IES Avelina Valladares

O alumnado de 1º, 2º e 3º ESO do noso centro participou o pasado venres 15 de novembro no Cros zonal Xogade da Estrada xunto co outros 1400 rapaces e rapazas dos centros educativos do concello e mais de Cuntis. A carreira tivo lugar na contorna das piscinas municipais e foi organizada pola Secretaría Xeral para o Deporte da Xunta de Galicia en colaboración coas Agrupacións Deportivas Escolares.

O Departamento de Educación Física participa dende hai anos no programa XOGADE, un programa de actividade lúdico-deportiva que ten como finalidade levar a actividade a todos os concellos galegos, ao tempo que dá a oportunidade á comunidade escolar galega de practicar e competir con outros colexios e clubs.

O pasado venres 8 de novembro a Biblioteca acolleu a entrega de galardóns aos textos literarios que o alumnado de todos os cursos elaborou no transcurso do Obradoiro de Escritura Creativa que impartiu Chema Gómez de Lora, escritor, dramaturgo e profesor de Filosofía e de escrita creativa. A actividade, que organizou o Departamento de Lingua Castelá, desenvolveuse entre o 21 e o 25 de outubro.

O profesor conduciu e motivou o alumnado a crear os seus propios textos a través de "Técnicas para escribir con imaginación y libertad a través de juegos ágiles y espontáneos" e, a teor do lido, do visto e do oído, os mozos e mozas do noso centro xogaron e experimentaron coa linguaxe para crear unhas historias do máis suxerentes. Como mostra representativa do seu traballo, Chema seleccionou os seguintes textos, que recibiron cadanseus obsequios, mais de seguro que foi un labor ben difícil. Noraboa a todos os alumnos e alumnas e moitas grazas, un curso máis, ao noso profesor convidado por esta semana que deixou pegada en nós. 

Estes son os textos de Antía, Luján e Manuela (1º ESO), Nerea (2º ESO), Yuriana (3º ESO) e Sara Cortizo (4º ESO).

Iphixenia na porta do súper: o teatro que defende a sanidade pública a través dunha moza de barrio.

Este venres, ás 21:00 h, no Teatro Principal da Estrada represéntase a obra Iphixenia na porta do súper, unha revisión contemporánea do mito clásico de Eurípides. 

Trátase dunha brillante versión premiada como mellor texto do 2015 nos UK Theatre Awards for Best New Play, que se converteu nun dos monólogos máis premiados da última década.

Estreada xa en varios países cun éxito rotundo, agora chega por primeira vez á Estrada e en galego!

É un emocionante monólogo que fala das consecuencias dos recortes sociais a través da vida da súa protagonista de clase baixa. A rapaza posúe unha personalidade magnética que nos amosa sen filtros e con humor a humanidade que se esconde tras as colas na atención primaria, recorte de camas hospitalarias, ausencia de médicos... 

Unha historia de sacrificio, dignidade e esperanza. 

Se queres asistir á función, preséntate mañá, antes das 21:00 h., na porta do Teatro Principal da Estrada; indica que es alumno/a do IES Avelina Valladares e conseguirás a entrada cun desconto!

Anímate! Por só 3 euros, poderás desfrutar desta emocionante obra de teatro.

O pasado mércores 30 de outubro celebramos o Magosto e mailo Samaín. E, como manda a tradición no noso centro e nesta celebración tan popular do outono galego, demos boa conta das castañas asadas acompañadas de panceta, chourizo e pan, grazas ao bo facer e ao traballo do mestre Ramiro e o alumnado de 4º ESO, que tamén se encargou dos xogos e da ambientación musical da festa. Sen eles, e sen a coordinación da profesora Ana Mesego e demais colaboradores/as entre o profesorado e o persoal non docente, non sería posible celebrar o magosto un ano máis. 

E, para rematar a xornada, ademais do arrecendo das castañas asadas, dos risos, dos disfraces máis terroríficos e orixinais e do bo ánimo co que compartimos este momento de convivencia escolar, aínda nos agardaban as lambonadas do Concurso de Doces do Magosto e do Samaín. O xurado, composto por alumnado, profesorado e María da Cafetería, tívoo moi difícil para escoller os doces caseiros máis sabedeiros e mellor presentados. Se alguén non os catou, aquí tedes unha boa mostra destas sobremesas de castañas, cabazas, noces, mazás... Receitas que saben de medo!

