CEIP PLURILINGÜE A LAXE

Ola familias!!!

Esta semana seguimos avanzando no proxecto do corpo humano e tamén voltamos aos ambientes, sen esquecernos do Magosto.

Pero como sempre, cada día comezamos coa asemblea. Como sabedes unha das tarefas é realizar unha actividade interactiva na pantalla, unha delas foi o reparto regular, reforzando contidos matemáticos.

Esta semana coñecemos os 5 sentidos e traballamos un pouquiño con eles. E como traballamos a vista? Pois diferenciando obxectos entre moitos que estaban mesturados, ademais de diferenciar dúa imaxes segundo a cor na que nos fixemos, diferenciando así figura e fondo, aspecto importante para a lectoescritura. 

Ademais tamén buscamos o intruso entre varios obxectos, traballando non só a vista porque temos que estar moi atentos, concentrados e mirando os obxectos, senón que tamén repasamos vocabulario e campos semánticos.

Agora é o turno do olfato. Tiñamos 8 frascos con diferentes elementos: suavizante, té verde. alcol, aroma de mandarina, allo, pirixel, mel e canela. Fomos ulindo un a un e intentando adiviñar qué era. O mel foi un acerto total e noutros casos nos acercamos moito ao producto concreto.

E como traballamos o gusto? Pois probando e saboreando azucre, limón, sal, chocolate 99% e queixo parmesano para identificar os diderentes sabores: amargo, doce, salgado, ácedo e umami. Identificamos todos, pero houbo algún que non nos gustou nadiña, as nosas cara demotrábano, jeje. Pero fomos moi valentes porque probamos todo.

A profe Laura axudounos co sentido do oído. Púxonos diferentes sons de animais e nós tiñamos que adiviñar de qué animal se trataba. Despois fomos nós os que fixemos os sons e o resto dos compañeiros/as tíñano que adiviñar.

E para traballar o tacto seguimos experimentando. Coa alfombra de texturas da profe Laura tocamos superficies blandas, duras, ásperas, rugosas...

Para rematar cos sentidos clasificamos imaxes segundo o sentido coas que as podemos sentir, actividade que nos serve de repaso e ser conscientes de todo o que aprendimos.

Tamén fixemos un flipbook no que escribimos o nome dos sentidos segundo a información dada: qué nos permite e con qué o realizamos, traballando así a lectoescritura.

A semana pasada dixémoslle adeus a outubro e polo tanto o luns tivemos que facer o rexistro do tempo. Contamos cantas arandelas había en cada imaxe do tempo atmosférico, pegamos tantos gomets como arandelas había e anotamos o número, repasando o conteo e a grafía dos números. Pero tamén traballamos a lectoescritura ao escribir o nome do mes ao que despedimos.

Co esta proposta seguimos reforzando a orientación espacial ao mesmo tempo que traballamos a atención e a concentración. Tiñamos que colocar os peixes segundo o patrón de cores dado, pero tendo tamén en conta a dirección das flechas.

Encántanos debuxar, pero ás veces dicimos que non sabemos facer algún debuxo porque nos parece difícil. Por iso nesta proposta realizamos diferentes debuxos seguindo os pasos un por un. Despois escribimos o seu nome. Así traballamos a motricidade fina, o agarre do lapis, a atención, a concentración, o respecto dos pasos de todo proceso e por suposto a lectoescritura.

E seguimos realizando diversas actividades para reforzar a conciencia fonolóxica. Nesta ocasión tiñamos que clasificar unhas imaxes segundo a letra pola que comezaban. 

E como sempre as propostas están adaptadas a cada peque.

Como proposta de arte tivemos que realizar obxectos que tiveran forma de círculo partindo dun. Costounos un pouquiño entender que o círculo xa formaba parte do obxecto, que non tiñamos que facer outro círculo dentro, pero fixémolo moi ben. Debuxamos pelotas,  botóns, caras, rodas...

Así traballamos a creatividade, o pensamento, a asociación de formas a obxectos que nos rodean...

O soplo é importante á hora de articular e realizar un fonema, así que xogamos un partido de fútbol no que tiñamos que meter unha boliña de poliespan na portería, pero só podiamos empregar unha palliña e o aire dos nosos pulmóns. Marcamos varios gols!!

E como todos os mércores tivemos sesión de xadrez co profe Quique.

Novo mes, novo valor. Este mes de novembro llo adicaremos á empatía, aspecto de gran importancia no traballo das habilidade sociais.

