Proxecto dinamización

Este curso 2021-2022 o IES de Valga participou no proxecto Fitofaladoiro, dentro dos programas Proxecta +. O proxecto comezouse no mes de outubro de 2021.
Os obxectivos principais era, como primeiro e máis importante, recoller o sabor popular sobre as especies vexetais máis comúns no noso concello. Cremos que en liñas xerais cumprimos, aínda que si que nos gustaría sinalar que esperabamos máis cantidade e diversidade de plantas.
O feito de traballar na clase temas transversais referidas á biodiversidade e o patrimonio cultural do concello fixo, efectivamente, que  o alumando e as súas familias puxesen en valor o feito de coñecelo, e moitas veces, que se sentisen orgullosas de ter ese coñecemento adquirido xeración tras xeración. Ademais, como para obter a información o alumnado tivo que requirir a axuda das súas familias, nomeadamente dos seus avós e avoas, serviron de cadea de transmisión do saber etnográfico, do propio léxico e do saber popular, e estamos convencidas/os de que serviron tamén como reforzo das propias relacións entre alumando e familias.
Todo isto favoreceu que o alumnado e as súas familias puxesen en valor a lingua galega, maioritaria no noso concello. É verdade que aínda que sexa maioritaria sufre moita veces un desprestixio inherente e moi profundo na xente que a fala, sobre todo nos máis maiores; porén, actividades como as que realizamos axudan a normalizar o uso da nosa lingua mesmo nos ámbitos científicos, e a recoñecer as variantes léxicas e dialectais non coma un defecto senón coma un valor e un enriquecemento en si mesmo.
Para finalizar temos que dicir que estamos un chisco decepcionad@s por non poder desenvolver completamente o obxectivo de dar a coñecer os resultados do noso proxecto tal como quixeramos. É verdade que no ámbito do centro si que se puido facer, ao termos realizado unha exposición con varias plantas coa súa correspondente ficha na Biblioteca, pero gustaríanos poder ter realizado outra no auditorio de Valga e ademais poder dar a coñecer o proxecto nas RRSS e en internet. Agardamos, porén, poder facelo a principio do curso 2022-23.

O día 20 de maio celebramos a X edición de “Bota unha Carreira pola Lingua” na que participaron tódolos centros educativos do concello de Valga. Antes da carreira e no patio cuberto do instituto celebrouse un acto no que interviron o alcalde, José María Bello Maneiro, o director do noso centro, Eliseu Mera así como alumnado dos tres centros educativos participantes.

Unha vez rematadas as intervencións foi o momento de botar a carreira a prol da lingua. Os corredores tomaron realizaron un percorrido de seis quilómetros que os levou polo Carballiño, Sixto, Senín, Outeiro, estrada da Bouza, Avenida Bella Otero e regreso ao IES, onde se entregaron as medallas aos gañadores nas diferentes modalidades (Primaria, ESO, Bacharelato e adultos).

Para concluír a xornada tivo lugar unha actuación de Lois Pérez, que ofreceu un espectáculo que combinou música, poesía recitada e contos.

Máis información picando neste enlace.

O Equipo de Dinamización Lingüística do noso  Centro celebrou o Día de Rosalía de Castro. Durante a mañá do mércores 23 de febreiro conmemoramos unha das datas sinaladas para a Lingua e Literatura Galegas. Foi a través de dúas actividades: "Rosalía con megáfono" e un "taller de danza". Na primeira delas, e durante os dous recreos, alumnado da ESO leu co "megáfono poético" poemas de escritoras galegas como Emma Couceiro, Estíbaliz Espinosa, Olga Novo,  entre outras.  Na segunda, Artur Puga, bailarín e integrante do corpo de baile de Tanxugueiras, impartiu un taller de baile coa coreografía de "Terra"; nesta actividade participou alumnado dos diferentes cursos da ESO e Bacharelato. A actividade dos recreos foi amenizada polo alumnado de Música, dirixidos polo mestre Manuel Villar.