Así como a poeta agardaba un novo día, as ansias de liberdade e democracia levaron o pobo portugués a tomar as rúas un 25 de Abril de 1974. E nós, no 50º aniversario da Revolução dos Cravos, tivemos a oportunidade -e a sorte- de contarmos coa xornalista estradense Tereixa Constenla para coñecer este acontecemento histórico fundamental da historia contemporánea portuguesa a través da conversa que mantivo co alumnado de 4º ESO e de Lingua Portuguesa de 2º ESO arredor do seu libro Abril é un país (Kalandraka, 2024). 

O 22 de outubro, ás 10:25 horas, constituíuse a Xunta Electoral, quen, de acordo coa lexislación vixente procede a:

1. Aprobar e publicar os censos electorais (dispoñibles na Secretaría do centro para consulta). Prazo límite para presentación de reclamacións: 8 de novembro, mediante escrito dirixido á Xunta Electoral. 

2. Concretar o calendario electoral:

En ocasións, os acontecementos máis pequenos, as accións individuais e as xentes humildes e case esquecidas escriben as páxinas máis grandes da Historia. E iso aconteceu nun abril de 1974 en Portugal. No 50º aniversario da Revolução dos Cravos temos a sorte de contar coa xornalista estradense Tereixa Constenla no noso centro para conversar co alumnado en torno aos "heroísmos descoñecidos" que fixeron posible o acontecemento máis marcante do devir do pobo portugués e que protagonizan a súa obra Abril é un país (Kalandraka, 2024).

A xornalista Tereixa Constenla Fontenla é na actualidade a correspondente en Lisboa do xornal El País, foi xefa da sección de Cultura do mesmo diario e redactora do suplemento cultural Babelia. Antes de se dedicar ao xornalismo cultural, traballou como reporteira de temas sociais en Andalucía para diversos medios. Algúns dos seus artigos recibiron galardóns como o Premio Unicaja de Artículos Periodísticos (2013). En 2021 publicou Cuaderno de urgencias, un libro autobiográfico que é a un tempo carta de amor e de duelo, unha celebración da vida.

En Abril é un país, a autora combina a investigación documental e a entrevista a moitos dos protagonistas da Revolução dos Cravos, rescatando momentos épicos acontecidos naquela mañá do 25 de abril de 1974 no que o pobo saíu á rúa para abrir paso á democracia e ás liberdades.

Esta tarde botou a andar o Club de Lectura do alumnado de 1º e 2º da ESO, que se suma neste curso ao grupo de rapazas e rapaces lectores de 3º e 4º ESO e á estrea dun novidoso Club de lectura de persoas adultas que xa coñece o primeiro título da súa andaina: Coa man esquerda, de Xabier Quiroga.

Onte, sábado 19 de outubro, deu comezo un ano máis a colaboración dos centros escolares co "Recuncho da Lingua", a sección que Pilar Bernárdez dirixe no programa As mañás do sábado de Radio Estrada. E que mellor que estrear a tempada cunha homenaxe a Avelina Valladares, a poeta, música, articulista e muller avanzada ao seu tempo que lle dá nome ao noso instituto dende este curso. No vindeiro ano 2025 cúmprense 200 anos do nacemento da Cantora da Ulla e o estudo, a atención e a reinvindicación da que foi obxecto en forma de xornadas, roteiros, publicacións, etc. merecen a celebración desta efeméride, reclamada tamén, como en tantas ocasións, dende este Recuncho da Lingua no que participaron os CEIP Pérez Viondi, o CEIP do Foxo e o CEIP Cabada Vázquez, xunto co noso centro.

Para conmemorar o Día das Bibliotecas Escolares, o alumnado de todos os cursos do noso centro participará na semana que vén nun Taller de Escritura Creativa impartido por Chema Gómez de Lora e organizado polo Departamento de Lingua Castelá e a Biblioteca.

O escritor, dramaturgo e profesor de Filosofía e de escrita creativa xa estivo connosco no curso pasado para guiar os rapaces e as rapazas nunha incursión pola arte dramática que deu os seus froitos coa elaboración de textos teatrais así como as súas posibilidades representativas.

