IES Ramón Otero Pedrayo

A través de APES (Asociación para a prevención e educación social) o alumnado de 1º ESO puido asistir esta semana a unha charla impartida por catro persoas reclusas do cárcere de Pereiro na que se falou sobre a importancia do voluntariado como alternativa para favorecer o desenvolvemento e as relacións sociais, desde unha visión positiva e comprometida coa comunidade. Ademais, tamén se insistiu en como o voluntariado é unha ferrramenta eficaz para previr a aparición de condutas de risco, ao mesmo tempo que fomenta hábitos positivos nas persoas. Charla impactante e moi, moi necesaria.

Se o club de lectura de adultos foi un éxito, o dos máis pequerrechos aínda o superou! O alumnado de 1º ESO escolleu a Harry Potter para este primeiro trimestre e supuxo que todos e todas nos trasladaramos a Hogwarts. Non faltou o director do centro, nin profes, nin experimentos de maxia, nin corvos nin bruxas...

Foi unha experiencia ben chula que se completará a vindeira semana co visionado do filme.

Onte á tardiña, xuntabámonos na biblioteca do Otero Pedrayo nais, pais, profes e as nosas amigas-convidadas da Cruz Vermella de Ourense, co escritor JUAN TALLÓN. Pasamos un anaco ben agradable conversando sobre a súa novela REWIND, tan magnífica como sobrecolledora.

A experiencia non puido ser máis positiva e Tallón non puido ser máis próximo, encantador e humilde. Que gusto contar na nosa cidade con escritores da talla literaria e humana de Juan Tallón! Mil grazas por acompañarnos. Todo un luxo para o Otero Pedrayo.

 

Gran campionato do noso alumnado no Encontro Intercentros de Atletismo, celebrado o pasado venres en Expourense.

Non acadamos a victoria na clasificacación xeral, pero competimos moi ben, destacando no relevo mixto onde, empezando de últimos, fomos remontando ata acadar a victoria final nunha emocionantísima carreira.

Que gran experiencia de convivencia deportiva para o noso alumnado!

 

Despois dunha intensa semana de actividades contra a violencia, no día de hoxe, 25 de novembro, visibilizamos a conmemoración coa colocación da pancarta na fachada exterior e coa lectura do manifesto e de textos de distintas tipoloxías, sempre co "Pano corado" das Tanxugueiras de fondo. O equipo da Biblioteca, de Normalización Lingüística, de Orientación e o resto dos departamentos colaboraron na confección destas V Xornadas contra a violencia.

Todo é pouco para concienciar, educar, sensibilizar, previr, visibilizar... sobre un tema tan preocupante como este da violencia de xénero. A próxima semana, seguimos!