IES Castelao

Unha rosa é unha rosa

                                             Suso De Toro

Un grupo de alumnos de 1º Bac A e B lemos ao longo do 2º trimestre esta obra de teatro de Suso de Toro.

Unha rosa é unha rosa (Unha comedia de medo) cóntanos a historia da vella Rosa, que reparte a súa herdanza en tres partes, entre os seus dous sobriños, Pololo e Adela, e a filla doutra sobriña xa morta. A vella Rosa é seguidora na televisión dos telefilmes do detective tenente Colombo, do que sabemos da súa ascendencia galega. A morte da vella Rosa, en estrañas circunstancias, desencadeará unha divertidísima trama de enredo que remata cunha inevitable hecatombe tráxica.

Álvaro Aira  di que o pasou moi ben lendo o texto. Os personaxes, simples, provocan unha gran comicidade por como son descritos. Os seus diálogos son chispeantes e reflicten a súa personalidade ridícula. Tamén lle atraeu os cambios repentinos no guión e a concentración da acción cara ao final.

 Da mesma opinión é Santiago Leboreiro, que engade que ademais de ser divertida invita a reflexionar sobre o que se pode chegar a facer por avaricia, pois  a peza critica claramente á sociedade actual  da "comodidade e da ambición".

Outros alumnos comentan como o autor nos vai avisando do que lle vai suceder á vella Rosa a través das escenas da televisión en que  ve a serie do tenente Colembo.

Recomendan a súa lectura.

                                                       Álvaro e Santiago (1º Bac A e B)

FAIRY TAIL 1                                           HIRO MASHIMA

Outro grupo  do Club Manga lemos ao longo do mes de marzo  o volumen 1 da saga  FAIRY TAIL,de Hiro Mashima.

Este volume explica os primeiros capítulos da historia. Neles vemos como o gremio de meigos Fairy Tail é o máis temido de todo o reino. Alí conviven os magos máis duros, os máis atrevidos... e os máis destrutivos. Lucy é unha moza que quere ingresar en Fairy Tail para poder desenvolver os seus poderes máxicos e cumprir os encargos que lle poidan saír desde o gremio. É así como coñece a Natsu, un Dragon Slayer, mago que utiliza a maxia dos dragóns, e que lle permite converter en lume calquera parte do seu corpo. Xunto ao resto dos seus compañeiros, enfrontaranse aos encargos máis temibles e duros que lles poidan chegar, ata contra outros gremios que ansían o poder de Fairy Tail.

A obre gustounos moito porque está chea de aventuras e “romances”. Máis dunha vez aparecen inimigos cos que se fan máis fortes e fan novas amizades. Con todo, os “malos” son demasiados malos: Zeref é  é o mago maís malvado posible, Acnologuia era un home que mata a tantos dragóns que se converteu nun…, mais tamén son moi divertidos e entretidos.

                                                                                          Lara Agra

El pupitre de al lado   Takuma Morishige

En febreiro, algúns membros do Club de lectura de Manga leron e comentaron o libro de Takuma Morishige El pupitre de al lado. 

 Este manga, en xaponés Tonari no Seki-kun  e cuxa tradución literal é O meu veciño Seki,  é un obra que nos teletransporta á aula onde estudan os protagonistas, Yokoi e Seki.

Yokoi é unha estudante aplicada que senta ao fondo da clase, mentres Seki, o seu compañeiro de ao lado, non presta ninguna atención aos profesores e ás súas explicacións. Seki ponse a xogar con cousas que trae na súa carteira escolar .Yokoi tenta prestar atención en clase pero día tras día resúltalle imposible “grazas” ás travesura do seu compañeiro de pupitre. Travesuras que a pesar de que comezan sendo máis ou menos normais, como debuxar cousas na mesa, facer circuítos de dominó con gomas de borrar ou tecer, pronto se volverán máis e máis excéntricas. Estas distraccións  case sempre terminan custándolle unha regañina á rapariga, mentres que Seki parece ter o don de evitar calquera incriminación. Yokoi pídelle que atenda ás clases pero el non lle fai ningún caso.

A obra consta de varios capítulos autoconclusivos, tiras cómicas cunha extensión máis longa do habitual, que manteñen un mesmo esquema narrativo.

É unha obra moi entretida e interesante porque aínda que os personaxes non falan e o único texto que sae é o dos pensamentos de Yokoi, enténdese perfectamente. É  moi simpática, repleta dun humor moi branco. O ritmo é moi áxil e dinámico, grazas á curta duración de cada capítulo e da unidade de espazo, tempo e personaxes, que sempre adoitan ser os mesmo.

P. A. R., de 2º ESO A, di que este manga serve como unha boa lección do que NUNCA hai que facer na clase.

Os lectores recomendan este libro.

                                               Lynette Álvarez (1º ESO B) e P. A.R. (2º ESO A)

Texto

Durante o mes de xaneiro  os membros do club de novela histórica, de 3º ESO A, leron a obra de César Mallorquí La catedral. Escolleuse esta novela porque nos interesaba coñecer aspectos da vida da Idade Media e esta é a época na que se sitúa a acción.

Telmo Yáñez parte de Navarra cara a Bretaña porque foi elixido imaxineiro para participar na construción da catedral de Kerloc´h, financiada pola orde da Águila de San Juan. Pero esa catedral encerra crimes e macabras ofrendas. Esta Orde invoca en realidade ao diaño, e Telmo sairá vitorioso na súa loita contra o Mal.

Nesta obra, que nos gustou moito, mestúrase historia medieval, intriga e fantasía. Tal e como vemos no mapa que realizou Rosalía, Telmo parte de Estella a Bretaña e xa se nos vai presentando os lugares que percorren os peregrinos no Camiño de Santiago. No trascurso da novela coñecemos moitos datos da época medieval como  as clases sociais: nobres, cregos, guerreiros, servos e artesáns, que dependían dun señor feudal, e logo os construtores, entre os que se encontra Telmo, que eran a única clase libre. Tamén coñecemos as ordes relixiosas que participaron nas Cruzadas: a Orde dos Templarios e a da Águila de San Juan. Esta última é a que encarga a construción da catedral de Kerloc´h, pero para honrar ao demo, pois Carcassone cre que nas cruzadas foi abandonado á súa sorte por Deus. Tamén lles chamou a atención a escasa presenza feminina na historia, só Valentina e a súa nai, o que reflicte a situación da muller na época.

En resumo, o libros resultou moi interesante pola intriga, fantasía e o que se nos conta da época medieval. Moi recomendable.

                                                                                                                                          Noelia Carollo, Rosalía Van  Raaij  e Malena Lorenzo