Dentro do Proxecta de Igualdade o alumnado de 1º ESO realizou un traballo sobre a evolución do corpo das mulleres. Neste caso a actividade xurdiu da colaboración dos Departamentos de Bioloxía, Lingua Castelá, Debuxo e Inglés.
Dentro do programa de actividades para o Proxecta de Igualdade o alumnado de 4º ESO A estivo preparando e levando a cabo uns debates centrados na temática do corpo, a imaxe e a igualdade. En primeiro lugar traballaron o tema da influencia dos filtros e a cirurxía estética sobre a visión do propio corpo. En segundo lugar discutiron se hai prendas opresoras do corpo feminino, que discriminan ou sexualizan a quen as leva (por exemplo, o burka ou o tanga). O último debate tratou os pros e contras da abolición da prostitución, polémica que nos levou a pensar na libertade que cada individuo ten de decidir sobre o seu propio corpo.
Onte rematou o curso 2021/2022 e con el tamén pecharon a súa etapa educativa en Secundaria os alumnos e alumnas de 4º ESO. Para despedilos coma é debido fixemos unha celebración todos xuntos onde houbo discursos da man de Raúl Alonso (4º ESO A), Gabriel Agustí (4º ESO B) e Jonathan Mariño (4º ESO C), vídeos do profesorado e do alumnado recordando os anos pasados no instituto, moitas risas e algunha bágoa tamén.
Foi un pracer, rapazada! Os mellores desexos!
O luns 20 de xuño o alumnado de 1º ESO foi de excursión ás illas Cíes. Fixeron o roteiro ao Faro, disfrutaron da famosa praia de Rodas, xogaron, bañáronse, tamén se mollaron un pouquiño pola chuvia... En conclusión: chegaron malladiños a casa.
O pasado xoves 16 de xuño o alumnado de 3º ESO foi de excursión ás dunas de Corrubedo co seu profesorado de Bioloxía. De tarde puideron visitar o impoñente castro de Baroña. O día rematou cun baño na praia que sempre ven ben.
O 1 e 2 de xuño o alumnado de 1º ESO asistiu a unhas xornadas marineras impartidas por "Bluscus. Galicia Marinera". Concretamente a actividade consistiu nun percorrido pola lonxa e porto de Cesantes e unha sesión coas propias mariscadoras que lles ensinaron á rapazada as artes do marisqueo.
Coma podedes ver nas fotos, o alumnado pasouno en grande descubrindo polo miúdo este histórico oficio.
Neste ano 2022 cúmprense 200 anos do nacemento de Gregor Mendel, pai da xenética.
As investigadoras Paloma Morán e Diana Valverde da UVigo imparten uns obradoiros ao alumnado de 1º ESO sobre "a importancia da mosca da froita nos estudos xenéticos".
Neste mes que acaba celebramos as Letras Galegas.
Durante dúas semanas puidemos ver no vestíbulo carteis informativos sobre a vida e a obra do poeta valdeorrés homenaxeado este ano, Florencio Delgado Gurriarán. Tamén acompañamos esa mostra cunha referencia a todos os autores aos que se lles dedicou a festa desde o seu inicio no ano 1963, centenario da publicación de Cantares gallegos de Rosalía de Castro.
Os homenaxeados dos últimos dez anos foron retratados polo alumnado de 1º de bacharelato, baixo a dirección das súas profesoras de Lingua Galega, Helena e Vera.
O martes día 18 celebrouse no Paraninfo do instituto un acto no que alumnos de 1º de ESO recitaron varios poemas de Florencio Delgado Gurriarán e foron entregados os premios do concurso literario convocado polo departamento de Galego e o Equipo de Dinamización Lingüística. A parte musical correu a cargo do grupo de Pandeireteiras do IES Castelao.
Aínda poderemos ver axiña algunha outra mostra relacionada coa festa das Letras Galegas deste ano.
Estade atentos que vai pagar a pena!
Esta é unha das cuestións plantexadas polo Departamento de Educación Física para reflexión do alumnado de 4º ESO dentro do Proxecta de Igualdade.
Con este traballo, intentamos que o noso alumnado reflexione sobre o sexismo na vestimenta deportiva das mulleres. Dita vestimenta pode ser asociada a unha sexualización da muller ou a un contexto cultural. A base esencial non é a vestimenta en sí, senón a incapacidade de elixir libremente entre diferentes opcións. En países islámicos as deportistas teñen a obriga de levar burka. Nalgúns deportes teñen a obriga de levar determinadas prendas.
A continuación podedes ver os traballos feitos en 4º ESO A para o Proxecta de Igualdade desde o Departamento de Lingua Inglesa. A temática enmárcase dentro das mulleres que tiveron que loitar para poder desenvolver tarefas propias de homes segundo a sociedade da súa época.
Todas elas son mostra da superación e afouteza das mulleres ao longo da historia.