Skip to Content

Complementarias

I Concurso de esopías IES de Soutomaior

Dom, 27/03/2022 - 13:35 — admin

 

O pasado luns día 21 de marzo fíxose entrega dos premios ao alumnado gañador do I Concurso de esopías do IES de Soutomaior. O xurado, formado por Manuel José Fariña (Departamento de Lingua Galega), Orlando Molares (Departamento de Lingua Castelá) e Sandra Santos (Departamento de Matemáticas), resolveron premiar a:

- Ethan Rodríguez Novás, de 2ºESO A (galego)

- Iman Ahmed Elgaid Saleh, de 2ºESO C (castelán)

- Hanae El Gad El Arfaoui, de 2ºESO C (castelán)

- Safae El Gad El Arfaoui, de 2ºESO C (castelán)

- Anxo Muíños Seoane, de 3ºESO A (galego)

- Xiana Vidal Rubianes, de 3ºESO A (galego)

Noraboa ao alumnado premiado e participante nesta 1ª edición!

Revitalizámonos un curso máis

Xov, 24/03/2022 - 23:00 — admin

Galería de imaxes

Esta pasado martes 23 de marzo pechouse un novo ciclo de obradoiros e charlas de formación con Antón e Nuria, de Teixugo Scoop, que deron a coñecer as aplicacións do compost entre o alumnado de Ciencias da Terra de 2º BACH e o alumnado de Ciencias Aplicadas ás Actividades Profesionais de 4º ESO. 

Esta actividade desenvólvese no marco do Programa Revitaliza que ofrece a Deputación de Pontevedra aos centros escolares para concienciar a comunidade educativa da problemática dos residuos, acadar un cambio de actitudes e responsabilidade na separación dos residuos orgánicos domésticos, procurar o compromiso persoal ante a súa redución e co uso dos composteiros comunitarios e individuais e informar sobre a importancia da compostaxe como alternativa necesaria, ao ser máis económica e ecolóxica que os tratamentos actuais.

Estes obxectivos acompáñanse, ademais, das actuacións do alumnado nos terreos do centro e na súa contorna, pois da man do Departamento de Bioloxía e Xeoloxía contamos cun composteiro comunitario, de horta, de xardín e de diversas plantacións de árbores dentro e fóra do recinto.

Revitaliza tamén chegou neste 2º trimestre ao alumnado de 1º de Bach. (22 de febreiro) e 1º ESO (17 de marzo) cos obradoiros "Quen vive aí (identificación de invertebrados)" e de 4º ESO (18 de marzo) coa actividade "Intrusos no composteiro (microplásticos)" no que é xa un dos programas formativos máis veteranos do noso instituto. 

O equipo de debate estará na final do Parlamento Xove

Mér, 16/03/2022 - 09:51 — admin

Máis imaxes neste álbum fotográfico

Non era a primeira vez que o IES de Soutomaior participaba no Parlamento Xove pero si que foi a estrea nun torneo de debate para Marta, Sonia, Victoria e Brais, que acadaron o 4º posto tras gañar os tres debates da Fase Clasificatoria da categoría de Bacharelato.

Nesta XIII edición do concurso organizado pola Dirección Xeral de Xuventude, Participación e Voluntariado participaron 24 equipos e 96 alumnos e alumnas de 19 centros educativos de toda Galicia. Durante a xornada do sábado, o alumnado tivo que poñer en práctica a súa capacidade dialéctica e as súas habilidades comunicativas sobre un tema que viñeron investigando de forma intensa durante as semanas previas: Debería existir unha regulación para ser youtuber ou influencer que garanta que desempeñen as súas funcións correctamente? Nesta tarefa de documentación contaron coa colaboración da súa compañeira Rebeca e ocupou moitas horas das tardes e as fins de semana para completar as sesións da materia Obradoiro de Habilidades Comunicativas.

Hai que destacar tamén a grande progresión que o equipo demostrou ao longo da xornada de debates, na que aplicaron as ensinanzas dadas polos xurados e o exemplo do resto dos equipos, cos que compartiron unha fin de semana de convivencia e aprendizaxe.

Debemos agradecer tamén a formación previa impartida por Diego Gómez e a axuda prestada polo  persoal da Dirección Xeral, que fixo que a organización do torneo no Centro Residencial Docente de Culleredo fose perfecta. A fase final celebrarase en maio no Parlamento de Galicia e nela participarán 8 equipos dos IES Ramón Puga, Sánchez Cantón, Nosa Señora dos Ollos Grandes e os colexios La Salle, Peñaredonda e Mariano. 

Ciclo de charlas do Proxecto Relevo 2. Mocidade Abordo

Dom, 06/03/2022 - 11:05 — admin

O venres 4 de marzo o alumnado de 4º ESO asistiu á derradeira charla do programa RELEVO2. A mocidade Abordo, promovido polo GALP (Grupo de Acción Local do sector pesqueiro) de Vigo co obxectivo de valorizar todos os tramos do proceso da pesca, marisqueo e acuicultura, e promover unha nova cultura medioambiental para posibilitar que os mozos e mozas poidan diversificar en función da súa creatividade, formación académica e espíritu emprendedor e poidan xerar novas e modernas actividades económicas.

