Curso 2022/23
Sorteo lote gastronómico pro-viaxe do alumnado de 2º BAC
O mércores 31 de maio fíxose o sorteo da cesta de produtos gastronómicos de 2º Bac. O número premiado foi o 1218. Na foto podemos ver ó secretario do centro, Xan Rosende, facendo entrega da mesma á afortunada gañadora, Sofía Penas. Parabéns!
!
2º de ESO visita o mosteiro de Samos e a cidade de Lugo
O día 25 de maio o alumnado de relixión de 2º ESO disfrutou dunhna saída a Samos e a Lugo, acompañados polas súas profesoras Ángeles Vázquez e Nuria Mariño. A primeira parada foi en Samos, onde tiveron unha visita guiada polo Mosteiro para ver o monumento ao P. Feijoo, o claustro gótico ou das Nereidas, as pinturas murais e a igrexa monacal da Abadía. É o mosteiro habitado máis antigo de Galicia, situado no camino de Santiago.
Tras esta visita foron ata Lugo, onde tras un pequeño refrixerio deron unha volta completa á muralla romana, subindo pola porta de San Pedro, lugar de entrada dos peregrinos á cidade ao vir polo camiño Primitivo.
Para recuperar forzas trala camiñata visitaron un centro comercial onde xantaron e deron unha volta polas tendas.
Pola tarde foron visitar a Catedral de Lugo, Patrimonio da Humanidade xunto coa muralla, onde viron o claustro recén restaurado e unha exposición sobre Semana Santa; logo dentro foron vendo as distintas capelas, o altar Maior ,observando os distintos estilos que conforman a catedral, románico, barroco e neoclásico, e por último o museo catedralicio, que conserva pezas da Ribeira Sacra como o Crismón de Quiroga. Terminada a visita emprenderon viaxe de volta a Monforte, tras pasar unha xornada cultural e lúdica.
1º de Bac visita a Fábrica da luz, o Museo da Enerxía e as Médulas
Bioloxía-Xeoloxía e Física e Química.
O martes 16 de maio os alumnos/as de 1º Bacharelato realizaron unha saída organizada polos departamentos de FísQuim e BioXeo conxuntamente, acompañados dos seus profesores José Manuel Gil e María Padrón.
Pola mañá realizaron unha visita Á Fábrica da Luz, Museo da Enerxía de Ponferrada, espazo onde o carbón é o actor principal durante todo o seu percorrido.
O museo está ubicado na antiga central térmica da Minero Siderurxia de Ponferrada (MSP), que estivo en funcionamento entre 1920 e 1971.
Durante o percorrido puideron descubrir como se producía a electricidade a partir do carbón a principios do século pasado e coñecer as particularidades da sociedade daquela época.
Pola tarde e despois dun bo xantar, visitaron as Médulas, considerada a maior mina a ceo aberto da época romana e declarada Patrimonio da Humanidade e unha das maiores obras de enxeñería da Antigüidade.
A visita guiada consistiu nun percorrido circular de 3 km para desfrutar dun dos últimos frentes da explotación onde os romanos abandonaron o xacemento.
O percorrido é un paso polo interior da mina, entre un labirinto de “piecuezos” vermellos e castiñeiros centenarios. Este percorrido axuda a recoñecer o que está pola zona arqueolóxica e a función que tivo cada punto de interese (lagos, asentamentos, miradores,…)
Foi unha xornada de convivencia memorable…
Charla de Carmen Toba e Suso Verao - Plan Proyecta
Este martes 9 de maio viñeron ata o noso centro Carme Toba Trillo (natural de Muxía, A Costa da Morte, membro de Apatrigal, Asociación para a Defensa do Patrimonio Galego) e Suso Verao (natural de Sober, ex director e ex profesor do IES Río Cabe). Ambos ofrecéronnos unhas charlas que resultaron do máis entretidas e interesantes para o alumnado de 3ª ESO e profesorado que puidemos asistir. Ditas charlas están dentro do Plan Proxecta “Alvarizas, un ben singular da Ribeira Sacra” no que o alumnado de 3ºESO segue a traballar.
Comezou Suso Verao falándonos da ruta “Alvarizas e colados desde a Adega Cividade”, en Barantes (Sober), que abriron e manteñen entre el e seu irmán Xosé Ramón. Nela podemos ver as transformacións dos antigos agros en piñeirais, un castro, colados, petróglifos e varias alvarizas.
Carme Toba Trillo comezou explicándonos a importancia que teñen as abellas, como na prehistoria xa se recolectaba mel directamente da natureza e como os romanos foron quenes introduciron na Península o traballo coas colmeas. Falounos das distintas casas que poden ter as abellas (covos, cortizos, trobos, lacenas) e dos materiais dos que están feitas (barro, cortiza, madeira, pedra, vimbio, pizarra…) o que demostra como o home sempre se adaptou aos recursos que lle brindaba o medio natural. Tamén nos explicou os diferentes tipos de alvarizas: as lineais da Costa da Morte (que tamén se dan en Irlanda, Inglaterra ou na Bretaña francesa), as redondas da Ribeira Sacra, O Courel e Os Ancares; as de tipo torre (talameiros) en Asturias, ou as colgantes de China. Sorprendeulle moito ao alumnado, entre outras moitas cousas, a existencia das lacenas da Costa da Morte e do norte de Pontevedra e o feito de que se lles selara a entrada con bostade vaca; tamén a forma dos talameiros en Asturias ou as alvarizas colgantes en China, así como as numerosas propiedades do mel para curar diversas doenzas.
