Taboleiro

O pasado mes de maio dous grupos de alumnado STEMbach do noso instituto foron convidados a remitir as memorias dos seus traballos de investigación, e finalmente foron seleccionados para a 10ª Conferencia Internacional de Psicología Comunitaria y Encuentro de experiencias sociocomunitarias en extensión universitaria, que terá lugar entre o 10 e o 13 de setembro de 2024 na Universidad de la República Uruguay (Udelar), en Montevideo.

Estes traballos, defendidos nas convocatorias 2022-23 e 2023-24 do STEMbach, son "Estudo antropolóxico e histórico do papel do IES Arcebispo Xelmírez II nos cambios do barrio de Vite", de Antía Brandariz Rodríguez e Brais Neira Ferro, dirixido pola Dra. Cristina Sánchez-Carretero (Incipit-CSIC), e "Revisión e avaliación de programas de tratamento para agresores de violencia de xénero", de Iria López Romeo e Alba Vidal Seijo, dirixido polo Catedrático de psicoloxía forense da USC, Ramón Arce Fernández, e titorizados ambos polas profesoras do instituto Cristina Brión Calo e María del Carmen Rey Sobral.

O equipo coordinador dun dos grupos de traballo expresou un gran interese polos proxectos desenvolvidos, destacando que foron realizados nun centro público de ensino secundario, no contexto dun programa que impulsa a excelencia académica e as vocacións científicas, nomeadamente no eido das Ciencias Sociais. Así mesmo, considerou que a presentación dos mesmos na Conferencia permitirá compartir o coñecemento obtido e crear ou enriquecer un reservorio de experiencias de boas prácticas.

Moitos parabéns ao alumnado autor dos traballos, así como ás súas titoras e directores.

O xoves 21 de marzo foi a data elixida para a defensa dos traballos de investigación da promoción 2022-24. A presidenta da xornada foi a Prof. Dra. Mª Elena Vázquez Cendón, decana da Facultade de Matemáticas da USC, e cunha impresionante traxectoria docente, investigadora e divulgadora, así como impulsora de innumerables actividades e proxectos de difusión e fomento da ciencia e das matemáticas.

Foi hai xa seis cursos, no ano 2018, cando botou a andar este programa en 14 centros de Galicia, un deles o Arcebispo Xelmírez II, naquel momento en fase inicial e que hoxe constitúe un proxecto consolidado con moitos máis centros participantes.

Neste xa longo percorrido deste programa no noso centro, temos conseguido incorporar ao mesmo alumnado das modalidades de Ciencias Sociais e Humanidades do bacharelato, ademáis do alumnado da modalidade Científica que con maior frecuencia se asocia ao ámbito STEM. Foron moitos os proxectos de investigación desenvolvidos e defendidos con éxito, nos máis diversos campos e temáticas.

Os traballos defendidos e o alumnado autor dos mesmos foron os seguintes:

"Detección de xenes de resistencia a antibióticos, codificados en plásmidos transmisibles de bacterias entéricas illadas dun curso fluvial" por Alejandro Gondelle Peinó, dirixido polo Prof. Dr. Carlos Rodríguez Osorio e pola Dra. Ana Vences Lorenzo, e titorizado por Rosa P. Quintela Sende e Juan Quintáns Rial.

"Revisión e avaliación de programas de reeducación de agresores en violencia de xénero" por Iria López Romeo e Alba Vidal Seijo, dirixido polo Prof. Dr. Ramón Arce Fernández, e titorizado por María del C. Rey Sobral e María Cristina Brión Calo.

"Análise do comportamento de fuxida fronte a humanos en especies de aves presentes en parques urbanos e zonas rurais de Santiago e a súa contorna" por Manuel Leal Cernadas e Alén Espiña Otero, dirixido polo Prof. Dr. Jesús Domínguez Conde, e titorizado por Rosa P. Quintela Sende e Juan Quintáns Rial.

