Xa temos con nós un novo número da Revista Batea, que este ano está cargado de novidades e de actividades que se realizaron no noso centro con diferentes seccións (creacións literarias, proxectiños, saídas,...) entre as que destacan dúas figuras: Carlos Casares, autor ao que se lle dedica este ano o Día das Letras Galegas, e, Marga Maderal Cal, unha mestra que formou parte deste centro e que deixou unha fonda pegada no alumnado e no profesorado. Agardamos que sexa do voso agrado.

O pasado martes 9 de maio, a canle autonómica de televisión de Galicia (TVG) emitiu un programa, sobre as 10:30 da noite, titulado “O MELLOR CHOCO DO MUNDO” no que se fixeron reportaxes de diversos lugares da provincia, e entre eles, Redondela, onde falaron de como capturaban os chocos e tamén fixeron unha reportaxe no CEIP de Cedeira, xa que a nosa mascota da Biblioteca tamén é un choco, “O Choco Tinteiro”. Estiveron falando co director Xosé Luis, con distintos mestres e mestras do centro e co alumnado. Explicáronlle como xurdiu a idea da nosa mascota e o que representa tanto para os mestres e mestras como para o alumnado. Podedes ver o referente ao noso cole a partir do minuto 42:41

O venres 7 de abril os alumnos e alumnas de sexto fixemos unha videoconferencia co CEIP Outeiro das Penas, de Cesantes. Nela presentámonos xa que hai a posibilidade de que compartamos clase o ano que vén no Instituto. Foi unha primeira toma de contacto, na que descobrimos que algúns nenos xa se coñecían por coincidir en diversas actividades, onde, tamén, contámonos que actividades facemos nos coles, que proxecto traballamos, que visitas fixemos, de que nos disfrazamos no entroido, en fin, pasada a vergonza inicial foi un intercambio do máis produtivo. Xa quedamos en mandarnos uns e-mails para presentarnos con máis detalle e tamén en vermonos no centro de Redondela antes do fin de curso para facer algunhas actividades.

Logo do mal tempo que fixo o 30 de xaneiro e que impediu a celebración dos actos previstos para o Día da Paz, o pasado 8 de febreiro, por fin poidemos realizalos. Así, celebrouse a Carreira solidaria para recadar fondos para a ONG Save the children. A proposta: Quilómetros de Solidariedade reclamaba a recollida dos fondos para a loita polos dereitos dos nenos en paises de África. Dentro deses dereitos, este ano sinalábase coma fundamental o acceso a auga potable. Puxemos a roupa deportiva, o dorsal da ONG e botámonos á rúa. Coma non podía ser doutra maneira, CEDEIRA TV fíxose eco da nova e preparou este programa...

Celebrouse en Vigo o acto de entrega dos premios PONTE NAS ONDAS. Tal e como se informou no mes de xuño, o noso colexio obtivo o de "Mellor programa colaborativo". Na imaxe podemos ver un momento do acto.

Noraboa a todos/as e grazas pola participación da comunidade educativa.

Para ver máis fotos podedes facer clic aquí.

Máis información no facebook de Ponte nas ondas.

O Apalpador é un personaxe mítico galego que baixa polo Nadal a levarlles os agasallos aos nenos. Entra de noite nos seus cuartos cando están durmidos e apálpalles a barriguiña por ver se están mantidos e déixalles, ademais dos xoguetes, unha presa de castañas.
Ten un tronco común con outras tradicións europeas e do norte de España (Olentzero basco e Esteru astur-cántabro) e probablemente a mesma orixe, pero que desgrazadamente en Galicia estaba practicamente esquecido.
O rito da Noite do Apalpadoiro foi descrito por varios estudosos e a figura do personaxe refírese na zona da montaña lucense e, nomeadamente, no Courel.
No oriente ourensán existen referencias a este personaxe aínda que, nalgúns casos, con outros nomes e, noutros, con atribucións menos simpáticas como son as de espantar aos nenos.
Neste conto, Xoán G. pretende espilo das deturpacións que ben poden responder a superposicións pouco afortunadas doutros costumes e quedarse co concepto positivo do personaxe e co seu agarimo.

Facede clic na imaxe para ler o conto.

http://www.apalpador.com

A Coordinadora de Traballadores/as de Normalización da Lingua presenta o vídeo "Gústame… o galego!"

Despois do éxito nas redes sociais das fotos da acción "Gústame o galego", chega agora un divertido e entusiasta vídeo co que moita xente quere seguir dicindo que lle gusta o galego.

A comunidade educativa do IES de Chapela realizou un fermoso traballo de promoción da nosa lingua. Alumnado, profesorado, familias e persoal non docente protagonizan este 2lipdub2 titulado "EU FALAREI". Parabéns a todos/as.

Xa está dispoñible a última edición das "Normas ortográficas e morfolóxicas do idioma galego". O pasado día 19 de abril saíu a número 23. Coa finalidade de evitar a disolución, a depreciación e a subalternización da nosa lingua, a Academia ofrece á sociedade galega unha nova edición das Normas que non amosa mudanza respecto a edicións anteriores.

En palabras do presidente da Academia na Presentación á presente edición: "O noso idioma é aquel que, sobre a ruína do antigo Imperio de Lacio, como dixera en frase célebre Saco Arce, naceu e evolucionou na mente, no corazón e nos beizos do pobo galego. É a nosa magna obra colectiva que, neste intre, se encontra aínda ameazada. Sería loucura concibir a salvación da nosa lingua sen o recurso a unha normativa ao alcance de todos os ámbitos do seu uso social: das administracións ás prácticas cotiás, pasando pola ciencia e o coñecemento universais, pola literatura e pola escola en todos os seus graos e niveis".

Pode consultarse ou descargarse facendo clic aquí ou na imaxe.

O Servizo de Normalización Lingüística da Universidade de Santiago de Compostela publicou unha guía para utilizar a linguaxe de xeito non sexista. Pódese descargar facendo clic na imaxe.