1º PRIMARIA, 2º PRIMARIA, 3º PRIMARIA, Educación Física, Inglés, Música, Plástica, Relixión, AL, PT

Voltamos do Entroido e continúan as nosas experiencias de aprendizaxe nas aulas. Como sabedes, un dos proxectos deste curso chámase Applícate o conto. Con el queremos crear unha aplicación de contos infantís para teléfonos móbiles android e iphone. Creamos os personaxes, inventamos historias, escribímolas, corrixímolas e sometémolas ao xuízo do público: os propios nenos e nenas. Así comprobamos cal das historias lles resulta máis interesante ou graciosa. Para isto desenvolvemos unha actividade na aula de matemáticas que consiste en escoitar e valorar os contos outorgándolle de 1 a 8 puntos. A mecánica é tan sinxela coma a dos concursos da tele, tan de moda nesta época. Ao rematar lemos en voz alta os puntos e imos anotándoos na libreta. Usando a calculadora realizamos a suma e comparamos os resultados entre sí para ordenalos de maior a menor. Así creamos un ranking cos contos máis interesantes. Polo camiño descubrimos que é importante facer os números cunha forma bonita para que se poidan entender. Tamén que temos que ser limpos e ordenados na libreta para que os datos non se trabuquen. Que non importa se dicimos os números desordenados cando sumamos, xa que a suma ten propiedade conmutativa. Que a calculadora é unha ferramenta útil cando temos que realizar moitas sumas seguidas.

E de paso aprendemos que os gustos son unha cuestión persoal. Que cando valoramos non debemos deixarnos influir pola opinión dos outros xa que todas son respectables.

E por fin chegou o grande día. Todo o traballo das familias cosendo os disfraces e buscando latas sobre as que percutir. As nenas e nenos ensaiando, construíndo e decorando as baquetas. Todo o profesorado implicado na decoración, vestimentas, ensaios e organización. Todo elo para poder pasar unha tarde feliz ao son da música e gozando do espírito máis entroideiro. Velaquí unha boa mostra delo, unha galería de imaxes que testemuñan un día de celebración e cor.

Continuando na liña do artigo recentemente publicado sobre unha visita ao teatro, o alumnado do centro ponse aos mandos da web e, tal que xornalistas, informan das súas actividades escolares e complementarias. Nesta ocasión son as nenas e nenos de 3º de Primaria os que nos achegan unha crónica da xornada de Deporte Escolar celebrada en Maside na que competiron nunha carreira campo a través con alumnado doutros centros da comarca.

Esta carreira foi moi dura, pero aínda así divertímonos. Os nenos eran moi competitivos, tal vez demasiado. O centro vencedor foi o colexio da Uceira. Tamén todos os centros recibiron un trofeo.
Temos moitas anécdotas que contar: Unha nena caeu ao chan porque a empurraron e sangroulle o nariz. Como había moito barro a unha nena saíuselle o zapato do pé e andaba tirando del para sacalo de alí. Había un cabalo que mexou e corría moito e aos nenos resultoulles moi gracioso. Un neno estaba correndo, caeulle un zapato e despois seguiu correndo con el na man. Despois da carreira déronnos barriñas enerxéticas. Un dos nosos compañeiros de 3º de Primaria, David Fernández Rodríguez, quedou en 5º lugar.

O proxecto do CPI Virxe da Saleta avanza no desenvolvemento das Competencias Básicas entre o noso alumnado. Pouco a pouco eles van tomando a palabra tamén aquí na web, desenvolvendo a Competencia Lingüística e a súa iniciativa e autonomía. Nesta ocasión Raul Gallego González, de 6º de Primaria, achéganos a crónica dunha saída escolar ao teatro no Auditorio de Ourense.

TIME TRAVELLERS

O Auditorio estaba todo cheo de nenos e de nenas! De moitos colexios: Cea, Amoeiro, O Irixo... De súpeto apáganse as luces... Ao momento aparece unha ladroa abrindo unha caixa forte e rouba uns documentos secretos pero deixa esquecida a súa mochila con obxectos históricos. Despois soa unha alarma. Logo apareceron dúas persoas e descubriron que lles roubaran os seus documentos. Despois os dous exploradores viaxaron no tempo tres veces para encontrar pistas e poder devolver os obxectos históricos que había na mochila. Viaxaron á época de Cristobo Colón, de Pablo Picasso, a antiga Roma e á Prehistoria. Ao final atraparon á ladroa que se chamaba Joker. E tamén había outra criminal que se chamaba BIG MAMA, ou sexa, mamá grande.

Un ano máis celebramos  o Día Escolar pola Paz e a Non Violencia. Lembraredes que o ano pasado o noso leit motiv foi a Alegría. Cantamos aquela bonita canción de Sergio Tannus xuntos na entrada do colexio acompañados ao piano pola profe Anna Bosak. Nesta ocasión afondamos na mesma idea: a felicidade. A comunidade escolar do CPI Virxe da Saleta estamos convencidos de que a mellor maneira de convivir en paz os uns cos outros é estar felices. Querer e deixarnos querer. Sentir os afectos dos que nos rodean. Os coidados e os sentimentos son a chave para unha convivencia pacífica en sociedade. Na escola, na casa, no pobo, no país e no mundo. Só tecendo eses fíos que nos unen a unhas persoas coas outras seremos capaces de construir a paz. Por iso o traballo deste día é o #MapadasEmocións. Unha narración oral acompañada coa preciosa música de Ludovico Eunaldi onde o alumnado do centro conta que é aquelo que lles fai felices, que lles fai sentir ben, sentirse queridos polos demais. Agardamos que a súa escoita sirva de inspiración para todos. Sobre todo para os maiores, que nunca deixaremos de aprender das palabras sabias dos pequenos.