Marimbas, odaikos, tambores, botellas, música clásica, música oriental, pero sobre todo risas moitas risas. O concerto estaba cheo e os músicos ían disfrazados de sevillanos, de brasileiros, de personaxes do Rei León, de militares... Viaxamos por moitos lugares: País Vasco, Madrid, Sevilla, Galicia ... polo Circo do Sol . Ao final acabaron dicindo os seus nomes. Chamábanse Juan, Félix, Antonio e Francisco. Foi todo ben divertido.
O equipo da biblioteca do CPI Virxe da Saleta propón aos alumnos do centro e as súas familias unha actividade para fomentar a lectura na nosa comunidade escolar e ao mesmo tempo conmemorar o Día do Libro, que se celebrará o vindeiro mércores 23 de abril. A actividade consiste en que os rapaces acheguen ao centro unha fotografía na que saian eles lendo xunto con alguén da súa familia (pai/nai, avós, irmáns...). As fotos enviaranse a ticscea@gmail.com, ou copiaranse nun pendrive e entregaránselle ao encargado da biblioteca ata o venres día 11 de abril. Unha vez recopiladas todas as fotos, estas exporanse na biblioteca en diversos formatos.
Na xornada do mércores 26 de marzo o alumnado de segundo e terceiro ciclo de primaria acudiron a Amoeiro para participar no encontro de fútbol sala escolar dentro do programa Xogade da Xunta de Galicia. Celebráronse cinco partidos entre os equipos de Amoeiro, Carballiño, Cambeo e Cea. Aquí vos deixamos unha galería de imaxes que ilustran esta xornada de convivencia entre o alumnado da zona.
O Departamento de Orientación do C.P.I. Virxe da Saleta, en colaboración cos Concellos de San Cristovo de Cea e de Piñor organiza un ano máis, e xa van cinco, as Xornadas de Orientación Académica e Profesional, destinadas ao alumnado da E.S.O. e aos seus pais.
A primeira xornada será xoves 3 de abril ás 15:30 h., centrada no bacharelato e na universidade e contará coa participación dos seguintes relatores: Francisco José Fraga Civeira licenciado en Dereito e Alcalde de Piñor, José Villanueva Lamas médico pediatra, Mª Dolores Vázquez Meiriño licenciada en Administración e Dirección de Empresas e xestora de empresas en Nova Galicia Banco, Manuel Jesús Pérez Rodríguez arquitecto técnico e Técnico Superior en Prevención de Riscos Laborais, Borja Moral Urosa diplomado en Traballo Social e Licenciado en Psicopedagoxía e Esther Nogueira López Diplomada en Maxisterio e Profesora de adultos e Educadora do Concello de Piñor.
O segunda e derradeira xornada será o martes 8 de abril a partir das 15:30 h. e tratará sobre Formación Profesional e Mundo Laboral, coa participación dos seguintes relatores: Juan Manuel MuñozVázquez cociñeiro e xerente do Restaurante Ateneo, Ana Beatriz Doval Estévez Garda Civil de San Cristovo de Cea, Rosana Bernárdez Peña diplomada en Educación Social, Licenciada en Psicopedagoxía e xerente da Empresa Serviturcea. Jorge García Fernández xefe de Brigada da Xunta de Galicia, Ángel Otero Castro técnico en carrozaría e operario en Chapistería e Servicios Grúas Otero, Modesto Ramos Fernández técnico en Fontanería, Mantemento de Instalacións Térmicas e Instalador de gas, Empregado da empresa Ángel Ramos.
O mércores día 12 de marzo, os nenos e nenas de 3º e 4º de Primaria fomos á serra da Martiñá. Fixemos un pequeno traxecto en autobús e despois comezamos a camiñar hacia o cume do monte. Iamos acompañados dos nosos titores e dous representantes da Consellería de Medio Rural, que nos ían ensinando os nomes das plantas que iamos atopando durante o camiño. Fixemos uns buracos para plantar uns castiñeiros e seguimos camiñando ata preto do cume da montaña. Sucedéronnos algunhas anécdotas coma atopar unha vaca perdida no monte, algúns beberon nun regato, vimos unha miñoca branca… Fixemos un gran percorrido pero…PASÁMOLO BEN!
