Lingua Galega e Literatura
CHEGOU AOS NOSOS OÍDOS...primeira representación das Xornadas de Teatro Afeccionado: Maniféstate
Chegou aos nosos oídos... o inicio para este sábado 3 de febreiro do ( agardado) IX Encontro de Teatro Afeccionado que organiza a Agrupación Teatral Mariñán( ATM) na que, como xa temos dito varias veces, participan varias ex alumnos/as e ex profesores do Aguiar.
Rosalía de Castro anda solta. O seu sartego está baleiro desde aquela noite en que os vixiantes de seguridade creron oír algo no Panteón de Galegos Ilustres. Aquela mesma noite en que foi vista en Vedra por primeira vez. Por que marchou? Por que a Vedra? Que require? Nun programa de TV tentarán atar todos os cabos, responder a todas as preguntas e farán todo o posible por convocar en directo o espírito da padronesa. Rosalía se estás aí... Maniféstate.
Autor: Manuel Cortés.
Directora: Paula Carballeira.
Elenco: Isa Albela, Silvia Aldrei, Rosa Álvarez, Santiago Álvarez, Sonioa Balado, Inés Bouzón, Laura Iglesias, Manuel Mougán, Hixinio Rodeiro, Antonio Vázquez, Mayte Vázquez.
QUE GRAN SORTE CONTAR CON ESTE TEATRO CADA MES DE FEBREIRO EN BETANZOS!
QUE ORGULLO QUE SEXA XENTE DO AGUIAR OS QUE ESTEAN DETRÁS DE TAN FERMOSA INICIATIVA!
E SEGUE PARA O RESTO DO MES
TORNEO DE XADREZ. Nadal 2017
Un ano máis rematamos o trimestre e o ano co noso torneo de xadrez. Velai as fotos dos esforzados participantes e gañadores
NICO, DE ESO 1º D
OMAR, DE ESO 3º B
DIEGO, DE ESO 4º C
PARABÉNS AOS PARTICIPANTES E TAMÉN PARA O NOSO COMPAÑEIRO ÓSCAR GARCÍA
POLO SEU TEIMUDO LABOR DE PROMOCIÓN DO XADREZ.
NON SÓ COA ORGANIZACIÓN DESTES TORNEOS,
SENÓN CADA SEMANA COA ESCOLA DE XADREZ
QUE TEN LUGAR OS XOVES Á TARDE NO NOSO INSITUTO
Chegou aos nosos oídos....SOCIOLINGVISTIČEN RAZVOJ GALICIJE: Zgodovinski pregled in sedanjost de Lucía Díaz Vilariño.
Chegou aos nosos oídos... (e ningún día mellor que un 13 de decembro para dalo a coñecer) que a nosa querida ex do Aguiar, Lucía Díaz Vilariño, ven de impartir (o pasado mes de novembro) unha comunicación na Facultade de Hispánicas de Ljubljana (Eslovenia) co suxestivo título de : SOCIOLINGVISTIČEN RAZVOJ GALICIJE:Zgodovinski pregled in sedanjost. Que podería traducirse, para entendermonos, por "Desenvolvemento Sociolingüístico de Galicia". Un bo pretexto para falar_de e reflexionar_sobre Galicia.
Deste xeito presentábase a súa intervención en facebook:
DESARROLLO SOCIOLINGÜÍSTICO DE GALICIA:
Aproximación histórica hasta la actualidad
Jueves 30 de noviembre a las 17.10, aula 13
El último día de noviembre les invitamos a conocer Galicia. Se realizará una aproximación cultural, social y lingüística tanto a la Galicia histórica como a la Galicia actual. Se expondrán las características de esta nación de España, así como su desarrollo a través de los siglos, ligado íntimamente al desarrollo social del gallego. Se presentarán, asimismo, las bases del nacionalismo actual gallego. Finalmente se expondrá el papel actual de la lengua en la sociedad y se ejemplificarán ciertas diferencias con otras lenguas romances.
Lucía Díaz, graduada en Traducción e Interpretación por la Universidad de Vigo, está actualmente trabajando como auxiliar de conversación en Ljubljana en Jezikovna zadruga Soglasnik. Está cursando, asimismo, un Máster en Traducción Audiovisual en la Universidad de Cádiz que le permitirá especializarse en dicho campo. Ha trabajado como traductora para distintas asociaciones benéficas entre otros, traduciendo del inglés al español y al gallego.
