Complementarias

Álbum de imaxes da Feira

Do 11 de febreiro ao 5 de maio o noso centro tivo a oportunidade de formar parte do proxecto Divulgaciencia, promovido pola OMIX e a Concellaría de Educación de Soutomaior e apoiado pola FECYT e o Ministerio de Ciencia e Innovación. Este programa educativo procura espertar a curiosidade pola ciencia e difundir contidos científico-tecnolóxicos usando unha metodoloxía dinámica, experimental e lúdica que motive a participación e interacción do alumnado e da poboación en xeral.

Ademais das actividades abertas a toda a veciñanza, os tres centros educativos do municipio acollemos unha serie de actividades formativas previas para o alumnado de diferentes cursos e para o profesorado:

• Xornada de formación para o profesorado con David Ballesteros (16-02-2022).
• Presentación do programa e mesa-coloquio “Vocacións científicas e novas profesións” (11-02-2022). 4º ESO e 1º BACH. C de BioXeo.
• Obradoiro “Investigando a natureza” para 1º ESO (06-04-2022).
• Obradoiro “Droneando” para 3º ESO (06 e 07-04-2022).
• Roteiros medioambientais “Soutomaior mira ao mar” para 4º ESO (19-04-2022).
• Roteiros medioambientais “Mergúllate no monte” para 1º ESO (19 e 21-04-2022).
• Roteiros medioambientais “Aventura ecolóxica” para 2º ESO (21 e 27-04-2022).

Durante todo ese tempo fóronse desenvolvendo diferentes proxectos no centro, coordinados por Lucía López, Menchu, Gabriel e Manuel Cuervo, e que foron presentados polos rapaces e as rapazas ante o alumnado do noso e doutros centros e ante as familias e as centos de persoas que ateigaron durante toda a xornada a carpa que acolleu a I Feira da Ciencia. O evento, que se desenvolveu o 5 de maio na Alameda Talo Río, mostrouse a aplicación práctica dos proxectos levados a cabo no centro e supuxo unha oportunidade extraordinaria como experiencia para o profesorado e un alumnado entusiasmado polo que tivo de motivador, de xornada de convivencia e de apoderamento do alumnado, que demostrou as súas habilidades comunicativas, como se pode ver na crónica fotográfica e mais na cobertura que fixo TV Soutomaior. Proxectos do centro:
- Invernadoiro con tensegridade.
- O lavado das mans protéxenos dos fungos que nos rodean?  Premio Revelación Secundaria.
- Foguete de bicarbonato. Premio Divulga ESO.
- Regulador de luz baseado en Arduino (Premio Innova).
- Proxector de hologramas. Premio Comunica.
- Vehículo con rodas “mecanum”. Premio Revelación Secundaria.
- Plastórganos.
- As augas do noso pobo: a auga é vida e a auga limpa é saúde. Premio Rigor Científico.
- Estudo da investigación sobre a situación da muller no mercado laboral no contorno do IES de Soutomaior. Premio Divulga BACH.

Así pois, cómpre felicitar á OMIX, Concellaría de EDucación e a Ceo Aberto por nos permitiren gozar desta experiencia e mais polo formato e a organización profesional do encontro, que vai ter unha moi agardada segunda edición no ano 2023. E, por suposto, hai que lle dar a noraboa ao profesorado e o alumnado participante polo traballo e os resultados acadados.

Máis imaxes das fases clasificatoria e final aquí

Marta, Sonia, Victoria, Brais e Rebeca participaron esta fin de semana na Fase Final do torneo de debate Parlamento Xove.

Nos cuartos de final tocoulles defender a postura a favor ante a pregunta "Debe a Unión Europea actuar militarmente en terceiros países na defensa dos dereitos humanos?" e, aínda que o debate foi gañado polo Colexio Peñarredonda, fixeron un bo papel, na liña das eliminatorias previas de marzo, cando se clasificaron en 4º lugar tras gañar os tres debates. 

Hoxe acudiron ao Parlamento de Galicia para presenciar as semifinais e finais das tres categorías (ESO, BACH e Universidade) e seguir aprendendo e compartindo esta experiencia con rapaces e rapazas de toda Galicia. 

