3.2.4 Avaliación e cualificación

Avaliación dos desempeños nas tarefas.

A titoría avaliará os desempeños mediante indicadores e determinando se os participantes os acadan ou non. Os criterios de corrección indicarán a puntuación que recibirán os diferentes niveis de logro acadado. A avaliación dos desempeños nas tarefas faise axustándose ao solicitado nas instrucións da tarefa e será imprescindible informar ao participante (feedback) das debilidades que teña a tarefa para emendar o que sexa necesario, mesmo reenviando a tarefa.

Os desempeños mobilizan os coñecementos, destrezas e actitudes necesarias para resolver unha tarefa nun contexto determinado. Os desempeños dun curso veñen sendo como as pezas que compoñen un reloxo: ao fabricalo cómpre revisar se cada peza cumpre as especificacións ou características necesarias e se non as cumprise informarase do que deba revisarse ata axustar o suficiente para que ao montar o reloxo... funcione. É, polo tanto, unha avaliación en detalle de aspectos concretos, os desempeños.

As tarefas, avaliarémolas, é dicir, revisaremos se cumpren os requisitos ou especificacións que deben cumprir e cualificarémolas, de acordo cos criterios de corrección. Trátase de accións ou aspectos concretos evidenciados no traballo aportado na tarefa; son, polo tanto, datos obxectivos, reais... 

Cada módulo debe conter tarefas que avalíen a adquisición dos desempeños practicados nese módulo.

É imprescindible que cada tarefa:

• Describa claramente o que se lles solicita ás persoas participantes. O enunciado das tarefas debe ser claro, detallado e completo para facilitar a súa autonomía e lograr que fagan a tarefa sen ter que facer consultas ou resolver dúbidas. De non facelo así, a titoría terá que responder moitas consultas no foro de consultas.
  
  
• Especifique os indicadores de logro ou condicións que se deben ter presentes para considerar se un participante ten adquirido ou non o desempeño correspondente, así como os criterios de corrección, é dicir, os puntos correspondentes aos diferentes niveis de logro dun desempeño. Por isto, é preciso que as tarefas inclúan no seu enunciado estes datos sobre a avaliación e cualificación:

Apartado de avaliación a incluír nas tarefas

• Non é recomendable utilizar sempre o mesmo instrumento de avaliación: é preciso ofrecer variedade tamén nisto (cuestionarios, diarios, rúbricas, debates, probas obxectivas, talleres, minivídeos...)
  
  
• Poderanse empregar ferramentas de avaliación como "Probas", "Questionnaire" ou similares, pois facilitan a autoavaliación e, ao mesmo tempo, alixeiran o traballo da titoría. A inclusión de preguntas de autoavaliación relacionadas con cada un dos temas presentados facilita a aprendizaxe, o reforzo por medio da retroacción proporcionada permite ao participante coñecer o seu progreso. En ningún caso se confiará a avaliación dun módulo ou tema unicamente a este tipo de probas.
  
  
• Evitaranse as escalas de cualificación literais, do tipo Apto / Non apto polo seu carácter simplificador, e recoméndase o uso de guías de corrección con escalas numéricas e cualificación avanzada porque:
  • Facilitan a transmisión de instrucións concretas para a realización da tarefa.
  • Permiten ponderar doadamente, con pesos diferentes, os diferentes aspectos ou desempeños que poida incluír unha tarefa. A cualificación numérica simplifica a configuración do cualificador ao mesmo tempo que posibilita cálculos máis precisos que as escalas literais.
  • Facilitan unificar criterios de corrección no caso de haber varias persoas titoras, ou no caso de ter que revisar cualificacións das tarefas ante, por exemplo, unha reclamación.
    
    
• É posible gardar e compartir os comentarios frecuentes para un feedback amplo e detallado das tarefas de xeito cómodo para as titorías, sen ter que escribilos de cada vez ou de gardalos en soportes externos ao curso.
  
  
• A escala / puntos da Guía de corrección dunha tarefa na que se avalíen varios desempeños non ten por que coincidir cos puntos ou peso desa tarefa na cualificación total do curso. Cando se asignan puntos aos desempeños é práctico facelo en función dos aspectos que se van a avaliar ponderando como mellor estimes para darlles máis ou menos peso/importancia segundo a súa relevancia, dificultade etc.

  Por exemplo, se avaliamos dous desempeños podémoslle asignar 15 e 8 puntos respectivamente. Repara en que eses puntos saen dos aspectos avaliados: o segundo desempeño recibe 8 puntos porque son catro os elementos avaliados e se lles da 2 puntos a cada un deles. Se quixéramos darlle máis peso a ese desempeño, poderíamos darlle 3, 4 ou ou 5 puntos a cada aspecto, co tal tería 12, 16 ou 20 puntos en total. Non nos debe preocupar o feito de ter unha escala "rara", de 0-23 puntos (rara porque estamos afeitos á escala 0-10). Se esa tarefa vai pesar 4 puntos na cualificación total do curso, Moodle fai os cálculos necesarios para que quen acade os 23 puntos reciba un 4 e quen reciba 0 puntos nesa tarefa teña 0 puntos nela, calculando todas as puntuacións intermedias. Deste xeito, poderemos ponderar comodamente o peso que lle queiramos dar a cada desempeño dentro da tarefa, e no cualificador ponderaremos o peso que terá esa tarefa dentro do seu módulo (16% no exemplo). E tamén podemos ponderar no cualificador o peso de cada módulo no total do curso. Deste sinxelo xeito temos liberdade total para ponderar como queiramos.