E ista a crónica que a propia Lucía facíanos para esta web:
Foi unha charla na Facultade de Hispánicas da Universidade de Ljubljana.
A profe de Cultura e Civilización pediume se podía presentar Galicia e o que fixen foi presentar as cidades e o camiño, despois falar un pouco do desenvolvemento sociolingüístico de Galicia (como se comportou o galego e a sociedade galega a traves dos seculos).
Despois presentei un pouco a situacion actual (falantes, diglosia, etc) e unha comparación co castelan e co portugués.
Un pouco variado, pero creo que lles gustou!
A nos, dende logo, teríanos encantado poder asistir.
Seica cando veña de vacacións, ao cheiriño da tortilla e o caldo de mamá...
poderiamos escoitala no noso espectacular Salón_de_Actos_con_columna_centrada
Carta a un maltratador. "J'accuse" de Lourdes Nieto Mantiñán
J'accuse...!
Eu acúsoche, a ti, ao home que me axudou coas bolsas do supermercado. A ti, que me mirabas con afán de posesión detrás da estantería. A ti, que sorrías con autosuficiencia cando as miñas amigas che dicían que eras o máis guapo de todos os meus mozos. A ti, que as desaprobabas a todas elas. A ti, que me dedicabas palabras doces antes de durmir e me mirabas ata ver como as miñas pálpebras se pechaban. A ti, que xogabas cun guecho do meu cabelo coma quen acaricia as crinas do seu cabalo. A ti, porque preferías saír comigo antes que con ninguén máis. A ti, que odiabas todas as miñas saias. A ti, que me traías rosas todos os venres. A ti, que rías e ridiculizabas as miñas películas románticas. A ti, que acudías sempre puntual a buscarme ao traballo. A ti e a todos os vasos que rompiches polos teus enfados ao non verme alí. A ti, que apresabas a miña man entre as túas cando falabas cos teus amigos. A ti, que me mirabas con desprezo se ría demasiado alto. A ti,e ás túas delicadas caricias. A ti, e aos teus bicos na miña pálpebra entumecida polos golpes. A ti, que ao pasar o teu polgar facías esvaecerse as miñas bágoas. A ti que poñías a man enriba do pomo cada vez que tentaba abrir a porta. A ti que me facías cóxegas ata que escachaba coa risa. A ti, e á primeira bofetada que me deches na festa de Ano Novo. A ti, que xogabas horas co noso fillo. A ti,que lle suxeitabas o ombreiro con poderío se quería entrar no baño despois dalgunha das nosas disputas. A ti, que pedías a miña axuda para coser un botón. A ti,que limpabas ofuscado o sangue do baño. A ti, que me dicías o bonita que era e a pouca necesidade que tiña de poñerme maquillaxe. A ti, que vías como cubría as miñas mazaduras. A ti que chorabas as primeiras veces que xurei que me iría. A ti, que rías cando camiñaba cara á porta un dos últimos días que pasamos xuntos. A ti, eu acúsoche. E dígoche que agora camiño pola rúa, coa tranquilidade de saber, que alí onde o meu portazo se oia, onde os meus suspiros se respiren, alí onde alguén comparta o meu pranto.
Alí o teu reinado terá rematado.
Julia Nieto Mantiñán BAC 1ºD
Haikus contra a violencia de xénero
HAIKUS CONTRA A VIOLENCIA DE XÉNERO. 25.XI.2017
Contacontos Aguiar (pola Educación en Igualdade e a Coeducación) no Vales
Colaborando na organización das VI Xornadas de Formación e Sensibilización sobre a Atención á Diversidade xurdíu a posibilidade de que os nosos voluntarios da Biblioteca lesen contos aos nenos do colexio Vales Villamarín.
Fixose unha escolma de contos arredor do tema das Xornadas: "Educación en Igualdade e Coeducación". Á procura de voluntarios/as ...sen nengún problema. O grupo da Biblioteca asume o reto con contaxioso entusiasmo pese a que están ben cargadiños de traballo.
O xoves 25 entre a 3ª e 4ª hora máis de 20 voluntarios do noso centro desprazaranse ata o colexio veciño do Vales para realizar a actividade.