Nesta ocasión fixemos a actividade da tea de araña: puxémonos en círculo e a profe Noe agarrou un extremo do ovillo e dixo algo que lle gustaba, quedándose co extremo e pasándolle o ovillo a outro neno/a que tiña que facer o mesmo. Así ata que rematamos todos e quedamos unidos por ese fío vermello. Isto deu lugar a falar do fío invisible que nos une ás persoas que queremos aínda que nos estemos fisicamente con elas.

O mércores tivemos unha sorpresa. O Ratonciño Pérez deixounos diante da súa porta unha nota, un conto sobre el, e unhas caixas onde podemos gardar os dentes que nos caian. Na nota nos lembraba a importancia de lavar os dentes e coidalos. Despois lemos o conto e descubrimos o segredo de como comezou a adicarse a recoller os dentes dos máis pequenos.

Seguimos avanzando no proxecto de Perú. Nesta ocasión coñecimos algúns dos seus instrumentos: a quena, o caixón, o charango e a zampoña, tamén coñecida como flauta de pan. E nós imos facer unha con palliñas. Primeiro, tendo en conta as cintas de diferentes lonxitude que había nun moble, collemos unha palliña xigante, marcamos as diferentes medidas e as cortamos. Despois en equipo fomos claisficándoas por tamaaño, reforzando os contidos matemáticos de longo, curto, máis longo que, maís curto que... ademais da concentración e a atención. 

En futuras sesións rematarémolas.

E esta semana voltamos aos ambientes. A profe Noemi e a profe Inés vos amosarán o que fixemos nas súas aulas. Na nosa tiñamos uns bolos terroríficos que nos permiten traballar a coordinación óculomanual, o respecto polo turno, o equilibrio á hora de colocar de novo os bolos despois de tiralos...

A orientación espacial está tan moi presente nos ambientes. Tiñamos que reproducir un patrón nunhas táboas divididas en cuadrículas, colocando as arañas, formigas, cabazas, gusanos, etc no seu lugar correspondente.

Moi relacionada cos sentidos está a mesa sensorial, na que nesta ocasión tiñamos "algo biscoso", jeje que era fluído non newtoniano: cando o apretamos está duro, pero se o soltamos vólvese líquido.

No minimundo tamén traballamos os sentidos coa base de arrozo morado, pero tamén a nosa creatividade e imaxinación ao experimentar e xogar de forma libre cos elementos que había nel: arañas, morcegos, cempés, mans...

Como proposta de vida práctica convertémonos en mecánicos/as e intentamos amañar un barco e un autobús, poñéndolle e quitándolle tuercas, tornillos... e empregando tanto as nosas mans como as ferramentas adecuadas. Algúns estiveron toda a sesión.

Como reto temos unha proposta de robótica, na que temos que dirixir ao robot dun punto ao outro, observando cal é o mellor camiños e os pasos que temos que dar, traballando a direccionalidade, orientación espacial, concentración, atención e pensamento computacional.

Encántanos pintar e que mellor que facelo con vasoiras de diferentes materiais para experimentar e crear. Unha compañeira ata consegui unha cor nova mesturando dúas das dadas.

Lectoescritura e Samaín: formamos o nome de elementos desta festa buscando as letras nunha bandexa con fabas negras, que nos dificultaban un pouquiño atopar as letras, polo que unha boa atención é moi importante.

E fomos de acampada (como proposta de xogo simbólico). Nos metemos na tenda, usamos os prismáticos para ver ao noso redor, pescamos, fixemos malvaviscos no lume, xogamos, desfrutamos, relacionámonos cos iguais...

Grazas ao profe Roberto o xoves celebramos o Magosto desfrutando de xogos populares como as canicas, a chave, a comba, os zancos, os peóns, as chapas, o aro..

Despois desfrutamos comendo castañas e leite. Como non nos gustan a todos/as puidemos merendar na pista co resto dos compañeiros/as.

Vémonos a semana que vén con novas propostas!! 

Ola familias!

Esta última semana de cole foi curta pero moi intensa.

Todos os días empezamos a mañá coa nosa rutina de asemblea, como fixemos dende que chegamos ao cole. Cada vez temos máis claro o que temos que facer, e facémolo moi ben: colocamos o día que corresponde, o tempo que fai, explicamos como nos sentimos… e escribimos o noso nome, que é o que máis nos gusta.

