutomaior a Santiago de Compostela

Xov, 18/04/2024 - 12:55 — admin

Despois da Semana Santa, o martes 2 de abril, o alumnado de 2º de bacharelato e de 4º ESO D, partiron cara Santiago dentro dunha actividade complementaria organizada de xeito coordinada polo Departamento de Matemáticas, Xeografía e Historia, Bioloxía e Xeoloxía e Lingua Castelá e Literatura.

O alumnado dividiuse en varios grupos, dependendo do seu itinerario académico, para facer as visitas máis apropiadas para os estudos cursados.

Un grupo visitou o CIMUS ( Centro Singular de Investigación en Medicina Molecular y Enfermedades Crónicas), outro acudiu a o IGE (Instituto Galego de Estatística) e un terceiro foi á Catedral de Santiago para ver o Pórtico da Gloria.

Por último, unha vez reunidos todos, completaron o día entrando á Catedral para ver os tellados da mesma e, pese ao mal tempo que fixo, puderon dar unha pequena volta pola zona vella compostelana.

Distribuir contido


by Dr. Radut