IES Ramón Otero Pedrayo

ENCONTRO INTERCENTROS DE ATLETISMO

Gran campionato do noso alumnado no Encontro Intercentros de Atletismo, celebrado o pasado venres en Expourense.

Non acadamos a victoria na clasificacación xeral, pero competimos moi ben, destacando no relevo mixto onde, empezando de últimos, fomos remontando ata acadar a victoria final nunha emocionantísima carreira.

Que gran experiencia de convivencia deportiva para o noso alumnado!

IES OTERO PEDRAYO. ENSINO PÚBLICO. ENSINO DE CALIDADE

25N. DÍA INTERNACIONAL CONTRA A VIOLENCIA CARA A MULLER

Despois dunha intensa semana de actividades contra a violencia, no día de hoxe, 25 de novembro, visibilizamos a conmemoración coa colocación da pancarta na fachada exterior e coa lectura do manifesto e de textos de distintas tipoloxías, sempre co "Pano corado" das Tanxugueiras de fondo. O equipo da Biblioteca, de Normalización Lingüística, de Orientación e o resto dos departamentos colaboraron na confección destas V Xornadas contra a violencia.

Todo é pouco para concienciar, educar, sensibilizar, previr, visibilizar... sobre un tema tan preocupante como este da violencia de xénero. A próxima semana, seguimos!

IES OTERO PEDRAYO. ENSINO PÚBLICO. ENSINO DE CALIDADE.

25N. NON CALAR, de Trécola Teatro

Nas xornadas contra a violencia do Otero Pedrayo, sempre ten cabida o teatro. Este ano, grazas á Concellaría de Igualdade, o alumnado de 1º BAC puido asistir a unha fantástica proposta de Trécola Teatro, centrada en diferentes sketchs relacionados con xénero e un fructífero debate no que o noso alumnado mostrou dúbidas, inquedanzas, diferentes puntos de vista...

Que necesarias son estas propostas! No Otero Pedrayo, non calamos.

IES OTERO PEDRAYO. ENSINO PÚBLICO. ENSINO DE CALIDADE.

25N. A VIOLENCIA DE XÉNERO NA PUBLICIDADE E NOS MASS-MEDIA

Dentro das xornadas contra a violencia que se están a desenvolver no Otero Pedrayo, o alumnado de 2º e 3º da ESO centrouse onte na análise da violencia na publicidade e nos medios de comunicación social.

Gela G. Sánchez-Albornoz, consultora de xénero e políticas de igualdade, amosou a visión estereotipada que a publicidade e os medios de comunicación nos transmite sobre os roles dos homes e das mulleres: a cousificación de ambos xéneros, as cualidades que se esperan de ambos, os estereotipos na música adolescente e a victimización excesiva da muller nas noticias.

A continuación, o alumnado de 3º ESO espuxo o resultado dun traballo de investigación que viña desenvolvendo desde semanas atrás, impulsado desde a Biblioteca, centrado no tratamento da violencia cara as mulleres na prensa escrita. Analizaron os xornais do último mes, seleccionaron aquelas novas que tiñan enfoques machistas, refixéronas e espuxeron os resultados nun panel que logo lle comentaron ao seu alumnado. Foi un súper traballazo! Porque o tema merece todos os esforzos e máis...

IES OTERO PEDRAYO. ENSINO PÚBLICO. ENSINO DE CALIDADE.

22 de NOVEMBRO: DÍA DOS MÚSICOS E MÚSICAS

Hoxe celebramos e pomos en valor as músicas galegas a través da exposición de Laura Romero "As nosas músicas falan galego". Laura Romero é licenciada en Belas Artes e excelente música, baixista do grupo Zënzar, que despois de un ano de concertos e festivais co seu grupo, decatouse da escasa presenza de mulleres en bandas de música. Foi por isto polo que decidiu pór en marcha un proxecto de músicas galegas ilustradas, para dalas a coñecer e crear referentes para a nosa mocidade.

A proposta que trae aos centros de músicas e debuxo delas en directo é espectacular, así como a exposición coa que agasalla e vos mostramos nas fotografías. Con ela celebramos este día. Grazas, Laura Romero.

Actividade enmarcada dentro do programa "Donas de si".

IES OTERO PEDRAYO. ENSINO PÚBLICO. ENSINO DE CALIDADE.

25N. O URBANISMO DESDE UNHA PERSPECTIVA DE XÉNERO

Hoxe comezamos no Otero Pedrayo as VI Xornadas contra a violencia, co gallo do 25N, Día Internacional contra a violencia de xénero cara a muller, e non o puidemos facer de mellor xeito que cun obradoiro sobre urbanismo e xénero.

É a nosa cidade un eSpazo pensado para as mulleres? Para a muller-nai, para a muller-filla, para a muller-moza? Hai espazos de lecer, parques, espazos peonís, pista ciclables ou é un urbanismo que prioriza os coches ou outros elementos antes cás persoas? Vós, como habitantes, que mellorariades?

Sobre todo isto reflexionou e traballou o noso alumnado de 4º ESO hoxe, grazas ao bo facer de Begoña Garrido, do equipo de Xeitura Cooperativa, a través do Proxecto de innovación educativa Proxecta Terra.

IES OTERO PEDRAYO. ENSINO PÚBLICO. ENSINO DE CALIDADE.

MAGOSTO 2022

As castañas, os bolos preñados e os xogos populares non poden faltar nun bo magosto e, desde logo, que non o fixeron no do Otero Pedrayo.

O alumnado gozou da mañá solleira de hoxe participando nas diferentes eliminatorias de brilé, soga-tira, pano e carreiras de relevos, repondo forzas cun bocata de chourizo e unhas boas castañas.

Grazas ao Departamento de Educación Física pola magnífica organización.

Magosto, festa de noso!

IES OTERO PEDRAYO. ENSINO PÚBLICO. ENSINO DE CALIDADE.

PREMIO ANUAL OTERO PEDRAYO

Volvemos co Premio Anual Otero Pedrayo para estudantes de ESO e Bacharelato, que conta co apoio da Secretaría Xeral de Política Lingüística da Xunta de Galicia.

Por segundo ano consecutivo e esperemos que por moitos anos máis, convócase este premio escolar.

A idea é difundir a personalidade de don Ramón entre os máis novos, de xeito que profundicen na vida e obra do escritor.

Queres saber máis? Segue lendo!

Poderá participar calquera estudante ou grupo de estudantes de Educación Secundaria Obrigatoria ou Bacharelato, matriculados en calquera centro de Galicia no presente curso académico (2022-2023).

Os traballos deberán estar centrados na vida ou obra de Ramón Otero Pedrayo: pódese analizar unha obra concreta de Don Ramón, "imitar" o seu estilo para unha obra escrita, teatralizar algunha das súas novelas nun pequeno vídeo, realizar un traballo artístico inspirado na figura do Patriarca das Letras Galegas... Podedes sorprender ao xurado

O premio individual consistirá nun ordenador portátil

O premio de grupo consistirá nunha viaxe de estudos dunha xornada de duración, na que se abordarán contidos relacionados coa Xeración Nós e na que participará o grupo-aula gañador e ata tres docentes que colaborasen con este

Ademais, o profesorado, en representación dos centros premiados, recollerá unha colección de libros para a biblioteca do centro e un diploma acreditativo.

O prazo de presentación remata o 20 de febreiro de 2023