IES A SANGRIÑA

Ama coa túa lingua no IES A Sangriña

Mér, 14/02/2024 - 16:05 — IES A Sangriña

14 de febreiro Sangriña 2024

Hoxe é 14 de febreiro, día dos namorados... e na Sangriña queremos que no que resta de semana ames na nosa lingua. Para isto, o Equipo de Dinamización da Lingua Galega instalará mañá no hall o photocall e o taboleiro dos post-it do amor en galego.

QUE IMOS FACER?

O día 15 instalaremos un photocall no vestíbulo para facermos fotos de grupo ou en parella e celebrar o noso amor!
Haberá tamén un taboleiro do amor onde poderedes deixar post-it coas vosas mensaxes de amor e amizade en galego!

Non deixes de participar. As mostras de amor e amizade constrúen un mundo mellor!

Apúntate nas estadías lingüísticas de verán

Mér, 14/02/2024 - 15:51 — IES A Sangriña

Recentemente veñen de se convocar 648 prazas de estadías lingüísticas de verán no estranxeiro para o alumnado de Bacharelato.

O alumnado que resulte seleccionado disporá de tres semanas en réxime residencial ou familiar en Reino Unido, Francia, Portugal, Canadá e Alemaña no período estival, entre xullo e agosto. As axudas poden chegar a cubrir entre o 92% e o 62% dos gastos derivados da actividade e poden solicitarse a través da sede electrónica da Xunta de Galicia.

Requisitos e baremación

Para obter as bolsas os candidatos terán que estar cursando, no réxime xeral, 1º ou 2º de Bacharelato, en centros de Galicia sostidos con fondos públicos, durante o curso 2023-2024; ter acadado unha nota mínima na área ou materia de lingua estranxeira que se vai perfeccionar na estadía de 6 no curso 2022/23, así como ter superadas todas as materias nese mesmo ano académico.

Os criterios para o baremo, puntuación e determinación das achegas familiares serán a nota media do expediente académico no curso 2022/23 (ata dez puntos) e a renda per cápita da unidade familiar (ata 20 puntos). Ademais, terase en conta o feito de pertencer a unha familia numerosa (dous puntos), contar cun membro cunha discapacidade igual ou superior ao 33% ou pensionista de grande invalidez (dous puntos), ou non ter sido beneficiario dunha axuda destas características na convocatoria do ano pasado (un punto).

Podes ver toda a información completa premendo nesta ligazón.

A Sangriña cumpre até a derradeira orde do meco!

Ven, 09/02/2024 - 15:49 — IES A Sangriña

entroido Sangriña 2024

Hoxe vivimos un entroido moi movido no IES A Sangriña. Foron moitos e moitas os alumnos e profesores que viñeron disfrazados ao centro. Variadas fantasías encheron os nosos corredores e aulas: un Castelao, científicos tolos, peluches e animais de diferentes especies e tamaños, deportistas, extraterrestres, bruxas, hippies... e até un Xesús de Nazaret!

Mais houbo dúas comparsas organizadas que, pola súa entrega e ilusión, non podemos deixar de mencionar dunha maneira especial. A comparsa AS BICHEIRAS, en homenaxe ás xa míticas personaxes de Davila, O Bichero, púxolle un tinte enxebre, rocanroleiro e reivindicativo ao entroido da Sangriña. A comparsa O XABARÍN CLUB, do Departamento de Lingua Galega (e Portuguesa), encheu de música e barullo os corredores. Risas e fotos cos máis peques (e algúns vellotes) para un entroido noso e en galego.

Do bacharelato á universidade

Ven, 09/02/2024 - 12:52 — IES A Sangriña

universidade sangriña exalumnos

Esta mañá, no IES A Sangriña, tivemos a grande fortuna de contar co retorno de dous fantásticos exalumnos do centro para lle falar ao noso estudantado de 1º e 2º de bacharelato sobre os retos que implica o camiño á universidade.

Rafael González compartiu con nós a súa experiencia no tránsito do bacharelato a unha vida universitaria que o levou a vivir en diferentes países, até que a obtención da bolsa “Ramón y Cajal” lle abriu as portas para volver e traballar na Universidade de Vigo

Andrea Maquieira, tamén destacada exalumna da Sangriña, compartiu como foi ese camiño co alumnado de Humanidades de Ciencias Sociais, profundizando nas vantaxes e esixencias da realización dun dobre grado e na importancia da formación posgrao para acceder a un posto de traballo no ámbito profesional desexado.

Charla sobre acoso escolar e ciberacoso

Ven, 09/02/2024 - 09:10 — IES A Sangriña

O alumnado de 2º de ESO participou hoxe nunha charla sobre acoso escolar e ciberacoso organizada no ámbito do Plan director para a convivencia e a mellora da seguridade nos centros educativos e os seus contornos.

