O xoves día 12, un grupo reducido de rapaces de 4º da ESO fomos escollidos a través dun sorteo para visitar o cárcere de Teixeiro, famoso por albergar presos tan soados nos medios coma Rosario Porto ou Alfonso Basterra, pais e asasinos da nena de non máis de catorce anos Asunta Basterra.

   Con relatos tan arrepiantes como referencia quizais o aspecto lúgubre que o cárcere amosaba na lonxanía se viu incrementado. Os quilométricos muros e as fortes medidas de seguridade nada tiñan que ver co que o seu interior albergaba. Parecía case como entrar noutro mundo. A súa propia cafetaría, igrexa, hospital, xardíns, rúas...Pero o que realmente cambiou  por completo a nosa forma de velo foron os seus habitantes. Nada tiñan que ver cos prexuízos establecidos na nosa sociedade. Ninguén escondía o seu sorriso e nada máis chegar agasalláronnos cunha pulseira de coiro feita por eles a cada un de nós.

   O seguinte que tivo lugar foi un cúmulo de experiencias. Descubrimos os diferentes ámbitos nos que a vida dos condeados transcorre: clase de arte, música, cerámica, biblioteca... E mesmo nos deixaron vivir de primeira mana súa estanza no cárcere dispoñéndonos por parellas, elixidas ao azar, en diferentes celas durante dez minutos. O resultado: agobio, aburrimento... Penso que ninguén quedou con ganas de pisar unha. Despois disto, repartidos en pequenos grupos, tivemos a oportunidade de vernos cara a cara con aqueles presos que tiveran problemas coas drogas no pasado. O seu testemuño foi escoitado no silencio respectuoso que acompaña a aquelas historias máis duras. Falouse das diferentes drogas (legalizadas ou non), da importancia das amizades que un escolle e do apoio incondicional das familias. Non só coñecemos por primeira vez os efectos das drogas (aspecto que ningunha charla sobre esta temática podería amosar)   senón que aqueles que falaron connosco transmitíronnos o seus sentimento de superación e o seu desexo, como eles din, de empezar de cero. 

   Deixamos o cárcere ademais sabendo que a “terapia” foi recíproca, xa que mesmo algunhas das historias que saíron á luz non foran nin sequera escoitadas no seu día polos funcionarios que nos acompañaban.   É que para min as historias máis bonitas non son aquelas que deixan pegada en quen as escoita, senón as que tamén liberan da carga de sostelas a aqueles que as contan, demostrando así a súa valentía.

Julia Nieto Mantiñán 4ºESO A.

Un ano máis, e van 14 edicións, a Escola se Xadrez do IES Francisco Aguiar que dirixe o noso compañeiro Óscar García,  convoca ao alumnado a un torneo pola modalidade de partidas rápidas simultaneas. 

A Aula de Convivencia estivo ategada de xogadores de xadrez na mañá do 21 de decembro.

Quedaron finalistas Roque Bouza e Adrián Brandariz

Finalmente  alzouse co subcampionato Adrián Brandariz e como campión proclamouse a Roque Bouza

Compre agradecer tamén o labor durante toda a mañá, como reporteira gráfica, de Jessica Doldán.

O  14 de decembro fomos os de Agrupamento de 2º curso de galego á libraría Biblos.

Fomos andando dende o colexio ata á libraría. O camiño  fíxose moi curto por que fomos falando das nosas cousas e dos libros que iamos coller.

Cando chegamos á libraría aínda estaba pechada e tivemos que esperar uns minutos. Cando abriron , nós  empezamos a rebuscar entre os libros sen saber cal escoller. A  min gustábanme todos.

Máis tarde,  cando todos tiñamos elixido libro, Tucho, o dono da libraría, deunos unha charla sobre os libros:   as partes das que constaban , como se facían ...

A min fíxome moita ilusión ir á libraría, sobre todo por que podiamos escoller nós mesmos os libros que queriamos.

Eu escollín o libro de Esmeraldina a pequena defunta de Ledicia Costas. Escollino  porque me parece un libro moi misterioso e interesante. Ao chegar ao colexio xa estabamos desexando  que nos deran os libros para poder lelos, iamos todos os recreos á biblioteca para mirar se xa estaban expostos. Finalmente  puidemos levalos  o venres.

Foi unha experiencia moi divertida e agradable. 

Lucía Couceiro Torres .2ºB.

     O mércores 14 de decembro de 2016 a clase de reforzo de galego fomos a unha libraría en Betanzos chamada Biblos onde todos eliximos libros para a Biblioteca e tamén para ler na Hora de Ler.

Mentres estivemos alí ensináronnos as partes das que consta un libro, como facelo e publicalo. Creo que aprendín moito sobre isto grazas á charla que nos deu Tucho, o dono.

Despois de todo resultou unha experiencia moi divertida. Gustoume moito porque foi a primeira vez que entrei nunha libraría. Gustoume tanto que ese mesmo día volvín mercar máis libros.

Keanu A. Puente.

  O día mércores 14 de decembro, coa profesora de galego, fomos á libraría Biblos de Betanzos para comprar libros para a Biblioteca.

   Cando entramos, Tucho, o dono da libraría, ensinounos os libros e cada un de nós puido seleccionar o que máis lle gustaba para levar para a Biblioteca e tamén para lermos na clase na Hora de Ler. Logo diso, Tucho deunos unha charla sobre como se fai un libro e as partes das que consta.

