O pasado martes o alumnado de 1º ESO participou nun roteiro medioambiental polas ribeiras dos ríos Verdugo e Oitavén, que vén dar continuidade ás actividades de coñecemento da nosa contorna que organizan a Concellería de Educación e a OMIX de Soutomaior en colaboración co Departamento de Bioloxía do IES.
O tempo acompañou nunha xornada que comezou na Ponte da Comboa e rematou na Ponte Colgante. Acompañados dos monitores e do profesorado, os rapaces e rapazas coñeceron máis polo miúdo as plantas e as árbores típicas dos bosques de ribeira mais tamén puideron observar en primeira persoa o impacto das especies invasoras pero tamén da contaminación que se fai visible por medio de numerosos refugallos (envases, latas, cabichas, microplásticos...) dos que nós somos responsables directos.