Chema Gómez de Lora é licenciado en Filosofía, posúe un Máster en Guión, Historia e Estética do Cinema pola UAM e foi profesor de Estética en la Universidad Politécnica de Madrid, ademais de mestre de Filosofía en diversos centros de secundaria. Ademais, publicou diversas obras de lietartura infantil e xuvenil e ensaios de arte. O seu interese pola pedagoxía e a arte, ou por como ensinar as artes, está detrás da multitude de seminarios e obradoiros que impartiu sobre animación á lectura, a didáctica da escrita creativa ou de arte e literatura, tamén en Museos como o Thyssen ou o Guggenheim.   

En cumprimento da RESOLUCIÓN do 10 de setembro de 2024, da Dirección Xeral de Ordenación e Innovación Educativa, pola que se establece o calendario para a realización de eleccións de membros dos consellos escolares de centros docentes sostidos con fondos públicos, o sorteo dos membros da Xunta Electoral terá lugar o día 18 de outubro ás 10,30h na Secretaría do centro.

A Xunta Electoral estará integrada pola directora do centro, un profesor ou profesora, un pai ou nai ou titor legal, un representante do PAS, e un alumno ou alumna; designados os catro últimos por sorteo público no que se preverá a designación de membros suplentes.

Unha vez realizado o sorteo, serán enviadas as citacións aos membros titulares e suplentes para a constitución da Xunta Electoral, indicando a data e a hora.

Co inicio do curso, retoman a súa actividade os nosos Clubs de Lectura, que están a ter unha grande acollida por parte do alumnado dos diferentes cursos. E con esa mesma intención, a de facer comunidade arredor dos libros e da lectura, bota a andar neste outono un "Club de lectura para persoas adultas".

En que consiste? 

En ler un libro e compartir esa lectura en grupo nunha reunión na que se intercambian impresións e valoracións dende as nosas experiencias e inquietudes. Non fai falla ser un experto lector, mais si ter vontade de ler e facer do libro un punto de partida que pode acoller o encontro cos autores e as autoras, o visionado dunha película, unha saída, etc.

Quen pode participar?

As familias, o profesorado, o persoal non docente, os ex-alumnos e alumnas e, en xeral, a veciñanza. 

Como se fai a inscrición? 

Enviando un correo cos nosos datos a ies.avelina.valladares@edu.xunta.gal ou a dalleqdalle@edu.xunta.gal (coordinador: Aleixo).

O alumnado de 1º ESO achegouse este pasado luns ata a Biblioteca para coñecela, saber como funciona e os recursos aos que teñen acceso neste espazo sobre o que xira boa parte das actividades complementarias e extraescolares do noso centro. 

Da man das profesoras Ana Mella e Beatriz Quintela, os rapaces e as rapazas recén chegados ao instituto coñeceron como se catalogan e ordenan os libros, o servizo de préstamo e outro tipo de materiais que teñen á súa disposición, como os xogos de mesa, as publicacións periódicas ou os taboleiros de xadrez, que ocupan a non poucos xogadores e xogadoras nos recreos. Nesta xornada de acollemento participaron, ademais, o profesorado do equipo da biblioteca e as titorías, que colaboran activamente na formación de usuarios.

Como vén sendo tradición, non faltou un chocolate ben quentiño e mais rosca para adozar esta benvida.

Co inicio do curso os taboleiros e as pezas do xadrez volveron tomar as mesas da biblioteca da man de Roberto Patiño, o profesor dunha actividade que xa podemos considerar clásica dentro do programa de extraescolares do noso centro xunto co teatro e os clubs de lectura. Esta mañá puidéronse ver caras veteranas xunto con outras caras máis noviñas que fan a súa primeira incursión no xadrez ou que xa a coñecen e acoden nos recreos a practicar as súas xogadas máis arriscadas.

A ANPA do IES Avelina Valladares renovou a súa directiva recentemente; en arquivo adxunto teñen o cargo de cada persoa, o seu nome e o contacto (enderezo electrónico).

É aconsellable que se asocien, xa que non só recibirán información de todas as actividades enfocadas ás familias, senón que tamén se beneficiarán de descontos ao longo do curso. Deben saber que a ANPA colabora na actividade de Piscina, que desenvolve o departamento de Educación física no 3º trimestre, achegando 5 euros por cada neno/a; ademais, sufraga con 3 euros as saídas extraescolares para as familias que son socias.