Tamén fixemos este lince de Samaín no que tiñamos que ir sacando tarxetas da caveira e buscar a imaxe que nos tocaba. Tiñamos que estar moi atentos porque algunhas imaxes eran pequeniñas e estaban moi escondidas.

Outra das actividades desta semana foi a lectura do conto “Guapa”, do que fixemos uns debuxos moi chulos e os coloreamos coas cores que aparecían no conto: verde, marrón, vermello…

Tamén fixemos unha actividade de grafismos, pero non era así de sinxelo… Tiñamos que pintar esta momia coa técnica de puntillismo, e non podiamos utilizar a cor que nós quixésemos, tiñamos que tirar un dado, contar o número que nos saía e mirar con que cor se correspondía.

O martes dividimos a nosa clase en 5 grupos: bruxas, curuxas, pantasmas, cabazas e morcegos. Estes grupos non estaban formados só por nenos e nenas da nosa clase, tamén estaban outros compis dos diferentes cursos do cole. As profes Rocío e Andrea viñeron buscarnos por grupos para facer un scape room na biblioteca do cole. Pasámolo moi ben buscando diferentes cousas a través das pistas, e preparándonos así para o que viría ao día seguinte…

O mércores por fin chegou Samaín!!!! Pasamos unha mañá moi divertida con diferentes talleres terroríficos: psicomotricidade de terror, coroas de flores, monstros sensoriais, historias terroríficas e cociña terrorífica.

Para rematar o día, puxemos cancións de Samaín e pasámolo xenial cantando e bailando.

Ata a semana familias!!!

Ola familias!

Esta semana foi curtiña pero con moitas propostas dentro da nosa aula e tamén no cole co resto de compañeiros e compañeiras... xa veredes! 

O luns, seguimos co proxecto do corpo humano: continuamos falando sobre como fomos medrando co paso do tempo e como podemos saber canto medimos e que diferentes instrumentos ou obxectos podiamos empregar para elo, así que se nos ocorreu facelo con bloques ou ladrillos. 

   

Todos participamos e rexistramos na pizarra cantos bloques precisamos para facer a nosa altura. Comparamos os números, cal é igual, maior ou menor...desenvolvendo tamén a competencia lóxico-matemática.

Tamén fixemos estacións de aprendizaxe de Samaín, con diferentes xogos para aprender de xeito lúdico e manipulativo. No primeiro deles aprendimos a movernos polo espazo seguindo as indicacións, fomentando asi a localización espacial e o pensamento computacional.

Nos seguintes xogos tiñamos que traballar de xeito individual, como este que podedes ver de lóxica-matemática co cal nos iniciamos na suma con diferentes caramelos. Traballamos tamén o conteo e a asociación de número coa grafía.

Neste outro tiñamos que completar os sombreiros de bruxa coas estrelas que indicaban as tarxetas, traballando tamén o conteo e a asociación de grafía-cantidade.

E no último, tiñamos que xuntar no caldeiro de chuches as que indicaban as personaxes, fixándonos moi ben na forma, cor e debuxo: un gran traballo de atención!

O martes, cando chegamos á asamblea tiñamos un vídeo onde Sira, unha persoa creada con intelixencia artificial, nos pedía axuda para salvar o Samaín do cole, asi que nos xuntamos por equipos cos compis do resto das clases para resolver unhas pistas que nos permitiron obter información que empregamos no obradoiro de historia terrorífica do día seguinte. Podedes ver na páxina principal do cole algunhas fotos deste Scape Room.

E mentras uns estaban no Scape-Room na biblio, tocaba seguir traballando! Desta vez, fixemos unha cabaza con gomets, seguindo un patrón, traballando así a atención e a motricidade fina.

Despois, tiñamos que picala, para traballar a nosa forza e finalmente pegala sobre un fondo que fixemos unindo puntiños, traballando tamén a grafomotricidade e a direccionalidade do trazo. Mirade que chulas nos quedaron!

Ademais, fixemos un experimento con xeos! Pantasmas, bruxas, cabazas, morcegos... tiñamos que derretir todos os xeos para conseguir os ollos agochados nas formas. 

Como o conseguimos? Pois empregando pipetas e auga morna, favorecendo asi o traballo da forza, psicomotricidade fina, coordinación óculo-manual... Que ben o pasamos!

         

E o mércores chegou o día da festa de Samaín, e para celebralo, tivemos diferentes obradoiros interniveis no cole e nos disfrazamos! Podedes velos tamén na páxina principal.