Velaquí aos quince alumnos de 5º e 6º de primaria que durante este curso 2013/2014 están a colaborar de forma voluntaria coa biblioteca escolar do CPI Virxe da Saleta de Cea. O grupo está integrado por once alumnos de 6º (Xosé, Carla, Fabio, Vanesa, Laura, Andrea, Santi, Alba, Alicia García, Álex, e Gisela) e por catro de 5º (Xiana, Rocío, Sara e Alicia Nogueira). Estes quince voluntarios agrúpanse en 3 equipos de 5 alumnos cada un e, unha vez á semana, traballan baixo a tutela de Mercedes, a titora de sexto, en tarefas tan diversas como: ordenar fondos, colocación das etiquetas no lombo, deseñar logos e lemas para as diversas actividades de dinamización da lectura, organizar a biblioteca, etc.
Que divertidos son os instrumentos de madeira. Con eles facemos ritmos rápidos e teñen ese timbre tan caribeño que nos encanta. As claves parécennos salchichas, pero xa sabemos como se colocan as mans para que sonen ben. As caixas chinesas recórdannos polo seu nome, a China. As maracas facémolas sonar ao ritmo de "patacas mamá" como fixemos no entroido. O güiro parece un peixe e as castañolas unhas castañas.
Chegou a quenda da percusión de parche. Explicamos a familia, o nome de cada un dos instrumentos, a técnica para tocalos e por suposto tocamos e escoitamos o seu son. Queremos compartir con vós na rede as fotos que fixemos para lembrarnos deles. O bombo, que é o máis grave da familia, o timbal é o seguinte, o tambor o máis famoso de todos, a pandeireta que tamén ten metal, o pandeiro é o amigo da pandeireta pero non ten ferreñas, os bongos que se tocan coas mans e a caixa que se toca coas baquetas da batería.
Presentámosvos unha nova actividade escolar no noso centro. O alumnado de 6º de primaria, entre outras responsabilidades, fixéronse cargo de compoñer músicas para a aplicación de contos que estamos a crear: Applícate o conto. Fixemos un traballo de documentación previo, na aula, escoitando e analizando as melodías de inicio de diferentes aplicacións de xogos: angry birds, candy crash, pou. Despois, na aula de sexto, organizamos un calendario de quendas para poder usar o teclado e explorar os diferentes timbres que ofrecía. Coa consigna de crear uns tonos breves (non máis de dez segundos) preparamos as composicións transcribíndoas na partitura e o 11 de marzo realizamos a gravación na aula de música. Foron os propios alumnos e alumnas os encargados de interpretar así como de actuar como técnicos no proceso de gravación. Queremos compartir con vós o noso traballo. Se consultades dende móbil precisades a aplicación soundcloud para android ou IOS para escoitalo, e despois picar na seguinte ligazón: Creando tonos para a aplicación.
Hoxe en clase de plástica estivemos traballando caras de emocións. A actividade consistiu en facer moitas caras diferentes e sacarlles fotos. Coas fotos fixemos un collage. Tamén aprendimos como se utilizan as cámaras: o encadre, o primeiro plano, a luz, como se descargan as fotos no ordenador, o enfoque, etc.
Velaquí aos quince alumnos de 5º e 6º de primaria que durante este curso 2013/2014 están a colaborar de forma voluntaria coa biblioteca escolar do CPI Virxe da Saleta de Cea. O grupo está integrado por once alumnos de 6º (Xosé, Carla, Fabio, Vanesa, Laura, Andrea, Santi, Alba, Alicia García, Álex, e Gisela) e por catro de 5º (Xiana, Rocío, Sara e Alicia Nogueira). Estes quince voluntarios agrúpanse en 3 equipos de 5 alumnos cada un e, unha vez á semana, traballan baixo a tutela de Mercedes, a titora de sexto, en tarefas tan diversas como: ordenar fondos, colocación das etiquetas no lombo, deseñar logos e lemas para as diversas actividades de dinamización da lectura, organizar a biblioteca, etc.
