A Secretaría Xeral de Política Lingüística (SXPL) e a Secretaría Xeral de Ordenación e Innovación Educativa acaban de publicar a convocatoria de premios a curtas de animación en galego elaboradas no marco do programa Nós tamén creamos!, destinados a alumnado dende segundo ciclo de infantil a sexto de primaria dos centros públicos, para o curso 2023/ 2024. O prazo de inscrición remata o 1 de febreiro de 2024. Tedes as bases no Portal da lingua galega: https://www.lingua.gal/o-galego/promovelo/equipos-de-dinamizacion-da-lingua-galega/novidades/_/contido_2210/convocatoria-dos-premios-curtas-animacion-galego-nos-tamen-creamos.

Ademais, podedes participar no VI Certame de Podcasts Xosé Mosquera Pérez, "O Vello dos Contos", convocado polo IES Plurilingüe Rosalía de Castro de Santiago de Compostela, coa axuda da SXPL e outras entidades. Está dirixido a estudantes de 10 a 18 anos de quinto e sexto de primaria, de secundaria e doutros niveis de ensino non universitario. Así mesmo, poderán concorrer os centros que imparten ensinanzas de réxime xeral de fóra de Galicia e os públicos do Norte de Portugal. A solicitude débese formalizar antes do 21 de decembro en: certameradiofonico@iesrosaliadecastro.org. Os datos están aquí: https://www.lingua.gal/a-secretaria-xeral/convocatorias/_/Premios/convocatoria_0177/certame-podcasts-galego-xose-mosquera-perez-vello-dos-contos.

Por outra banda, o venres 24 de novembro desenvolverase no Consello da Cultura Galega (CCG) a XIX Xornada de Normalización Lingüística, organizada por Escolas Católicas co apoio da SXPL para docentes de centros públicos, concertados e privados. Entre as persoas relatoras figuran a profesora Teresa Pastor e o escritor Fuco Paz, que farán unha primeira achega á vida e á obra de Luísa Villalta, a autora a quen se lle dedicará o Día das Letras Galegas 2024. Atoparedes o programa e o formulario para vos inscribirdes en: https://www.lingua.gal/o-galego/promovelo/equipos-de-dinamizacion-da-lingua-galega/novidades/_/contido_2217/xix-xornada-normalizacion-linguistica.

Por último, tamén vos informamos de que, con motivo da conmemoración do Día da Ciencia en Galego, o CCG presenta unha programación especial no seu espazo Proxector. O profesorado interesado xa ten á súa disposición novos audiovisuais en galego e en inglés con subtítulos, nos que persoas expertas explican curiosidades científicas relacionadas coa saúde (que bacterias son boas e malas, como se fan resistentes aos antibióticos etc.). Podedes acceder aos vídeos dende: http://consellodacultura.gal/especiais/proxector/especial.php?t=10437.

Con motivo do 50 aniversario da creación de varias traídas de augas na parroquia de Cerponzóns, desde a Asociación de Veciños O Chedeiro, quixeron homenaxear a todos aqueles veciños e veciñas que construíron ditas traídas o longo dos anos, un exemplo de autoxestión que realizaron algunhas delas xa polos inicios dos anos 70 do pasado século.

Por aqueles anos comezaron a organizarse en multitude de parroquias de Galicia, asociacións de diversa índole, eran tempos de cambios e dun novo rexurdir do movemento veciñal, o traballo e a importancia que tiveron as comunidades de usuarios de augas de traída, non ten prezo.

Cerponzóns foi unha de tantas parroquias onde a veciñanza comezou a organizarse para poder mellorar a súa calidade de vida, as carencias eran moitísimas, é eles, como puideron, investindo dos seus poucos aforros, lograron entre unhas cantas comunidades distribuídas por varios lugares da parroquia, levar a auga dos mananciais ás súas casas. Ata ese entón a veciñanza servíase diariamente de ir buscar a auga ás fontes, de mananciais particulares ou daqueles que podían economicamente ter un pozo na súa casa.

Así que se puxeron ao choio e organizándose pola súa conta, comezaron a buscar as captacións e foron levando as súas augas para depósitos, os cales desde eles, despregáronse redes de abastecemento para chegar a aquelas casas que se sumaron ao sistema que se ía a implantar de autoxestión e así poder ter un servizo de auga que evitase o esforzado traballo de ter que estar día si e día tamén en ir buscar auga á fonte.

