Complementarias

Non podemos esquecernos do Obradoiro de Regueifas ao que se anotaron alumnos e alumnas voluntarios de 2º ESO A, 2º ESO B e 2º ESO C.

O profesor convidado foi Luis "O Caruncho", gaiteiro, zanfonista, cantante e incluso aprendiz de actor. Sen dúbida todas estas dotes artísticas fan del un dos máis requeridos traballadores da música en Galiza. Leva anos dinamizando esta rica tradición oral nos medios, en escolas específicas e nos certames que se celebran a todos os niveis.

Este obradoiro organizado polo Equipo de Dinamización da Lingua Galega, grazas a un programa da Asociación Oral de Galicia de Valadares e a Deputación, tivo dúas partes. Na primeira (19 outubro)  participou todo o alumnado voluntario e na segunda (9 de novembro) xa participou únicamente alumnado seleccionado polo seu bo traballo na primera sesión.

Galería de fotos

Na segunda parte deste vídeo, o noso protagonista actúa en Villanueva de Tapia, municipio de Málaga xunto con arcadio Camano onde estableceron un duelo poético marabilloso, cada un na súa lingua e tonada diferente.

aaa

O mércores 22 de xuño despedimos o curso cunha xornada festiva e de convivencia entre o alumnado e o profesorado que se desenolveu entre o campo de fútbol e o centro.

Máis imaxes das actuacións de Acrosport aquí

O día comezou coa mostra de acrosport, actividade na que participaron os grupos de 1º, 3º e 4º da ESO que, despois de moitos días de preparación e ensaios coordinados por Modesto e Vanesa, realizaron os seus números para os seus compañeiros e compañeiras que os seguían dende as bancadas.

Máis imaxes do partido e o ambiente das bancadas aquí

Ao remate, foi a quenda do partido de fútbol amistoso, pero non por iso menos competitivo, entre unha selección de alumnado de 1º ESO e outra selección de profesores e profesoras. Brincos, caneos, carreiras, goles e moitos risos e ningunha lesión que lamentar, así que xa estamos para outra! 

Máis imaxes das actuacións musicais aquí

Finalmente, xa de volta no Instituto, Carla, Libertad e Uxía (2º ESO C) presentaron o festival musical que coordinou a profesora Paula. En primeiro lugar, actuou 4º ESO con tres cancións coñecidas e dous temas de composición propia.

A continuación, o grupo formado por Lucía (2º ESO A) e Joaquín, Gael, Chechu, Jesús e Breogán (2º ESO B) interpretaron un mix de cancións rockeiras, como "Zombie", de Cramberries, e "Soldadito marinero", de Fito, ademais doutras como "La Llorona". E xa con Lucía ao piano, chegou "Alive", de Sia, con Rui (2º ESO B), e "Lovely", de Billie Ellih. Por último, Leo Porto rapeou tres temas propios. 

Non queda máis que desexarvos un bo verán e que gocedes das vacacións. Vémonos en setembro!

Álbum de imaxes da Feira

Do 11 de febreiro ao 5 de maio o noso centro tivo a oportunidade de formar parte do proxecto Divulgaciencia, promovido pola OMIX e a Concellaría de Educación de Soutomaior e apoiado pola FECYT e o Ministerio de Ciencia e Innovación. Este programa educativo procura espertar a curiosidade pola ciencia e difundir contidos científico-tecnolóxicos usando unha metodoloxía dinámica, experimental e lúdica que motive a participación e interacción do alumnado e da poboación en xeral.

Ademais das actividades abertas a toda a veciñanza, os tres centros educativos do municipio acollemos unha serie de actividades formativas previas para o alumnado de diferentes cursos e para o profesorado:

• Xornada de formación para o profesorado con David Ballesteros (16-02-2022).
• Presentación do programa e mesa-coloquio “Vocacións científicas e novas profesións” (11-02-2022). 4º ESO e 1º BACH. C de BioXeo.
• Obradoiro “Investigando a natureza” para 1º ESO (06-04-2022).
• Obradoiro “Droneando” para 3º ESO (06 e 07-04-2022).
• Roteiros medioambientais “Soutomaior mira ao mar” para 4º ESO (19-04-2022).
• Roteiros medioambientais “Mergúllate no monte” para 1º ESO (19 e 21-04-2022).
• Roteiros medioambientais “Aventura ecolóxica” para 2º ESO (21 e 27-04-2022).

Durante todo ese tempo fóronse desenvolvendo diferentes proxectos no centro, coordinados por Lucía López, Menchu, Gabriel e Manuel Cuervo, e que foron presentados polos rapaces e as rapazas ante o alumnado do noso e doutros centros e ante as familias e as centos de persoas que ateigaron durante toda a xornada a carpa que acolleu a I Feira da Ciencia. O evento, que se desenvolveu o 5 de maio na Alameda Talo Río, mostrouse a aplicación práctica dos proxectos levados a cabo no centro e supuxo unha oportunidade extraordinaria como experiencia para o profesorado e un alumnado entusiasmado polo que tivo de motivador, de xornada de convivencia e de apoderamento do alumnado, que demostrou as súas habilidades comunicativas, como se pode ver na crónica fotográfica e mais na cobertura que fixo TV Soutomaior. Proxectos do centro:
- Invernadoiro con tensegridade.
- O lavado das mans protéxenos dos fungos que nos rodean?  Premio Revelación Secundaria.
- Foguete de bicarbonato. Premio Divulga ESO.
- Regulador de luz baseado en Arduino (Premio Innova).
- Proxector de hologramas. Premio Comunica.
- Vehículo con rodas “mecanum”. Premio Revelación Secundaria.
- Plastórganos.
- As augas do noso pobo: a auga é vida e a auga limpa é saúde. Premio Rigor Científico.
- Estudo da investigación sobre a situación da muller no mercado laboral no contorno do IES de Soutomaior. Premio Divulga BACH.

Así pois, cómpre felicitar á OMIX, Concellaría de EDucación e a Ceo Aberto por nos permitiren gozar desta experiencia e mais polo formato e a organización profesional do encontro, que vai ter unha moi agardada segunda edición no ano 2023. E, por suposto, hai que lle dar a noraboa ao profesorado e o alumnado participante polo traballo e os resultados acadados.

Máis imaxes das fases clasificatoria e final aquí

Marta, Sonia, Victoria, Brais e Rebeca participaron esta fin de semana na Fase Final do torneo de debate Parlamento Xove.

Nos cuartos de final tocoulles defender a postura a favor ante a pregunta "Debe a Unión Europea actuar militarmente en terceiros países na defensa dos dereitos humanos?" e, aínda que o debate foi gañado polo Colexio Peñarredonda, fixeron un bo papel, na liña das eliminatorias previas de marzo, cando se clasificaron en 4º lugar tras gañar os tres debates. 

Hoxe acudiron ao Parlamento de Galicia para presenciar as semifinais e finais das tres categorías (ESO, BACH e Universidade) e seguir aprendendo e compartindo esta experiencia con rapaces e rapazas de toda Galicia. 

Moitos parabéns! Estamos orgullosos/as do gran traballo que realizastes e do ben que representastes o noso centro. E tamén do compañeirismo e o apoio que destes ao equipo do Colexio Santiago Apóstol, que quedou 2º na categoría da ESO e gañou o Premio ao Mellor Artigo de Investigación. Noraboa a Iliana, Gabriel, María, Emilio e á súa profesora María Leal. Estivestes enormes!

Agradecemos tamén o apoio aos equipos de Soutomaior do deputado Manuel Lourenzo, que seguiu os debates no hemiciclo e participou na entrega de premios.