No obradoiro de cociña terrorífica, cociñamos diferentes platos con ingredientes terroríficos, e despois degustámolos.

No obradoiro de coroas de flores, tiñamos que empregar a nosa motricidade fina e a atención para facer diferentes formas de flores.

En psicomotricidade do terror, tivemos que facer diferentes xogos nos que poñer a proba as nosas destrezas motrices. Saltamos nos aros, esquivamos a telaraña, bailamos, xogamos as estatuas e a pedra papel e tesoira...

No obradoiro dos monstros sensorias, tiñamos que meter a man nunhas caixas e descubrir o que había dentro, traballando o sentido do tacto e a imaxinación... que medo!

E nas historias terroríficas, en grupo creamos e debuxamos contos de medo, dando renda solta á creatividade.

Por último, na nosa clase, puidemos merendar todos xuntos xuntando as mesas, e a profe tíñanos preparada outra sorpresa...

Moitas grazas a todo o profesorado por organizar os obradoiros e pola vosa implicación, o pasamos xenial!! 

Feliz Samaín e ata a próxima semana! 

 

Ola familias!!

Esta semana foi curta, pero chea de actividades tanto na nosa clase como co resto dos compañeiros/as do cole.

Como sabedes, na asemblea levamos a cabo moitas actividades, e unha delas é pasar lista. Despois poñemos na pantalla Casa e Cole, contamos os compañieros/as que hai en cada espazo e anotamos o número, reforzando a grafía do número. A continuación poñemos o símbolo que representa os conceptos maior que/menor que, que é a boca do crocodilo.

Esta semana seguimos con propostas de Samaín e unha delas, para avanzar nos contidos de lectoescritura, foi completar as palabras de vocabulario de nada coas vogais que faltaban. Con esta actividade tamén traballamos a conciencia fonolóxica.

Outra das propostas para introducirnos na lectura foi identificar nunha tarxeta onde aparecía escrito o nome da imaxe que había nela, para iso tiñamos que intetar ler as dúas palabras, pois a profe foi moi pilla e a diferenza entre as palabras era pouca.

Tamén montamos quebracabezas coa temática de Samaín ordeando os números ou as vogais en minúscula, traballando a atención e a concentración.

Como sabedes as actividades están adaptadas ao nivel de cada un/unha. Aquí a nosa compi coloca as boliñas segundo a súa cor.

Tamén seguimos avanzando na escritura do noso nome en minúscula.

est

E como traballamos as nosas mans? Pois coa plastilina, que nos encanta. Esta vez era de cor morada e tiñamos moldes de pantasmas, morcegos, cabazas...

Estivemos reforzando o conteo e a grafía dos números contando cantos elementos había de cada tipo nun caldeiro de bruxa e anotando o resultado. Os elementos estaban colocados dispersos polo caldeiro, polo que nos tiñamos que fixar ben e concentrarnos.

E coa profe Laura creamos un monstro. Para iso collemos unha cantidade de pintura mesturada con auga cunha pipeta e a botamos nunha cartolina. Despois, coa axuda dunha palliña e traballando o soplo e a respiración, creamos un monstro dispersando a cor polo papel.

O martes, cando chegamos á clase tiñamos un vídeo onde Sira, unha persoa creada con intelixencia artificial, nos pedía axuda para salvar o Samaín. E como nós sempre estamos dispostos a axudar alí nos xuntamos por equipos cos compañeiros/as do resto das clases para resolver unhas pistas que nos permitiron obter unha información que empregamos no obradoiro de historia terrorífica do mércores para crear unha historia. Podedes ver na páxina principlal do cole algunhas fotos deste Escape Room.

Mentres non era o noso turno para ir á biblioteca seguimos realizando as propostas da aula. Cos pinchos e traballando a motricidade fina e a coordinación óculo manual creamos elementos de Samaín: moitos fixemos cabazas.

O mesmo cos abalarios pequeniños de moitas cores, onde a precisión, a paciencia e a concentración ten que ser maior. Aquí tamén houbo cabazas e ata homes lobo.

E coa profe Laura reforzamos todo o anterior, pero traballando tamén a asociación de grafía cantidade, pois tiñamos que poñer tantos abalarios nuns limpapipas como indicaba o número que tiña nun extremo.

                                                        

Vos acordades dos monstros que fixemos antes? Pois ao día seguinte, despois de agardar a que secasen, lles puxemos ollos, e lles debuxamos os brazos, mans, pernas e pés. Algunha compi ata lle fixo un laciño. 