Moitas grazas Carme Toba Trillo e Suso Verao por ter vido ata o noso centro. As vosas explicacións axudáronnos a entender un pouquiño máis o valor que ten o noso patrimonio e a necesidade de, entre todos, conservalo e protexelo.
Sorteo da cesta pro-viaxe do alumnado de 2º BAC
O próximo xoves, 18 de maio ás 11:15h, no hall do Río Cabe terá lugar o sorteo da cesta coa que o alumnado de
2ºde BAC contou para recadar fondos para a súa viaxe de fin de curso a Roma. O resultado publicarase na páxina web
do centro. En caso de non aparecer o boleto premiado, realizarase un segundo sorteo.
Agradecemos á ANPA a súa colaboración e implicación .
O Delegado da Xunta, Javier Arias, visita o Cabe
O Delegado da Xunta, Javier Arias, estivo o pasado martes, 9 de maio, co alumnado de 1º de Bac que ven de participar na final nacional do concurso de Economía "Young Business Talents" comentando a experiencia vivida en Madrid e felicitándoos polos éxitos acadados. E aproveitou a saudar ó alumnado do intercambio entre os centros de Burela e Monforte que ese día se atopaba no centro.
Dende o Cabe queremos agradecer a Javier a súa amable visita.
Intercambio de alumnado entre o IES Río Cabe e o IES Monte Castelo de Burela
O alumnado de 1º de ESO do IES Monte Castelo de Burela visitou., o pasado 9 de maio, o noso instituto, participando nun intercambio escolar entre os dous centros, no
que tomaron parte 70 alumnos e alumnas. O obxectivo era confraternizar e coñecer a cidade do Cabe e a Ribeira Sacra.
Sobre as 11 da mañá foron recibidos no instituto e logo partiron a visitar a Torre da Homenaxe, facer un roteiro literario sobre os autores Lois Pereiro e Manuel María así
como visitar a Ponte Romana e os exteriores do convento das Clarisas. Despois do almorzo no centro escolar, desprazáronse ata o Mirador do Duque, onde rematou a
xornada.
A actividade estivo organizada polos departamentos de Educación Física, Orientación, Bioloxía e Xeoloxía, Xeografía e Historia e lingua Galega.
A Dirección do Río Cabe agradece a todo o profesorado participante a súa implicación na actividade e en especial, a boa predisposición do IES Monte Castelo para a
realización deste intercambio, que se completará coa visita a Burela do noso alumnado o próximo 30 de maio.
O IES Río Cabe triunfa no "Young Business Talents"
O pasado venres 28 de abril tivo lugar en Madrid a final da duodécima edición do programa educativo de simulación empresarial "Young Business Talents". Esta fase final contou cos mellores 100 equipos de España e para chegar á mesma tiveron que superar aos máis de 10.000 estudantes e 400 centros educativos que se inscribiron na competición no mes de Setembro.
O IES Río Cabe chegou á fase final cos únicos 2 equipos que representaron á provincia de Lugo: GLU e RAPLOSSA.
O equipo GLU estaba formado polas alumnas Laura López, Génesis Soto e Uxía Taboada, conseguindo gañar na final a súa simulación e superar aos outro catro equipos cos que competían.
O equipo RAPLOSSA, formado polos alumnos Germán Álvarez, Lois Sánchez e Pablo Ureña tamén conseguiron gañar a súa simulación e ademais obtiveron o terceiro posto por maior beneficio acumulado neste evento organizado por ABANCA, ESIC, Herbalife e Praxis MMT.
Os seis alumnos/as demostraron as súas habilidades directivas dirixindo a súa propia empresa cun simulador avanzado de última xeración e tiveron que tomar decisións como as cantidades producidas, inversións en publicidade, prezos de venda, solicitude de préstamos, contratación de persoal..... co obxectivo de competir con outras empresas nun mercado virtual e chegar a alcanzar o maior beneficio acumulado. Ao mesmo tempo tamén aproveitamos para pasear e coñecer a cidade de Madrid, como se pode ver nesta pequena galería de imaxes.
Función teatral do alumnado do Río Cabe
O alumnado que participa na actividade de teatro no Río Cabe representou a obra "Auga" primeiro no instituto, para os seus compañeiros e compañeiras, e despois na casa da cultura para o público en xeral, participando no certame de teatro organizado polo concello de Monforte, nos días 24 e 28 de abril. Na súa actuación, demostraron ser xa veteráns e fixeron rir ó público á vez que interactuaron con el, ademais de agradecer a súa presenza. Estamos encantados coa súa función e moi orgullosos do seu bo facer. Grazas á profesora Paqui Abeledo pola súas ensinanzas. Parabéns a todos vós!
Visita á base antiincendios do Marroxo e Doade
O martes 25 de abril os alumnos e alumnas de 2º ESO visitaron, acompañados dos seus profesores, Iria Penoucos e Javier Barros, a base contraincendios de Doade e do monte Marroxo.
Alí, os brigadistas, pilotos de helicópteros, avionetas e resto de persoal explicáronlles en que consiste o seu traballo e como accederon ó seu posto. Tanto alumnado como profesorado estamos
moi agradecidos por toda a información que nos deron, así como da cercanía que sentimos en todo momento , pero sobre todo, estamos agradecidos e moi orgullosos do traballo que realizan.
![RSS - Curso 2022/23 Distribuir contido](/centros/iesriocabe/misc/feed.png)