Actividades

ESCARLATINA E ESMERALDINA CON SABOR… A DOCE

Vaise achegando o día elixido para celebrar o Magosto que coma sempre vén acompañado de choiva e adiamento do festexo... pero nós poñémoslle ao mal tempo boas intencións e moito doce.Repetimos experiencia de OBRADOIRO TERRORÍFICO ideado a partir da lectura dos libros de Ledicia Costas.

O alumnado de 1.º e de 2º da ESO trouxo decoradas unhas madalenas que nos recordan o mesmiño gato Dodoto, o arañón francés Lady Horreur, o mortobús convertido nesta ocasión nun mortotren con estación e todo, e un magnífico Amanito co que nos agasallou o compañeiro de 1º ESO A, Aarón.

E, á beira destes e doutros personaxes de conto, xuntamos sobremesas 'terroríficas' cheas de caveiras, sangue, esqueletes, vermes e outras cousas que sendo no fondo moi apetitosas teñen aparencia de noxentas.

Entre todos desfrutamos dun día fantástico para a vista e o padal.

Que si, que as probamos. E estaban boísimas!!

Moitas grazas ás mamás e papás que tanto colaboraron para que os rapaces e rapazas puidesen vivir esta mañá con ilusión.

A proba está nas fotos que acompañan esta nova.

Ata o curso que véeeeeeeeeeen.

Xulia Marqués

Coordinadora do EDLG 

     Máis fotos

Celebración do alumando de CPI de Vedra do Día de Neira Vilas. Por un banda, todo o alumnado da ESO fai unha lectura continuada de varios textos de Memorias dun neno labrego. Por outra, o alumnado de 4º de Primaria lee varios poemas do autor. A lectura de Memorias dun neno labrego vai acompañada da canción do mesmo nome de Antonio Crego Martínez, que deu autorización para o seu uso. Os poemas levan o fondo musical das cancións de Suso Vaamonde, con autorización dos seus herdeiros.

 A continuación móstranse as ligazóns para escoitar a montaxe de todos os fragmentos lidos polo alumnado da ESO ("Lectura continuada..."), e tamén se ofrecen as lecturas individualizadas por curso. Por último, a montaxe da lectura dos poemas lidos polo alumnado de 4º de Primaria.

• Lectura continuada de "Memorias dun neno labrego"
  
  • Eu son - 1º ESO A
  • Pachín - 1º ESO B
  • Rebusque - 2º ESO 
  • Eladia - 4º ESO B
  • O xuramento - 3º ESO A
  • A pedra - 3º ESO B
  • Destino - 4º ESO A
• Poemas de Neira Vilas - 4º Primaria

O CPI de Vedra participou na 11.ª edición do Concurso Coca-Cola Novos Talentos de Relato Curto! promovido pola compañía Coca Cola e no que colaboran as universidades de Santiago, Vigo e A Coruña e a Secretaría Xeral de Política Lingüística.

Este certame literario dirixido exclusivamente ao alumnado de 2.º da ESO busca potenciar a creatividade dos alumnos/as a través da escrita dun microrrelato en lingua galega.

A sesión desenvolveuse na Facultade de Filoloxía de Santiago de Compostela o pasado 15 de marzo e nela estiveron representándonos Teresa Tato, Antía Vázquez, Elia Torres e André Parra.

Os catro realizaron unha proba escrita na que debían usar catro das seis palabras que lles foron propostas antes do comezo: SAUDADE, SOLPOR, BEIZOS, FERVENZA, MERGULLAR e ACARIÑAR.

O CPI de Vedra acaba de gañar o Premio Proxecta de Innovación Educativa 2018 convocado pola Consellería de Educación entre os centros docentes públicos que foron admitidos no Plan Proxecta durante o curso escolar 2017/18.

"De redes e afectos ou como converter nun activo para a dinamización o patrimonio local contextualizado. Os proxectos do CPI de Vedra: superando límites, integrando partes" é o título do traballo presentado polo Equipo de Dinamización da Lingua Galega galardoado nesta ocasión.

O Equipo de Dinamización da Lingua Galega do CPI de Vedra vén coordinando nestes últimos anos unha serie de actuacións con base no patrimonio local vedrés baixo a marca Vedra medra.

Este é o terceiro recoñecemento que acadamos despois de ter recibido o Premio didáctico Antón Fraguas promovido desde o Museo do Pobo Galego e o Premio a proxectos de innovación en dinamización lingüística que convoca a Secretaría Xeral de Política Lingüística.

Parabéns á toda a familia de Vedra medra e a seguir traballando POR UN PATRIMONIO VIVO!!

Xulia Marqués (Coordinadora do EDLG e do Vedra medra)

               Saída de 1.º da ESO ao concello de Boqueixón

En Vedra medra comezamos o último mes do ano baixo o feitizo do Camiño.

E eliximos para esta última visita de 2017 o Pico Sacro e a súa contorna no veciño concello de Boqueixón.

Con esta saída queriamos aproximarnos a un espazo único que todos os ulláns consideran propio e vinculado á vía xacobea, e todos os galegos, monte mítico e lendario.

Ler máis

Ver fotos