Complementarias

Unha selección de alumnado de 3º e 4º da ESO e 1º de Bacharelato tivo ocasión de participar no taller de teatro impartido no IES por Saida Rkiek Sghiar. Saida, veciña de Soutomaior, cursou estudos de Arte Dramática na Escola Superior de Arte Dramática de Vigo, e é directora de escena, actriz e autora de varios libros relacionados coa Arte Dramática.

A primeira xornada serviu de introdución teórica ao concepto de performance e rematou con prácticas e introdución a ferramentas básicas para preparar unha performance.

A segunda xornada foi adicada plenamente á interpretación, cunha actuación centrada no uso dos teléfonos móbiles, que pretende reflectir o "secuestro emocional" que estes ocasionan moitas veces, especialmente cando abusamos deles.

Na imaxe, o alumnado na súa representación "abducidos polos teléfonos móbiles".

Máis imaxes neste álbum

O pasado venres sumámonos a unha nova edición da campaña "Unha árbore por Europa" con motivo do Día Internacional do Medio Ambiente, que se celebra cada 5 de xuño dende 1972 co obxectivo de sensibilizar a sociedade na necesidade dun desenvolvemento sostible para o planeta. 

A nivel local, Soutomaior comprometeuse con outros municipios para, a través da plantación simbólica de árbores e plantas, visibilizar a importancia do desenvolvemento sostible no ámbito local e involucrar os mozos e as mozas nos procesos de toma de decisións en materia de sustentabilidade.

Neste acto, no que participou o alumnado de 2º ESO B, non só se plantou unha árbore senón varias: unha limeira, un framboeseiro e un aguacate. E, ademais, sementes de diversos tipos de flores. 

Haille que agradecer ao Concello, que estivo presente na figura do alcalde Agustín Reguera, a dotación destas novas árbores e plantas que van humanizando aos poucos, xunto con outras plantacións anteriores, a contorna do edificio. E, como non, dámoslle as grazas a José, o mestre composteiro, por dirixir os traballos; á OMIX e ao Departamento de Bioloxía por organizalo; e, por suposto, os rapaces e as rapazas que se involucraron na actividade.

Máis imaxes da xornada neste álbum fotográfico. 

   Alumnado de 1º e 2º de ESO acudiu á Alameda Castelao de Redondela para participar este vernes 20 de maio, no II Torneo de Xadrez Intercentros.

   Un total de 80 participantes de distintos centros da zona: os IES Mendiño, Floriani e Chapela; e os CEIP Santa Mariña, Cesantes, Quintela e Igrexa Chapela.

   Hai que destacar o carácter eminemente lúdico e educativo do torneo, que pretendía servir de iniciación e animar á práctica do xadrez, á marxe do resultado. Esto foi así, especialmente no caso do noso IES, no que acudimos cunha equipa pouco experimentada, que xogaban o seu primeiro torneo, coa premisa de pasalo ben e seguir aprendendo. A equipa formouse con alumnado que acudiu durante o curso a xogar os mércores á biblioteca. Ademais dos que puderon asistir nesta ocasión, hai outros alumnos/as que xogan ou queren aprender a xogar ao xadrez, polo que esperamos que este xerme vaia a máis.

   Ao rematar a actividade, entregáronse trofeos aos 3 primeiros alumnos/as clasificados e medallas a todos os participantes, e o Maestro FIDE  Xulio del Prado (de tan só 15 anos) deu unha pequena charla.

   Temos que destacar e agradecer a boa organización do torneo, a cargo da Concellería de Deportes de Redondela e o IES Pedro Floriani.

O próximo martes 24 de maio terá lugar a última sesión da Escola de Familias de Soutomaior deste curso. A cita será ás 18:30 na Aula de Usos Múltiples do IES e está aberta a todas as familias que se inscriban a través deste formulario.

Contidos: “Boyhood. Momentos dunha vida” (o cinema como experiencia de aprendizaxe).

Previamente, facilitarase o acceso ao filme para as familias inscritas para que poidan visionalo para esta sesión. Durante a sesión, traballarase sobre a evolución das vivencias dunha familia e os seus compoñentes ao longo dos anos.

O venres 13 foi o día grande da Semana das Letras Galegas no instituto e houbo actividades para todos os niveis, como a representación teatral e a proxección cinematógrafica ás que asistiron os 3 primeiros cursos da ESO. 

Máis imaxes neste álbum

O alumnado de 2º ESO representou unhas breves pezas teatrais para os compañeiros e compañeiras de 1º ESO. A representación de clásicos da literatura infantil, de fábulas grecolatinas ou doutras pezas menos coñecidas fixéronnos pasar un bo momento no que non faltaron xiros sorprendentes e humorísticos que arrincaron risos e aplausos do publico. Cone sta posta en escena, o alumnado de 2º ESO púxolle o ramo a semanas de traballo en Educación Física co seu mestre José Luís.

Mentres, nunha aula de música reconvertida en sala de cinema, 3º ESO asistiu á proxección do filme Cuñados, ópera prima de Toño López protagonizada por Federico Pérez, Miguel de Lira e Xosé Touriñán e recoñecidas actrices como María Vázquez, Mela Casal, Iolanda Muíños e Eva Fernández. As disparatadas ocorrencias deste trío de grandes cómicos e actores galegos provocaron as gargalladas do alumnado e demostraron que a comedia é máis necesaria ca nunca. A alumna Marta Alonso fixo unha reseña sobre a película, que podedes escoitar aquí.