Noticias

A ANPA e o IES poñen a disposición do centro 31 medidores de CO2.

Mar, 09/02/2021 - 23:57 — IES A Sangriña

Co fin de manter e controlar o mantemento das condicións sanitarias máis axeitadas desde o punto de vista da calidade do aire nas instalacións do centro, a ANPA e mais a Dirección do IES A Sangriña mercaron 31 medidores de concentración de CO2, temperatura e humidade destinados ao control da concentración de dióxido de carbono nas aulas para evitar posibles situacións de saturación que poñan en risco a seguridade sanitaria das persoas usuarias do centro. Os medidores estarán a disposición do profesorado en conserxería.

Segundo as recomendacións feitas chegar pola CCEU, CSIC e outros organismos e entidades, a concentración de CO2 tope a tolerar estaría nun rango de 550-600 ppm. Calquera medición por riba destes valores obrigaría a apertura máxima de fiestras (de non estar xa así) e, se isto non é suficiente, evacuaríase a aula ata rexistrar concentracións por debaixo do límite anterior.

Concurso polo Día da Ilustración

Mar, 02/02/2021 - 13:20 — IES A Sangriña

O Día da Ilustración celébrase cada ano o 30 de xaneiro, coincidindo co día do nacemento de Castelao. Ademais de lembrar e reivindicar o papel dos profesionais da ilustración na industria cultural, cada ano é homenaxeado un ilustrador histórico galego. A protagonista deste ano é Lolita Díaz Baliño.

Así, o instituto organiza un concurso para celebrar e difundir a ilustración como unha actividade presente no mundo do libro e que acompaña e dá entidade a moitas obras, poñendo como tema sempre unha obra da literatura universal que sexa susceptible de ser debuxada. Nesta ocasión a obra escollida para realizar a ilustración é Frankestein ou o Prometeo moderno de Mary Shelley. A ilustración realizarase en formato horizontal ou vertical DIN A-4 (21 x 29,7cm) en papel, podendo empregar a técnica que se considere. Antes de poñervos mans á obra, consultade as bases no documento adxunto.

1 adxunto

REPARTO DE MÁSCARAS PARA O PROFESORADO

Xov, 21/01/2021 - 06:50 — IES A Sangriña

A Xunta de Galicia vén de enviar unha partida de máscaras hixiénicas reutilizables ao IES A SANGRIÑA co obxectivo de cubrir as necesidades de todo o persoal do centro ata final de curso. O material, en paquetes de cinco unidades homologadas, de 25 lavados cada unha, será distribuído no inicio deste segundo trimestre. Polo tanto, desde hoxe mesmo o profesorado do centro pode recoller un paquete de máscaras da caixa que se habilitou para tal efecto na sala do profesorado.

A Dirección.

Medicións da concentración de CO2 nas aulas.

Ven, 04/12/2020 - 12:01 — IES A Sangriña

A partir dos datos recollidos na táboa anexa, resolvemos que as medicións amosan un rango de concentración de CO2 aceptable cando medimos con portas abertas e fiestras abertas. É imprescindible manter portas abertas e fiestras abertas como norma COVID, norma que temos que respectar independentemente das condicións meteorolóxicas exteriores. Cumprindo esta norma COVID, o noso centro é seguro e garante unhas circunstancias sanitariamente aceptables.