Parabéns pola iniciativa...que se repita moitas veces!
SEGUNDA QUENDA da saída didáctica tralas pegadas de Blanco Amor por Ourense
A pasada semana dabamos conta dunha actividade do Departamento de Lingua e Literatura Galega: unha saída a Ourense na procura das pegadas na cidade da magna obra de Eduardo Blanco Amor, "A Esmorga".
Á espera dunha crónica máis detida da actividade as primeiras impresións de alumnado e profesorado foron excelentes.
O martes 23 de maio toca repetir experiencia aos dous grupos de 4º da ESO que restaban por realizar a actividade, os grupos B e D. Desta volta estarán acompañados pola súa profesora Carmen Suárez e máis polos profesores Óscar García e Francisco Rodríguez.
E do mesmo xeito que na primeira quenda, a actividade remata coa convivencia de mediodía nun espazo termal.
( e tamén como na primeira quenda a temperatura estimada para todo o día volverá a estar arredor dos 30 graos.
É Ourense. Eche o que hai!)
Que llo deletree? Letras Galegas 2017
Da nosa amiga Sabela Arias. Atinando sempre!
Chegou aos nosos oidos.... Óscar García acada o accesit no XXI Certame de poesía "Francisco Añón"
Chegou aos nosos oídos.... e non podía ser mellor regalo para celebrar o Día das Letras 2017 , que Óscar García, o noso compañeiro "multifunción" ("profe" de galego, solista no coro Fa menor, "profe de xadrez", "proxelecta" do equipo da Biblioteca...), acaba de obter un accesit no XXI Certame de poesía "Francisco Añón" que convoca cada ano o Concello de Outes. Este galardón leva asociada a publicación da obra, que agardamos, con ilusión, poder ler .
Completa así o noso compañeiro un palmarés que tamén inclúe, entre outros, galardóns como "Ciencia que Conta 2013" de relatos , ou, os tamén de poesía, "Leiras Pulpeiro" de Mondoñedo, ou "María Mariño" de Teo....
Parabéns!
Piiiiiiiiiiiiii ππππππ Celebrando letras galegas πππππππππ piiiiiiiiiiiiiii
Neste día festivo e de celebración das letras galegas temos o pracer de presentar as catro esopías escritas en galego que resultaron premiadas na III edición do Concurso de Esopías que a Biblioteca "Sebastián Buedo" do IES Francisco Aguiar convoca coincidindo coa Semana da Ciencia e da Tecnoloxía.
Da calidade dos traballos presentados dá conta esta escolma das catro "galesopías" premiadas.
Parabéns para cantos participaron!
(Imaxe: Pin de -Tzina_en Dreams)
Ela é vida e cadea,
bolboreta do camiño,
faena sen aliño,
asustada, pasaxeira.
Contigo morrerían cen
no mar. Tormenta cega,
calada se achega.
Amén
Antonio Casariego Cubeiro
[1º A ESO]
(Imaxe: "Zapatos de payaso")
Así é como o atopo,
acuruxado na escura
noite, cos ollos
chorosos, indefenso,
quizais maxinando que
un día escapará desa
inopia de tantos
anos.
Diego Teijo Barral
[4º A ESO]
(Imaxe:"Alas rotas")
Cae e cala e chora.
Expoliada do propio
corpo sen xuizo
lexítimo. Inocencia
turbada, arruinada, tan
só nun instante. Está
selada. El, exento,
anda.
Irene Docampo López
[4º A ESO]
(Imaxe:"Ojo digital" )
Ter a foto, o ollar
idealista da persoa
amada, que queda
habitada. Calabozos
abertos, cadáveres das
ás que posuímos. Ecos
cobren as tardes
idas.
Julia Nieto Mantiñán
[4º A ESO]
(Resultou tamén premiada unha esopía escrita en castelán e do que foi autor Antón Iglesias, alumno de 2º BAC. Próximamente teremos ocasión de publicala para disfrute dos nosos lectores)
- « primeira
- ‹ anterior
- …
- 5
- 6
- 7
- 8
- 9
- 10
- 11
- 12
- 13
- …
- seguinte ›
- última »
![RSS - Lingua Galega e Literatura Distribuir contido](/centros/iesfranciscoaguiar/misc/feed.png)