"Aplicacións do concepto de inversión respecto dunha circunferencia á inversión de curvas planas e á análise de mecanismos" por Manuel Sande Vigo, dirixido polo Prof. Dr. Manuel E. Ladra González, e titorizado por Luis Mateo Sáez Abuín.

"Cálculo de ecuacións de sólidos de revolución mediante cuaternios" por Nuria Guerra Casal, dirixido polo Prof. Dr. Daniel Cao Labora, e titorizado por Luis Mateo Sáez Abuín.

Todos eles acadaron a cualificación máxima de 10 puntos, e os membros das comisións cualificadoras (a propia Elena Vázquez Cendón e un docente ou investigador especialista no campo, designado especificamente para cada un dos traballos, ademáis do coordinador do programa STEMbach no centro) destacaron a gran calidade de todos eles, que valoraron equivalente á dun bo traballo de fin de grao (TFG) universitario.

Parabéns a todos eles.

https://cienciaxelmirezii.wordpress.com/blog/

O doutor Miguel González Blanco, investigador do CiMUS da USC, pronunciou no noso centro unha conferencia para o alumnado STEMbach.

Nesta charla, puido compartir co alumnado a súa traxectoria investigadora, desde a súa etapa predoutoral ata a actualidade. Ademáis, explicou con enorme claridade os aspectos esenciais do traballo que desenvolve na investigación de reparación do ADN.

Moitísimas grazas ao Dr. González Blanco, así como ao CiMUS, por esta motivadora conferencia, e por compartir con nós o seu valioso tempo e os seus inmensos coñecementos.

https://cienciaxelmirezii.wordpress.com/blog/

Fixemos o luns 11 a viaxe de ida, en voo directo desde Santiago a Xenebra, sen incidencias.

Á chegada, xa de noite aínda que eran pouco máis das 17:00, a cidade recibiunos con chuvia. Tras baixar do aeroporto á estación Cornavin, no centro, en tren, e confundirnos de saída  chegamos ao aloxamento e rexistrámonos moi rápido.

Así, deunos tempo a saír, xa sen chuvia, a dar unha volta polo mercadiño de Nadal, que aquí se chama Noël au Quai, e chegar á zona vella para un pequeniño paseo.

https://cienciaxelmirezii.wordpress.com/blog/

A pasada semana, do 25 ao 29 de setembro, dúas profesoras e un profesor do centro asistiron en Nicosia a un curso de formación dentro do proxecto Erasmus+ BYOD-learning, que ten como obxectivo a creación dunha plataforma de vídeos didácticos de matemáticas. O proxecto está xa no seu segundo ano e este curso pretende formar ao profesorado na creación de vídeos e no uso da plataforma de cara a aproveitar as súas funcionalidades. Dúas profesoras participaron como asistentes e un profesor como relator dun dos módulos do curso.

Foi un pracer volver ver aos socios do proxecto, intercambiar opinións e experiencias e coñecer as realidades educativas dos países participantes no consorcio. Chipre é un país moi interesante, moi distinto de Galicia, polo que a visita tamén foi moi produtiva desde o punto de vista cultural.

Nestas primeiras semanas do curso 2023-24, está dispoñible a exposición "Astrónomas" no vestíbulo principal do centro. Dáse así continuidade ás semanas finais do curso anterior, nos que xa estivo exposta.

Anímate a solicitar unha visita ao teu titor ou titora, ou ao profesorado de calquera materia!

O noso centro accede, a través do Observatorio Astronómico "Ramón María Aller", da USC, e da profesora de astronomía Josefina Ling, ao préstamo da exposición. Están expostos os dezaseis carteis que a forman, que tratan numerosas figuras femininas relevantes na astronomía e a astrofísica a nivel mundial, e diferentes contidos relacionados con este eido científico. Cada cartel leva un código QR que podes escanear para acceder á web do proxecto "Astrónomas", que é moito máis amplo que o que se expón: https://astronomas.org/.