CEIP de San Clodio

Estes días andamos que non damos feito: que se o Magosto, o Samaín, contadas, obradoiros de expresión corporal e artística...

O pasado venres, 5 de outubro na última sesión da mañá acudimos á biblioteca do centro para participar nunha actividade de animación á lectura que tiña como eixo central as historias de medo. Suevia, de Infantil; tódolos alumnos do primeiro grupo, así como o director, Manuel contáronnos historias verdadeiramente terroríficas que nos fixeron estremecer co medo. Antes de esta actividade e para ir entrando en materia inauguramos a exposición de cabazas que fixemos coa profesora Lucía.

Ese mesmo día, pero xa pola tarde, no patio do colexio participamos en diferentes actividades lúdicas que tiñan como nexo común as castañas: bailes e xogos como "Na procura da castaña" axudáronnos a facer un oco no estómago para logo dar boa conta de castañas asadas regadas con batidos de chocolate.

E para completar este abano tan grade de actividades, este luns visitounos no colexio, tal e como estaba anunciado nesta mesma páxina web, o artista fonsagradino Xoán Curiel acompañado da súa inseparable guitarra. Xoán fíxonos pasar un anaco ben divertido realizando actividades musicais e de expresión corporal.

O pasado mércores, 20 de outubro tivemos que madrugar unha chisquiña máis do habitual (ben, houbo quen incluso non conseguíu conciliar correctamente o sono pola emoción) xa que nos desprazamos ata o parque "Marcelle Natureza", que se atopa en San Martín de Guillar no Concello limítrofe a Lugo de Outeiro de Rei. Algúns de nós xa coñeciamos as instalacións e incluso a moitos dos animais que as habitan á beira do Miño no seu curso alto, pero aínda coñecendo é todo sempre é emocionante, divertido e instructivo darse unha volta polo lugar para recoñecer ou coñecer animais como o porco vietnamita (que algún de nós se empeñou en rebautizalo como "dinamita"), a pita de auga ou a arrepiante pitón, unha serpe enorme que metía medo mirar para ela. Se queredes saber máis sobre o parque de Natureza "Marcelle" podedes picar no seguinte enlace.

Xa pola tarde, logo de encher o bandullo e de baixar a comida nun recinto de xogos que había en "Marcelle" collimos de novo o autobús para ir á capital da provincia. Non houbo que andar moito pois, como xa dixen, Outeiro de Rei está pretiño. En Lugo visitamos unha exposición de arte titulada Miradas. "Realidades, expresións, tramas" que se mostra na Sala de Exposicións do Centro Sociocultural Caixa Galicia. Alí, unha monitora moi instruida e amable chamada Ruth mostrounos diferentes obras de autores galegos como Caxigueiro, de Mondoñedo ou Roberto González, de Monforte de Lemos e iniciamos un obradoiro de arte que, pola falta de tempo non poidemos rematar alí pero trouxemos os materiais para continuar traballando no colexio. Para saber máis sobre a exposición que visitamos poder premer neste enlace.

Dentro de pouco abriremos unha nova galería coas fotografías que sacamos nestra viaxe tan instructiva.