Normalización Lingüística

Celabramos un magosto cheo de xogos!

Mér, 30/10/2024 - 13:04 — IES A Sangriña

Magosto IES A SANGRIÑA

No IES A Sangriña celebramos un grande magosto organizado polo Equipo de Dinamización da Lingua Galega... que non sería posíbel sen a colaboración do departamento de Automoción e, en especial, do alumnado de Mantemento de vehículos... que se encargou de asar e repartir as castañas e de preparar toda a infraestrutura necesaria.

O departamento de Educación Física e o profesorado con docencia nestas últimas horas da mañá traballaron para que fose posíbel divertirse con moitos xogos populares. A ra, o tiro da corda, as cadeiras musicais, os zancos, a comba e as chapas axudáronnos a dixerir as castañas en canto nos divertiamos e xogabamos cos compañeiros e compañeiras!

QUEN DIXO MEDO!!! IV Certame de contos de misterio e terror

Lun, 30/09/2024 - 11:16 — IES A Sangriña

samaín a sangriña 2024

Escribe o teu relato para a noite de defuntos e preséntate ao IV Certame de contos de misterio e de terror "QUEN DIXO MEDO!!!". Celebra o Samaín 2024 co Equipo de Dinamización da Lingua Galega do IES A Sangriña.

COMO PARTICIPAR?

Non hai límite de palabras, pero só terás unha páxina de espazo. Podes facer a letra endemoñadamente pequena.

Se queres, acompaña o texto dunha imaxe horripilante (aínda que non sexa obrigatorio).

Haberá dúas categorías e un premio para cada unha delas: CATEGORÍA A (alumnado de 1º, 2º e 3º de ESO) e CATEGORÍA B (alumnado de 4º de ESO e Bacharelato). O alumnado de FP participará na categoría que por idade lle corresponda.

Envía o teu relato por e-mail á conta asangrinha.edlg@gmail.com indicando o teu nome completo, curso e grupo. A data límite de recepción será o 30 de outubro. Os mellores traballos publicaranse en Internet.

Os premios terán un importe de 30 € e serán entregados nun vale que deberá empregarse na libraría Atlántica.

Fomos á caza dos seres míticos!!!

Ven, 21/06/2024 - 11:45 — IES A Sangriña

Seres Míticos Sangriña

Hoxe, por segunda vez, celebramos no IES A Sangriña unha actividade moi especial. A caza dos seres míticos. O alumnado de 1º de ESO tivo que buscar polos patios e xardíns do centro, seguindo unha serie de pistas, fichas de diferentes seres míticos da cultura popular galega e portuguesa. Maria Gancha, o Urco, a Santa Compaña, o Home do Saco, Pedro o Chosco...

As fichas de pesquisa estaban escritas en portugués, para que o alumnado que non ten esta materia poida ser consciente de como, cos seus coñecementos de galego, pode consultar materiais instrumentais nesta variante internacional da nosa lingua.

A competición gañábaa aquel equipo que antes conseguise capturar, co seu móbil e mediante un código QR, os catorce seres míticos da ficha que lles foi entregada ao inicio da actividade. Arriba, podedes ver unha fotografía das nosas gañadoras: Alejandra López, Lina Ozores, e Ángela Martínez de 1º de ESO A e Iria Pérez de 1º B.

Tanto o Departamento de Portugués como o Equipo de Dinamización da Lingua Galega, organizadores da actividade, queren agradecer a todos os e as participantes o ben que competiron, todo o que correron e o moito que nos divertimos!

Entrega de premios no IES A Sangriña

Mér, 19/06/2024 - 10:44 — IES A Sangriña

Premios Dinamización da Lingua Galega IES A Sangriña

Esta mañá, na Bibliotrega, entregáronse os premios de diferentes concursos organizados ao longo deste ano 2024 polo Equipo de Dinamización da Lingua Galega e polo Equipo de Dinamización da Biblioteca do IES A Sangriña.

Nas imaxes que ilustran esta noticia podedes ver a Daniela Pereira e Claudia Rodal e a Mario Alonso recollendo as súas acreditacións como gañadores do VII Concurso de Ilustración.

David Fernández Miniño foi galardoado cos premios O Apalpador de debuxo de Nadal e Rosalía de Castro de lettering. Recollendo o primeiro dos premios aparece acompañado polas finalistas Carla Iglesias e Mara Rodríguez e no segundo por Karen Castro (o outro finalista do concurso de lettering foi Iago Baz).

Finalista do premio de poesía Arrimar os lombos foi a alumna Jovana Ferre, aparece na fotografía con Mateo González e Marcos Giráldez que, xunto con Gabriel Sobrino, resultaron gañadores do certame.

Finalmente, a clase de 4º de ESO (grupo PDC) foi a vencedora do Concurso de bandeirolas do Día das Letras Galegas, do que o alumnado 1º de ESO B resultou finalista.

Moitas grazas a todo o estudantado participante nos concursos deste 2024!!!