Moitos parabéns! Estamos orgullosos/as do gran traballo que realizastes e do ben que representastes o noso centro. E tamén do compañeirismo e o apoio que destes ao equipo do Colexio Santiago Apóstol, que quedou 2º na categoría da ESO e gañou o Premio ao Mellor Artigo de Investigación. Noraboa a Iliana, Gabriel, María, Emilio e á súa profesora María Leal. Estivestes enormes!

Agradecemos tamén o apoio aos equipos de Soutomaior do deputado Manuel Lourenzo, que seguiu os debates no hemiciclo e participou na entrega de premios.

Unha selección de alumnado de 3º e 4º da ESO e 1º de Bacharelato tivo ocasión de participar no taller de teatro impartido no IES por Saida Rkiek Sghiar. Saida, veciña de Soutomaior, cursou estudos de Arte Dramática na Escola Superior de Arte Dramática de Vigo, e é directora de escena, actriz e autora de varios libros relacionados coa Arte Dramática.

A primeira xornada serviu de introdución teórica ao concepto de performance e rematou con prácticas e introdución a ferramentas básicas para preparar unha performance.

A segunda xornada foi adicada plenamente á interpretación, cunha actuación centrada no uso dos teléfonos móbiles, que pretende reflectir o "secuestro emocional" que estes ocasionan moitas veces, especialmente cando abusamos deles.

Na imaxe, o alumnado na súa representación "abducidos polos teléfonos móbiles".

Máis imaxes neste álbum

O pasado venres sumámonos a unha nova edición da campaña "Unha árbore por Europa" con motivo do Día Internacional do Medio Ambiente, que se celebra cada 5 de xuño dende 1972 co obxectivo de sensibilizar a sociedade na necesidade dun desenvolvemento sostible para o planeta. 

A nivel local, Soutomaior comprometeuse con outros municipios para, a través da plantación simbólica de árbores e plantas, visibilizar a importancia do desenvolvemento sostible no ámbito local e involucrar os mozos e as mozas nos procesos de toma de decisións en materia de sustentabilidade.

Neste acto, no que participou o alumnado de 2º ESO B, non só se plantou unha árbore senón varias: unha limeira, un framboeseiro e un aguacate. E, ademais, sementes de diversos tipos de flores. 

Haille que agradecer ao Concello, que estivo presente na figura do alcalde Agustín Reguera, a dotación destas novas árbores e plantas que van humanizando aos poucos, xunto con outras plantacións anteriores, a contorna do edificio. E, como non, dámoslle as grazas a José, o mestre composteiro, por dirixir os traballos; á OMIX e ao Departamento de Bioloxía por organizalo; e, por suposto, os rapaces e as rapazas que se involucraron na actividade.

Máis imaxes da xornada neste álbum fotográfico. 

   Alumnado de 1º e 2º de ESO acudiu á Alameda Castelao de Redondela para participar este vernes 20 de maio, no II Torneo de Xadrez Intercentros.

   Un total de 80 participantes de distintos centros da zona: os IES Mendiño, Floriani e Chapela; e os CEIP Santa Mariña, Cesantes, Quintela e Igrexa Chapela.

   Hai que destacar o carácter eminemente lúdico e educativo do torneo, que pretendía servir de iniciación e animar á práctica do xadrez, á marxe do resultado. Esto foi así, especialmente no caso do noso IES, no que acudimos cunha equipa pouco experimentada, que xogaban o seu primeiro torneo, coa premisa de pasalo ben e seguir aprendendo. A equipa formouse con alumnado que acudiu durante o curso a xogar os mércores á biblioteca. Ademais dos que puderon asistir nesta ocasión, hai outros alumnos/as que xogan ou queren aprender a xogar ao xadrez, polo que esperamos que este xerme vaia a máis.

   Ao rematar a actividade, entregáronse trofeos aos 3 primeiros alumnos/as clasificados e medallas a todos os participantes, e o Maestro FIDE  Xulio del Prado (de tan só 15 anos) deu unha pequena charla.

   Temos que destacar e agradecer a boa organización do torneo, a cargo da Concellería de Deportes de Redondela e o IES Pedro Floriani.