É por iso que desde a Asociación de Veciños O Chedeiro de Cerponzóns, quixeron pór en valor a toda esta xente que traballou arreo realizando durante meses, mesmo anos, éste importante feito. Non pode caer no esquecemento esa gran labor realizada por homes e mulleres que se organizaron en cuadrillas para a realización dos traballos que levaron durante moitos sábados e domingos.

A través dun documental, realizado por Fernando Portela e dirixido por Juan José Esperón, foron recollendo dos veciños e veciñas os recordos e anécdotas do labor desenvolvido naqueles momentos.

Este documental é un claro exemplo de conciencia ambiental, fomento da sustentabilidade, promover o uso responsable, entender que a auga é un ben común etc., e todo moi preto. 

ligazón ao documental 

https://youtu.be/nexEZjJOi6M?feature=shared

BENVIDOS AO UN NOVO CURSO CAMIÑANDO DA MAN DA LINGUA E DA IGUALDADE!

E que mellor maneira de comezar o curso con novos recursos e propostas!!!!

A Memoria das Mulleres é un proxecto do Concello de Pontevedra que pretende dar a coñecer e dar voz ás mulleres do municipio. Acaban de crear unha serie de recursos lúdicos ao redor do proxecto para traballar nas aulas.

• ‘Coñeces a…’ Aventúrate neste xogo para coñecer as protagonistas da historia da nosa cidade! É hora de pórlles rostro e escoitar os nomes das mulleres pioneiras, traballadoras e loitadoras de Pontevedra.

• ‘Aloita’ Pacíficas, servís, domésticas e individualistas. Esa era a imaxe que o franquismo tentou difundir das mulleres rurais. Nada máis lonxe da realidade. Con este xogo descubrirás algunhas da loitas encabezadas por mulleres no concello de Pontevedra.

• ‘Mulleres con R’ Séculos de cultura patriarcal definiron o arquetipo feminino, caracterizado pola submisión, a docilidade, o silencio, a fidelidade e a pasividade. Con este xogo descubrirás mulleres de Pontevedra que desafiaron os canons e fixeron das súas vidas actos de Rebeldía, Resistencia ou Reivindicación.

• ‘As Corseteiras’ Cando se instaurou a II República? En que ano finalizou a Guerra Civil? Como se viviron estes acontecementos en Pontevedra? Preme en “comezar” para coñecer a resposta a todas estas preguntas, para afondar na vida das Corseteiras e para saber que relación hai entre estes tema.

Roteiro "Memoria de elefanta"

Os alumnos e alumnas de 4º ESO A e 4º ESO D realizaron o luns 6 e o martes 7 un roteiro relacionado coa memoria histórica ao frente do cal estivo Mª Xesús López Escudeiro.

Durante o paseo, situou aos rapaces e rapazas no contexto histórico: informou sobre o golpe de estado de 1936 e sobre a represión posterior na cidade de Pontevedra e nas parroquias de Lérez, Mourente e Salcedo. Xuntos, localizaron espazos e feitos, mentres Mª Xesús López Escudeiro falaba de represaliados pontevedreses como Alexandre Bóveda ou varias mulleres, entre elas Josefina Arruty, mulleres que sufriron rapas de cabeza e violacións, entre outros terribles agravios.

Pola súa parte, o alumnado leu textos escritos polos represaliados, coma por exemplo, a carta da despedida de Bóveda á súa muller.

Pica na foto para ver o álbum

Teatro "Miss Docet"

O alumnado dos clubs de lectura do centro puido gozar de Miss Docet, obra teatral con texto de María Reimóndez e dirección de Vanessa Sotelo.

Este novo proxecto teatral da Compañía Eléctrica ten como protagonista a Emilia Docet, a muller coñecida por ser a “Miss España galeguista”. A interpretación de Iria Pinheiro guía esta peza de teatro documental no que a biografía de Emilia se entretece coa doutras mulleres tamén silenciadas despois de 1936.

Como desfile de voces, ecos e silencios, (Miss Docet) recupera desde a escena a potencia dunha xeración de galegas que viu truncada a súa historia e contribúe á loita para evitar que os seus nomes e os seus pasos desaparezan da nosa memoria.

Pica na foto para ver o álbum