O alumnado de 2º da E.S.O., en concreto o grupo D, participou o pasado venres, 3 de febreiro, nunha experiencia gastronómica organizada polo Departamento de Inglés.
A idea partiu do propio alumnado que, logo de ver un vídeo sobre a comida do futuro no que aparecían diferentes produtos alimentarios como algas, comida impresa en 3D, carne producida no laboratorio a partir de células nai e insectos, propuxeron unha cata de insectos.
A cata consistiu en 3 produtos elaborados con insectos: grilos bañados en chocolate, chips de grilo con sabor a allo e sementes con froitas e vermes da fariña.
Trala cata o alumnado cubriu unha enquisa da que se tiraron as conclusións que se amosan na gráfica.
Sen dúbida, a cata de insectos foi unha experiencia gastronómica atípica. Porén, non foi de todo mal tal e como reflicten os datos. O alumnado animouse a probar os produtos nos que os insectos non eran visibles. De feito, a semente con froitos e vermes só foi probada por unha valente alumna que dixo que estaban "boísimos".
O factor asco ou ick factor está moi presente na nosa cultura. Pero, comerán os descendentes deste alumnado estes produtos no futuro?
Quen sabe. O que é seguro é que os insectos son unha fonte de proteínas barata e ecolóxica que xa está presente en moitos países.
O tempo dirá se a cultura occidental acabará por incluír estes animaliños na nosa dieta.
Pica na foto para ver o álbum
Álbum: Actividades -> A comida do futuro