Foron 6 sesións ao longo do primeiro (a primeira en decembro) e o segundo trimestre nas que, de xeito transversal, sempre estiveron presentes a sostibilidade e os modelos de crecemento sostible, e as políticas de igualdade de xénero.

Estas actividades foron organizadas polos Departamentos de Bioloxía e Xeoloxía e Economía. 

Resultado do Sorteo de Entroido

Ven, 04/03/2022 - 15:04 — admin


Esta mañá celebrouse o Sorteo de Entroido organizado polo alumnado de 4º ESO para financiar a viaxe de fin de curso que os levará a comezos de abril a Barcelona, Tarragona, Burgos e Zaragoza.

No sorteo participaron as alumnas Paula Vila e Carmen Lombar e actuou como testemuña o director do centro, Modesto. A mariscada para 2 persoas valorada en 130€ a disfrutar na Marisquería Arcade (https://www.marisqueriaarcade.com/) ou no Restaurante A Casa do Muelle (https://www.acasadomuelle.es/) foi para o número:

  • 0293, comprado por Roberto Villadangos San Martín.

Ademais de felicitar a este veciño de Arcade polo premio, dende o IES de Soutomaior queremos agradecervos a todos e a todas a vosa colaboración na compra de rifas e noutras actividades que están a servir para financiar unha parte importante da excursión de moitos rapaces e rapazas. 

Tamén queremos darlles as grazas aos propietarios dos restaurantes pola axuda que lle brindan ao alumnado.

SoutomaiorFest e moito máis no Entroido 2022

Sáb, 26/02/2022 - 19:42 — admin

O entroido regresou ao instituto de forma presencial e os disfraces, a imaxinación, as cores e os risos voltaron ás aulas e aos corredores. Pero tamén se mantivo o formato en diferido que ensaiamos o ano pasado por mor da pandemia. 

Así, durante as últimas semanas os diferentes grupos da ESO estiveron preparando as súas actuacións e coreografías nas clases de Educación Física e nas Titorías. E onte foi o momento de ver o resultado, así que durante o recreo e a 4ª hora pasáronse e votáronse todos os vídeos nas diferentes clases, incluídos un par de vídeos sorpresa protagonizados polo profesorado. Podedes ver todas as actuacións na canle da Biblioteca en Youtube.

Logo, a 5ª hora, uniuse á festa o alumnado de Bacharelato e todos e todas xuntos marchamos ao Campo de Fútbol do Salgueirón, onde tivo lugar o Concurso de Disfraces nas categorías Individual, Parella e Grupo: ver álbum de fotografías.

O importante era participar e reencontrarse máis alá das aulas, mais é de xustiza recoñecer os grupos e alumnos/as que foron recoñecidos polo seu enxeño e humor. Dende aquí agradecemos a implicación de todas as persoas que colaboraron na xornada, especialmente aos titores/as e aos seus grupos, ao xurado (Orlando, Iria e Uxía Vidal), ao speaker (Manuel Fariña) e aos fotógrafos (Manuel Veiga e Paula). 
 
Concurso de actuacións por clases
  1. 4º ESO A
  2. 4º ESO B
  3. 1º ESO C 
Concurso de Disfraces:
  1. Individual: señora con pamela; Barbie; e Militar.
  2. Parellas: noivos; rocieros; e Rei León.
  3. Grupos: ximnastas; Steam Punk; e Desiguais.

Visita á Escola de Enxeñería de Minas e Enerxía

Sáb, 26/02/2022 - 19:42 — admin

Este pasado xoves 24 de febreiro o alumnado de Tecnoloxía Industrial de Bacharelato e de Física de 2º Bach. visitou, acompañado polos profesores Saínza e Gabriel, a Escola de Enxeñería de Minas e Enerxía (EME) do Campus de Vigo a través do programa Aula Aberta á TecnoCiencia.

Máis imaxes da visita neste álbum fotográfico

Con este proxecto, a EME dá a coñecer aos estudantes preuniversitarios os seus ensinos oficiais de grao e de máster por medio de charlas e obradoiros prácticos que conecta o alumnado coas materias e cos contidos científicos e técnicos que se imparten neste centro universitario: Grao en Enxeñería dos Recursos Mineiros e Enerxéticos e o Grao en Enxeñería da Enerxía.

Así, os rapaces e rapazas do noso centro coñeceron, mediante actividades manipulativas, módulos como os de "Xeotecnoloxías: topografía con Realidade aumentada" e "Física Re-Creativa", o que lles permitiu coñecer os fundamentos dos procesos científicos e tecnolóxicos empregados polos enxeñeiros que se forman na Escola e, ao mesmo tempo, a utilidade e o atractivo da carreira profesional dedicada ao mundo da transferencia tecnolóxica no ámbito das ciencias aplicadas da Terra, materiais e enerxía.

