En setembro, dous profesores do centro, José Luis Martín e Ana Belén Blanco, tivemos a oportunidade de visitar o Liceum Tadeusza Kosciuski da vila de Mysłowice, pertiño de Katowice, e non lonxe de Cracovia.
É unha rexión ben interesante dun país cunha rica historia e unha interesante cultura.
Mysłowice é unha vila máis ben pequena, e o instituto visitado ten alumnado equivalente aos nosos niveis de 3º de ESO a 2º de Bacharelato. A súa sede atópase nun bonito edificio histórico, a escola ten máis de 100 anos de historia (non sempre co mesmo nome) e varios ex-alumnos que son notables personalidades da ciencia ou da cultura da rexión ou mesmo do país.
En cinco días puidemos intercambiar ideas e experiencias co profesorado, observar a súa práctica didáctica e conversar acerca da estrutura do sistema educativo en Polonia, mesmo en español, xa que esta é unha das linguas estranxeiras ofertadas na escola, por certo con bastante éxito.
Asistimos a diferentes clases de múltiples disciplinas (historia, música, matemáticas, química, lingua, bioloxía, informática, robótica...) e observamos a organización dos cursos e grupos, a utilización de material didáctico e a implicación do alumnado nas aulas.
Incluso, a profesora Ana Belén Blanco puido visitar algunha clase na escola de primaria que se atopa xusto fronte a este Liceo.
Tamén puidemos presentarlle a diferentes grupos como é o noso país, a nosa cidade e a nosa escola. Bastantes alumnas e alumnos amosaron interese pola nosa visita, fixéronnos preguntas sobre Galicia e sobre o noso alumnado e tamén nos explicaron algúns proxectos que desenvolve a escola e que resultan moi interesantes.
Foi unha experiencia enriquecedora, e ogallá que dea froito a unha cooperación máis fonda, e mesmo, por que non, a un futuro intercambio de alumnado.