E traballamos a nosa creatividade facendo un debuxo de Samaín de forma libre. Aquí a profe pode ver que cores empregamos, como usamos o espazo no papel, o tamaño dos debuxos, a súa relación coa realidade...

A semana que ven temos o aniversario de dous compañeiros que xa deixaron lista a súa coroa.

Aquí podedes ver fotos da clase do psicomotricidade co profe Roberto. Nesta ocasión empregamos zancos e pelotas para tirar conos como se fosen bolos.

E chegou o día de celebrar o Samaín, día no que fomos disfrazados.

Repartidos por equipos (morcegos, cabazas, bruxas, curuxas e pantasmas) realizamos diversos obradoiros como psicomotricidade de terror, coroas de flores, monstros sensoriais, historias terroríficas e cociña terrorífica. Pasámolo xenial!!!

E para rematar o día a ANPA deunos uns agasallos  Moitas grazas!!!!

Vémonos o luns. Desfrutade destes días!!! 

Ola familias!

Nova semana superada. Xa falta moi pouco para que chegue Samaín, e por iso queriamos decorar a nosa porta cuns monstros terroríficos. Para iso primeiro tivemos que botar pintura nun folio e soprar moitísimo para darlle forma aos nosos monstros, traballando así o sopro.

Despois decorámolos con ollos e boca, e aproveitamos para repasar algunhas das partes da cara que xa coñeciamos. Cando os tiñamos listos fomos a poñelos na nosa porta, que nos quedou así de terrorífica.

Tamén seguimos traballando no noso proxecto sobre o corpo humano. Repasamos todo o que aprendemos coa mamá de Julia e Pepa a anterior semana, e fixemos así esta actividade na que conseguimos poñer en orde as diferentes fases do embarazo, desde que se unen o óvulo e o espermatozoide ata que nace o bebé.

Igual que o bebé da actividade anterior, nós tamén fomos medrando co paso do tempo. Nesta actividade que vedes aquí tivemos que ordenar cronoloxicamente as nosas fotos, non foi nada fácil... todos os bebés parecíannos iguais!!

E ao tempo que medramos, medran os nosos pés. Outra actividade que realizamos esta semana foi a seguinte. Debiamos coller un dos nosos zapatos, debuxar a súa silueta nun folio e despois repasarla cun rotulador. 

Por último decorámola coa técnica de puntillismo. Aproveitamos tamén para mirar que número tiñamos nos nosos zapatos e traballar os conceptos maior/menor, grande/pequeno...

Para rematar coas actividades sobre o noso corpo, tamén realizamos a seguinte na que debiamos medirnos con bloques de construción. Por parellas fomos formando a nosa torre, debatendo sobre se cando nacemos eramos así de altos, se creceramos desde entón... Ademais, aproveitamos para contar os bloques das nosas torres e así traballar o conteo.

O día 24 foi o día das bibliotecas escolares, polo que os nenos e nenas de educación infantil visitamos a nosa biblioteca do cole. Déronnos unha tarxeta co noso nome e a profe Andrea explicounos que cando quixésemos ler un libro debiamos deixar dita tarxeta no seu lugar para devolvelo ao mesmo sitio, mantendo así a orde dos libros. Tamén nos explicou as normas que temos que respectar na biblioteca. Grazas profe Andrea!!!

Outra das actividades desta semana para traballar a nosa creatividade foi a creación destes mandalas de outono, quedáronnos xenial.

Tamén traballamos a motricidade fina con esta actividade na que tiñamos que colocar os mesmos gomets nas diferentes partes da cabaza.

Continuamos traballando lectoescritura, lóxica - matemática, atención e motricidade con algunhas das propostas de Samaín que xa coñeciamos e con novas propostas que nos gustaron moito, como estes bloques de números e este crebacabezas co que puidemos formar algunhas das nosas letras.

Para continuar traballando a lectoescritura a través do noso nome, rematamos o noso retrato engadindo estes adhesivos coas letras que forman cada un dos nosos nomes.

Unha das últimas actividades desta semana foi a lectura do conto "Sopa verde". Despois de lelo realizamos un debuxo sobre o conto e o coloreamos.

Por último, o venres acudimos ao Mercadillo de Samaín que realizaron os nosos compis de 3º e 4º de educación primaria, fixeron cousas super chulas e os pequenos de infantil quixemos pasar por alí para felicitalos!