   Foi moi interesante e divertido poder ir a unha libraría e poder elixir os libros que nos gustasen a nós. Foi unha boa experiencia para todos e gustounos moito. A min gustoume bastante ver que detrás de cada libro hai unha historia e un traballo que non moitos poden facer, moi poucas persoas poden chegar a escribir libros e poñer tanto sentimento neles. A min gustaríame escribir un libro, poder ser capaz de chegar ás persoas, poder ilusionar aos demais con algo tan especial coma os libros.

Laila Mailén Obelar, 2ºC

 Cando se vai á presentación dun libro, espérase atopar un breve resumo da obra a tratar e unha recomendación por parte doutro autor, editor...

Hai unhas semanas (9 de novembro), algúns alumnos de 4º da ESO do IES Francisco Aguiar asistimos á presentación do novo libro da coñecida autora, Ledicia Costas. E todos os presentes levamos unha boa sorpresa. Ledicia fixo máis que un intento de dar a coñecer a súa nova obra, Jules Verne e a vida secreta das mulleres planta, tratouse máis ben dunha conversa entre amigos. A autora mesmo se achegou a falar con algúns de nós antes e despois do evento, e preguntounos polos nosos estudos e afeccións. E durante a presentación do libro, non dubidou en compartir cos presentes algunha anécdota persoal e mesmo o relato do seu comezo como escritora, que parece saído dunha das súas novelas.

O mellor xeito de aprender e interesarse por algo é coñecer a razón da súa existencia, os segredos que se atopan detrás dunha liña ou mesmo as bágoas que caeron sobre o borrador. Por iso, coñecer ao autor dun libro, e máis sendo Ledicia, axúdanos a saber un pouco máis do mundo da literatura, o mundo cotián e o mundo que non se ve a simple vista.

Julia Nieto e Julia Medín 4ºA ESO.

Grazas á colaboración da Deputación Provincial e do Concello de Betanzos, mañá 23 de novembro  cerca de 120 dos nosos alumnos e alumnas terán a oportunidade de asistir a unha representación teatral que terá lugar na Aula de Cultura do Edificio Liceo de Betanzos a partir das 12.30. Participará nesta representación o alumnado de 4º da ESO e da materia de Literatura Galega do século XX en 2º BAC,  acompañados por varios dos seus profesores de Lingua e Literatura Galega e Historia. 

Trátase da obra que presenta Culturactiva co título "Retrincos de Castelao", dirixida por Diego Rey e protagonizada por Isabel Risco e Fran Rei. "A través dun texto de Diego Rey, no que teñen cabida cinco historias e unha ducia de debuxos dramatizados de Alfonso Daniel Rodríguez Castelao, a obra fai un percorrido por algúns dos textos e viñetas deste intelectual, achegándonos a súa enxeñosa e fascinante forma de ver a Galiza do seu tempo, ofréce- nnos un mosaico composto de retrincos dunha realidade galega atemporal, que nos antecede e nos outorga raíces."

 

Ao longo das tres primeiras horas da mañá do mércores 19 de outubro un nutrido grupo de máis de cen alumnos de 4º da ESO no Aguiar, poderán disfrutar dunha experiencia teatral no centro Ágora de A Coruña. A eles sumaranse os seis alumnos de 2º BAC que están a cursar este ano a materia de Xeografía e Historia de Galicia. Todos eles acompañados polos profesores Carmen Suárez moledo, Emilio Duque, María Pazos e Julián Ferrer.

Na saída asistirase á representación teatral da obra "Foucellas" que cun texto de Cándido Pazó, pon en escea a Compañía "Talía Teatro". Nela abórdanse aspectos vitais moi interesantes dos últimos momentos da vida deste maquis lendario. Él  loitou precisamente nesta zona ao remate da Guerra Civil e que foi, finalmente, capturazo en Oza dos Ríos e axustizado a garrote vil en 1952. 

Como anunciabamos hai unhas semanas a alumna de 2º da ESO, Mencía Rey Pardo, recibíu o segundo premio na VIII edición de Premios a Xoves Talentos na modalidade de relato curto.

Estivo acompañada na entrega polo profesore de Lingua e Literatura Galega, Óscar García.

Súmase así Mencía a un importante elenco de alumnos e alumnas do Aguiar que participaron con grande recoñecemento neste certame: Clara Veiga, Gala Sofía Sánchez, Paula Sánchez Regueiro, Violeta Silva 

PARABÉNS!

Nunha soleada mañá do Día das Letras Galegas  facíase entrega na Aula de Cultura "Xulio Cuns" de betanzos, dos galardóns concecidos no VI Concurso de creación Literaria do Concelo de Betanzos.

Nesta edición, de novo, o "Aguiar  volveu brilar da man das súas alumnas . Na modadlidade de bacharelato alzábase co primeiro premio a alumna de 1º BAC Inés López e cun accesit outra das nosas alumnas Amaia Tomé

O 17 de maio ás 12h no Edificio Liceo de Betanzos terá lugar a entrega dos Prenios ao VI Concurso de Creación Literaria con que o Concello de Betanzos convida aos escolares de todos os centros e niveis educativos do Concello a celebrar o Día das Letras Galegas.

Desta volta, unha vez máis, o Aguiar estará ben representado.