O pasado 18 de outubro e dentro do Plan Director, o axente de Tráfico José Luís deulle unha charla ao alumnado de 5º e 6º de primaria sobre a seguridade viaria.

Cando falamos de seguridade viaria para nenos/as, estámonos referindo ao conxunto de normas, coñecementos, prácticas e hábitos directamente relacionados con tránsito así como coa circulación tanto de peóns como de condutores na vía pública.

José Luís explicou en que consistía o seu traballo e con que medios realizan o seu labor.

Fixo consciente ao alumnado da importancia de cumprir as normas e recalcou medidas como:

- A obrigación de cruzar sempre polo paso de peóns, mirando a ambos lados antes.

- No caso das aldeas, onde non haxa pasos de peóns, afastarse das curvas para cruzar.

- Ao camiñar pola vía pública non usar auriculares. A audición é fundamental para previr calquera tipo de problema.

- Ao montar en bicicleta, hai que levar posto o casco. (Obrigatorio sempre para menores de 16 anos aínda que recomendable en todas as idades).

Os nenos e nenas participaron activamente na charla e foron moitas as experiencias persoais que compartiron co axente e cos compañeiros/as.

Hoxe, con motivo do Día Internacional do Libro, o alumnado de 5º e 6º E. Primaria participou nunha actividade organizada polo Departamento de Cultura do Concello de Arzúa. 

A exposición Kinetiko está na Capela da Madanela. Ten nove pezas automatizadas, entre as que podemos atopar autómatas musicais que a partires de mecanismos crean sons e ritmos,  monicreques con efectos especiais, un teatriño de guiñol automatizado homenaxeando ao tradicional títere de cachiporra...

O xogueteiro Manu Taboada e o titiriteiro Ero Vázquez Cabrera, baixo o nome de Xirapaus, mostráronnos e explicáronnos a historia e mecanismo de cada peza conseguindo atrapar a atención das nenas e nenos en todo momento.

Grazas ao Concello de Arzúa por contar con nós!

O día 8 de abril, o alumnado de 6º E. Primaria visitou o Museo do Pobo Galego e o casco antigo de Santiago de Compostela. Esta é unha pequena reportaxe desta viaxe que fixemos. 

 PREME AQUÍ

O martes, 21 de setembro o alumnado de 6ºEP visitou as escavacións arqueolóxicas que se están a realizar en Castro Curbín.

Recibiunos na entrada un dos arqueólogos e axudounos a interpretar a paisaxe que se ve ao chegar. 

Dirixímonos á entrada do castro e contounos que só van estar traballando na zona dez días, pero que esperan voltar pronto para continuar co labor que están facendo. 

Fixeron xa tres buracos. Nos dous primeiros non houbo sorte e só atoparon rocha, pero no terceiro si apareceron cousas moi interesantes: restos dos muros dunha casa do castro, un xogo de mesa da Idade de Ferro, moitos restos de cerámica, un broche... 

Moitísimas grazas por amosarnos a importancia de conservar esta parte do noso patrimonio cultural. 

O 16 de xuño, o alumnado de 5º A asistiu a un obradoiro sobre o marisqueo que se impartiu no noso colexio.

Primeiro, coa axuda dunhas gafas de 360 graos, os nenos e nenas viron un vídeo que falaba das distintas artes de pesca. Despois comentáronse as imaxes que máis os sorprederon e plantexaron as dúbidas que xurdiron durante o visionado do mesmo.

A continuación, baixamos ao patio e alí, coa axuda dunha lona do fondo mariño, presentáronse as diferentes especies co fin de descubrir o hábitat de cada unha. Aprenderon a diferenciar un longueirón dunha navalla, unha vieira e unha zamburiña, un berberecho e unha ameixa...Tamén tiveron nas mans unha réplica dunha nasa e viron que para lastralas ponse cemento no fondo ou unhas pedras. 

Son moitas as actividades que este curso xiraron arredor da temática do medioambiente. Na aula de 5ºA rematamos este mural no que traballamos distintos aspectos relacionados co tema. Nel aparecen as nosas propostas para evitar a contaminación do aire, da auga e do solo. Tamén, consellos que debemos ter en conta para contribuír a un desenvolvemento sostible do noso planeta e, por último, a nosa aposta polas enerxías limpas. 

Esta primeira semana de xuño tamén colaboramos na elaboración do mural colectivo que se colocou na entrada do colexio. 

Durante o mes de maio fixemos varias actividades relacionadas coas Letras Galegas. 

Por un lado, preparamos a nosa caricatura cunha parte da biografía de Xela Arias para incorporar ao mural colectivo, que se colocou na entrada do colexio. 

Nun taller de escritura organizado na clase de Lingua Galega, fixo cada alumno e cada alumna o seu propio poema, inspirándose nas cousas que nos chaman a atención das nosas familias. E, despois de escoitar varios poemas do libro "Darío a diario" de Xela Arias, volcaron os seus sentimentos nun folio, onde pegaron a foto familiar. Deixamos aquí estes poemas tan fermosos!

  PREME AQUÍ

Esta actividade foi compartida tamén polo alumnado de 6ºA e, entre as dúas titorías, montáronse dous murais nos que se colocaron os traballos realizados. 

Tamén practicamos a comprensión lectora e o resumo a partir dunha obra inédita de Xela Arias que se titula "Non te amola!"; un libro que supón a primeira achega á narrativa desta escritora. Estes son algúns dos traballos realizados a partir dos contos deste libro. 

Por último, achegámonos á vida e obra de Xela Arias a través dos recursos interactivos subidos á plataforma educativa E-Dixgal. 

Este mes de maio na clase de 5ºA fixemos varias actividades que xiraron arredor da temática do acoso escolar. 

Proxectamos a película Wonder, que gozou de moi boa acollida por parte dos rapaces e rapazas. Wonder narra a vida de Auggie Pullman, un neno de 10 anos nado cunha malformación facial - a Síndrome de Treacher Collins-, que lle obrigou a vivir de hospital en hospital sendo operado ata en 27 ocasións. A súa vida transcorre entre as paredes da súa casa, xunto á súa familia e a súa cadeliña Daisy. A súa nai, encargouse de educalo ata o de agora, pero chegou a hora de que coñeza mundo e se enfronte ao seu maior reto: ir por primeira vez ao colexio e tentar ser aceptado por profesores e compañeiros, a pesar de ser diferente ao resto pola súa discapacidade. 

Esta película aborda temas como o acoso escolar, a autoestima, o autoconcepto, o respecto e a tolerancia cara á diferenza, a aceptación... 

Na clase de Plástica fixeron estes collages, en grupos de dous e un de tres,  nos que plasmaron o seu rexeitamento a todo tipo de acoso.

O alumnado de 5ºA participou na actividade proposta  este curso a todas as titorías; o "bookface". Estas son algunhas das montaxes que se fixeron:

Algunhas alumnas e algúns alumnos animáronse e gravaron a reseña dun libro para compartir cos demais:

O día 7 de abril celébrase o Día Mundial da Saúde. Esta data foi escollida en conmemoración á fundación da Organización Mundial da Saúde (OMS) e coa necesidade de crear conciencia sobre as enfermidades mortais mundiais e crear hábitos sans nas persoas. 

O alumnado de 5ºA participou no mural colectivo que se colocou na entrada do centro.

Tamén fixo este traballo onde se recollen os hábitos saudables que se traballaron na nosa aula. 

 PREME AQUÍ