Para facelo, deben pagar unha cota anual única, por familia, de 15 euros.

DATOS DA CONTA:

• ABANCA
• ES88 2080 0506 23 3040021027
• CONCEPTO: COTA ANUAL SOCIO + Apelidos e nome do alumno/a + Curso en que se matricula.

Poden enviar o xustificante ao seguinte correo: anpaiestrada@gmail.com

O martes 8 e o mércores 9 de outubro terán lugar as presentacións cos titores/as dos seus fillos e fillas.

Primeiramente, reuniranse na Biblioteca co equipo directivo e a orientadora, na quenda que se especifica no cadro, e a seguir irán co titor ou titora correspondente á aula do seu fillo/a.

Reunión da ANPA, para tratar diversos asuntos de interese para todas as familias.

Día: venres 20 de setembro.

Hora: 20:30 h.

Lugar: Biblioteca do IES Avelina Valladares

Agardamos a vosa asistencia!

Acuarela na que Rosa de Cabanas dá rostro a Avelina en “Mulleres imaxinadas” / Fonte: Faro de Vigo.

Neste pasado curso escolar levouse a cabo un proceso participativo no que se implicou a toda a comunidade educativa e que conduciu ao cambio de denominación do noso centro educativo.  

Así, o antigo IES Nº1 pasou a ser IES Avelina Valladares, logo de ser aprobado polo Consello escolar e ratificado pola Consellaría de Educación no DOG publicado  o 2 de agosto de 2024.

Esta denominación vén completar o recoñecemento que os centros educativos da Estrada dan aos seus persoeiros ilustres: Manuel García Barros, Antón Losada Diéguez e, agora, o IES Avelina Valladares, que constitúe o único centro educativo da contorna con nome de muller.

O próximo mércores 11 de setembro comeza o curso 2024-2025.

Todo o alumnado do IES Avelina Valladares poderá vir e marchar en transporte escolar, con normalidade. No centro organizaremos as presentacións dos diferentes cursos, que poderán consultar no arquivo adxunto xunto coas instrucións para este primeiro día.

O xoves, 12 de setembro, as clases desenvolveranse en horario habitual, de 8:45 a 14:25 h.

O luns, 9 de setembro, cada familia recibirá a través de Abalar Móbil a información da aula que lle corresponde ao seu fillo ou filla. 

Feliz regreso ás aulas!

Nos ficheiros adxuntos e na seguinte táboa figura a listaxe de libros de texto para o vindeiro curso 2024-2025.

Aconséllase non mercar ningún libro ata iniciado o curso en setembro, cando se resolva  o reparto do fondo solidario de libros de texto do centro.

No curso 24-25 incorpórase 4º ESO ao programa E-Dixgal, polo que os libros de texto para todo o alumnado do centro serán dixitais nalgunhas materias. 

Este xoves 22 de xuño celebramos a Graduación da Promoción 2020-2024. En presenza do resto dos seus compañeiros e compañeiras e do profesorado, os alumnos e as alumnas de 4° ESO pecharon unha etapa da súa formación, que agora vai continuar noutros centros.

Moitos parabéns a todos e a todas e moita sorte!

Nas Cíes descubrimos a pericia das aves
e a medida celeste onde reside a luz.
Bañámonos nas ondas
a compartir sulagos con dóciles palmípedas.

 Luz Pozo Garza

Este venres 22 de xuño o alumnado e o profesorado despediron o curso cunha excursión ás Illas Cíes, un espazo privilexiado para compartir unha xornada de convivencia e amizade  e para nos desexar un bo verán e unhas merecidas vacacións.

Vémonos á volta!

O pasado venres 22 de xuño tivo lugar en Rianxo a entrega do I Certame Cousas ao son da "Lela" de Castelao e da "Rianxeira", músicas que enmarcaron un acto ben lindo e acolledor que guiaron os alumnos e alumnas do Grupo Ekos.

Estes estudantes de 2º de Bacharelato do IES Félix Muriel, coordinados pola profesora Sofía Rama, presentaron un acto que puxo fin á primeira edición dun concurso que ten como finalidade homenaxear a obra e a figura de Castelao a través da elaboración dunha "cousa", isto é, dese xénero narrativo híbrido tan característico do autor que está a medio camiño entre o relato curto e o microrrelato, con elementos dramáticos e líricos, acompañado de deseño artístico.