Os obxectivos que se pretenden acadar coas actuacións recollidas no Plan Director, son todos aqueles que procuran dar respostas coordinadas e eficaces a todas as cuestións relacionadas coa seguridade do alumnado nos centros educativos e os seus arredores, os que fortalecen a cooperación policial coas autoridades educativas, os que pretenden mellorar o coñecemento que a poboación escolar posúe sobre os recursos policiais ou os que fomentan nos rapaces o respecto polos dereitos fundamentais.

Obradoiro Conectad@s

Xov, 08/02/2024 - 16:22 — IES A Sangriña

Onte, día 8 de febreiro, o CIM da Guarda desenvolveu no IES A Sangriña a actividade “Conectad@s, relacionándonos na contorna virtual”. Un obradoiro sobre as relacións persoais e os novos xeitos de captación e riscos a través das app e das redes sociais.

Cando os consultamos, os nosos alumnos e alumnas coincidiron, de maneira maioritaria, en que esta foi unha formación interesante e útil. Que non deben comunicarse nin fiarse de descoñecidos en Internet e que non deben compartir fotos nin datos persoais foron algúns dos consellos recibidosmáis valorados polo noso estudantado.

Dez días de almorzos saudábeis

Mér, 07/02/2024 - 12:14 — IES A Sangriña

Nestes días vimos de concluír co reparto de froita a través do programa de axudas para a distribución de froita fresca ao alumnado dos centros escolares.

Nesta publicación queremos compartir con toda a comunidade educativa do IES A Sangriña algunhas fotografías desta actividade encamiñada a promover hábitos de alimentación saudábeis. A distribución de leite extenderase aínda durante oito días lectivos. O reparto da froita realizouse coa colaboración dun equipo integrado por alumnos e alumnas moi traballadores. A partir de agora, como o reparto se simplifica moito, o leite será recollido directamente polos estudantes interesados na cafetaría do centro.

O meco manda no entroido da Sangriña!

Lun, 05/02/2024 - 13:02 — IES A Sangriña

O meco manda no entroido do IES A Sangriña 2024. Cada día desta semana daranos unha orde que todos e todas temos que acatar para comezar ben o entroido!

O martes viremos tod@s cos calcetíns desparellados:

Un calcetín teño sen par

e outro para o remendar,

reciclémolos mañá

para o entroido comezar!

O mércores con algo na cabeza:

Este meco non descansa

haille que seguir a bóla

mira ti o que se lle ocorre

poñer algo na cachola!

O xoves en pixama:

Mañá é o día que esperabas

ti que ao insti vés durmir!

deixa o pixama posto

antes da casa saír!

E o venres disfrazad@s:

A semana xa remata

xa podemos descansar

pero antes de ir para casa

tes que lucir un disfraz!

E no segundo recreo do venres queimaremos o meco no xardín!!!

Obradoiro “Identidade Dixital e Xestión Segura das Redes Sociais”

Lun, 05/02/2024 - 08:46 — IES A Sangriña

A pasada semana, a vicedirección do IES A Sangriña organizou un obradoiro baixo o título “Identidade Dixital e Xestión Segura das Redes Sociais”. Impartida por Manuel Rivas, especialista da Axencia para a Modernización Tecnolóxica de Galicia (Amtega), esta formación tivo como destinatarios aos alumnos de 4º de ESO non matriculados en Educación Dixital.

Tanto para os e as asistentes, como para todas aquelas persoas que non participáchedes no evento, Manuel deixounos estes sete importantes consellos sobre como empregar Internet dun modo máis seguro e responsábel:

Pensa antes de compartir.
Pide permiso se a información non é túa, ten coidado con adhesivos desagradables ou fotos cargadas sen consentimento.
Se algo che molesta, pídelle a quen o comparta que o borre, se non o fai, denúnciao.
Protexe as túas redes sociais con contrasinais fortes que só ti coñeces e modifícaas periodicamente.
Xestiona as opcións de privacidade e seguridade de forma restritiva en cada rede social, privatiza as túas redes.
Limita a túa lista de contactos: un estraño no mundo real tamén é un estraño no virtual.
Ti decides a información que das e compartes en internet.

Cartas de amor e amizade na Candeloria

Ven, 02/02/2024 - 14:52 — IES A Sangriña

Candeloria

Hoxe, 2 de febreiro, é o día da Candeloria, medio inverno vai fóra e namoran os paxariños! A Candeloria é o día de exaltación do amor no calendario tradicional galego. Para que a nosa comunidade educativa poida festexalo puxemos unha caixa de correo en consexaría.

Todos aqueles que queirades participar só tedes que entregar a vosa carta de amor ou de agradecemento o luns 5 de febreiro e o Equipo de Dinamización da Lingua Galega faraa chegar aos seu destinatario ou destinataria. Tanto se a metedes nun sobre como se empregades un folio pechado cun celo... non esquezades poñer por fóra o nome, a clase e o grupo da persoa que debe recibila.