Remata o ciclo de charlas temáticas e divulgativas das universidades

Sáb, 26/02/2022 - 19:32 — admin

Galería de imaxes

Ao longo dos meses de xaneiro e febreiro o noso centro acolleu 7 charlas temáticas impartidas por profesorado das Universidades de Vigo (Programa científico-divulgativo) e Santiago de Compostela (Programa A Ponte).

Este ciclo, organizado polo Departamento de Orientación e diversos seminarios didácticos do instituto para o alumnado de 4º ESO e Bacharelato, tivo como finalidade achegar o alumnado aos estudos universitarios, ás investigacións que desenvolven nos seus centros e ás saídas profesionais futuras. Ademais, estas xornadas procuraron informar e orientar o noso alumnado como futuro estudante universitario para que poida elixir os estudos que máis se adapten ás súas preferencias.

Estas conferencias abordaron diferentes temas de interese social, moi conectados coa actualidade e de relevancia para o futuro profesional do alumnado:

  • Que se fai na Informática Industrial?, por Manuel Pérez Cota (17-01-2022).
  • Éntrache nunha lingua... e sáeche pola outra!, por Lara Domínguez Araújo (20-01-2022).
  • "A gandería na encrucillada: produción de alimentos, benestar animal e cambio climático", por Ramiro Rodríguez Rodríguez (21-01-2022).
  • "A situación enerxética galega: un debate necesario para ter futuro", por Adrián Diós Vicente (24-21-2022).
  • "Recent change in English", por Belén Méndez Naya (28-01-2022). 
  • "NanoCIENCIA e Nanotecnoloxia", por Juan Pablo Hervés (04-02-2022).
  • "Sabemos o impacto ambiental do que comemos?", por María Jesús Sáinz Osés (21-01-2022). 

Coas raíces abrazamos a Terra e as follas voarán libres

Mér, 23/02/2022 - 22:40 — admin

Eu son libre. Nada pode conter a marcha dos meus pensamentos, e eles son a lei que rexe o meu destino.

Estas palabras da poeta guiaron os dous actos que tiveron lugar hoxe no noso instituto para celebrar o Día de Rosalía. Por unha banda, durante o recreo, Diego, Brais, Rosalía e Elba recitaron o poema "Caldo de gloria" ante os seus compañeiros e compañeiras de 2º ESO para, a continuación, probar un caldiño preparado e repartido polo Equipo de Normalización Lingüística e a Cafetería do centro e o Restaurante A Serra Asador. Aínda houbo tempo para escoitar versións musicais de poemas de Rosalía e mesmo para recuncar no caldo, que certamente soubo a gloria. Agradecemos tamén a colaboración do Departamentos de Plástica, Educación Física e Lingua Galega no desenvolvemento da actividade.

Ademais de acollérmonos a esta iniciativa da Casa-Fundación Rosalía, o Equipo de Normalización tamén respondeu ao chamado da AELG para "sementar pensamentos". Da man de Montse, a profesora de Bioloxía, e da directiva da Comunidade de Montes da Devesa, alumnos e alumnas de todos os cursos plantaron os primeiros 18 castiñeiros do Souto de Rosalía no cercano Monte de Ouro, que queda por riba do centro. Alí, o secretario dos comuneiros, Alejandro, explicounos como plantar as árbores, de que tipo de castiñeiro eran, que coidados requiren, a castaña que botan... e informounos das repoboacións que están a facer na nosa contorna, un gran labor que redunda na riqueza e no ben de común de toda a veciñanza.

Finalmente, representantes de cada aula penduraron cadanseu "pensamento" nos castiñeiros plantados. Desexos, reflexións, berros... que en forma de verso elaboraron nas clases de lingua galega baixo a inspiración de Rosalía, cuxos "versos se transforman nunha historia que rebela, provoca, emociona e que nos acolle para facermos parte dunha nosa Historia propia e libre".

Máis imaxes nos álbums Caldo de Gloria e O Souto de Rosalía.

Visita a ANFACO do alumnado de Tecnoloxía

Mér, 23/02/2022 - 13:22 — admin

Máis imaxes nesta galería fotográfica

O pasado xoves 17 de febreiro o alumnado de Tecnoloxía de 4º ESI achegouse ao Campus das Lagoas-Marcosende da Universidade Vigo para visitar as instalacións e o Museo de ANFACO, a Asociación Nacional de Fabricantes de Conservas, no marco do Programa EduTecEmprende, que contempla visitas a empresas e centros tecnolóxicos galegos.

No Museo faláronnos do papel que xoga ANFACO na conservación do patrimonio industrial, que non está tan protexido dende as institucións coma outros tipos de patrimonios como o arquitectónico. Tamén explicaron a función que cumpren as asociacións para defender os intereses dun sector industrial, neste caso o conserveiro. Puidemos ver distinas máquinas usadas ao longo da historia nas fábricas conserveiras e explicaron a orixe das conservas, que se remontan á época de Napoleón.

No centro tecnolóxico visitamos varios laboratorios de análise de propiedades organolépticas e de control do correcto pechado das latas de conserva. Tamén puidemos ver a planta piloto de acuicultura na que se investigan novos produtos antes de sacalos ao mercado.

Distribuir contido


by Dr. Radut