Estimados nais, pais ou titores do alumnado: Ante a convocatoria de folga para o vindeiro día 21 con respecto ao documento “Bases para a elaboración do decreto do plurilingüismo no ensino non universitario de Galicia”, este equipo directivo desexa aclaralles o seguinte:

· A folga está convocada por sindicatos do profesorado, por organizacións de estudantes e outros colectivos cidadáns. · A convocatoria de folga está dirixida á totalidade da comunidade educativa, alumnado, pais, nais, profesorado e persoal de administración e servizos. · A decisión de participar ou non na folga corresponde a cada membro da comunidade educativa. O equipo directivo agradece a comunicación de participación na mesma a efectos organizativos. · Hoxe foi publicada a Orde (DOG nº11 de 19 de xaneiro, pp 637-638, consultable neste enlace) cos servizos mínimos, que consistirán nun membro do equipo directivo e o persoal de cada servizo.

Agradecendo de antemán a súa colaboración, reciban un saúdo.

O equipo directivo

Cinco alumnos de 1ºB de Bacharelato obtiveron un accésit no concurso "Proxecto Darwin. A evolución e o cinema", promovido polo Departamento de Xenética da Universidade de Santiago de Compostela.

O equipo formado por: 

presentou o seu traballo "De Neandertal e Sapiens", baseada no film de 1981 de Jean Jacques Annaud "Na procura do lume", ao concurso PROXECTO DARWIN. A EVOLUCIÓN E O CINEMA, convocado pola Consellería de Educación e Ordenación Universitaria e fallado o pasado venres en Santiago de Compostela. A convocatoria, que contou cunha elevada participación, propuxo o achegamento do alumnado dese nivel á pegada que o traballo de Darwin tivo na nosa vida cotián.

O grupo galardonado foi un dos que se presentaron polo IES Sofía Casanova. O centro quere felicitar a todos os participantes nesta actividade educativa, convencidos de que experiencias como esta son enriquecedoras para os participantes e un estímulo para toda a comunidade educativa. Noraboa aos grupos e ao seu profesorado! 

Pódese acceder aos traballos premiados no seguinte enlace: http://www.darwineocinema.org/

 Polo seu interese destácanse as xornadas destinadas ao uso seguro e responsable de internet polos menores.

En Ferrol celébranse o martes 17 de novembro no Centro Cultural Torrente Ballester, rúa Concepción Arenal s/n. Haberá dúas quendas na mesma tarde, unha ás 16 horas e outra ás 18.30 horas. A asistencia é libre e dirixida fundamentalmente a pais, mestres e incluso aos propios alumnos de secundaria, bacharelato e ciclos, e/ou persoas en xeral interesadas na materia. Estas xornadas teñen a finalidade de concienciar ao colectivo sobre os usos e riscos das TIC e facilitar os medios necesarios para aprender os métodos de control do uso da Internet, sen que se impida o acceso á sociedade da información. Fundamentalmente tratarase o control de contidos de Internet, o manexo das ferramentas existentes e o control parental.