IES O MOSTEIRÓN

O venres 4 de maio o alumnado de terceiro e cuarto da ESO e parte do profesorado  do instituto disfrutou dun mestre moi especial: Martín Varela Dourado.  Martín ofreceunos una clase maxistral do que é a súa especialidade, o tenis en cadeira de rodas, e unha valiosa lección de como afrontar a vida. A verdade é que a emoción estaba en todas as caras (e nalgúns ollos) pois, ademais de explicarnos as características do deporte cun montón de anécdotas, algunhas divertidas e outras dramáticas, Martín falounos do seu accidente, do seu desexo de saír adiante, da súa forza de vontade... Instounos a vivir a vida con entusiasmo e buscando a felicidade nas cousas máis sinxelas. Pediunos prudencia, sentido común e, sobre todo, respecto. Rexeitou a condescendencia e a compaixón  mal entendida (tamen a autocompaixón). Dixo que as únicas barreiras que importan son as mentais, as que nós mesmos poñemos. Contounos o seu proxecto de crear unha escola de tenis para nenos con discapacidade. Criticou (pouco, moi pouco) a falta de axudas e a mesquindade da Administración... e moitas, moitas máis cousas, pero, sobre todo, fíxonos reflexionar. A actividade, que estaba prevista para unha hora, ao final durou dúas... o certo é que cando nunha actividade toca o timbre do recreo e ningún alumno se move é que verdadeiramente paga a pena o que se escoita! Grazas, Martín, pola túa lección de vida, de deportividade, de optimismo, de sentido do humor, de vitalidade, de forza, de xenerosidade e de amizade. Algúns non esqueceremos facilmente a túa visita.

Máis información no blog da Esperela: pincha aquí

A organización do Correlingua 2012 entregou o día 16 de abril os premios dos concursos escolares deste ano,convocados todos baixo o lema Galego, todo o que buscas. Como xa sabedes, o noso instituto levou o premio ao mellor vídeo que xa circula por moitos blogs do país. Estamos moi orgullosos de todos os que o fixeron posible e tamén moi agradecidos cos que decidiron premialo e cos que o difunden.

As felicitacións, por suposto, tamén se estenden aos outros centros premiados neste certame e que son os seguintes:

O CPI Pontecesures(4º ESO) levou o premio ao  mellor Manifesto que di ...

                    
Pola súa banda, o premio á mellor banda deseñada foi ex-aequo para o CEE O Pino de Ourense e o CEIP A Laxe de Marín. Podedes ver aquí os traballos: 
http://www.correlingua.org/bandadesenada.aspx?ApartId=4

Reproducimos o correo electrónico que nos achegaron da organización do correlingua 2012:

Prezadas amigas e amigos do grupo Édelingua e da EDLG do IES O Mosteirón:
Teño o pracer de vos comunicar en nome do xurado do concurso de vídeos do Correlingua 2012 que resultastes gañadores do concurso.
O xurado valorou o traballo realizado no vídeo titulado Galego, todo o que buscas e especialmente a súa emotividade e contido orixinal polo que resolveu premiar ao grupo Édelingua do IES O Mosteirón.
O acto de entrega de premios terá lugar o día 16 de abril ás 11.30 no salón de actos do IES Rosalía de Castro de Santiago de Compostela. Neste acto participarán , ademais de unha representación das entidades organizadoras do Correlingua (A Mesa pola Normalización Lingüísitica, Confederación Intersindical Galega- Ensino e Asociación Socio-Pedagóxica Galega), os concellos de Pontevedra, Vigo e Lugo, e a Deputación de Lugo.
Neste acto gostariamos de contar coa vosa asistencia como gañadores do concurso de vídeo.
Ademais informámosvos de que o premio consistirá nunha visita á Eira da Xoana, unha finca situada no concello de Agolada e xestionada pola Asociación para a Defensa Ecolóxica de Galiza o sábado día 19 de maio, onde se realizarán diferentes actividades de coñecemento da natureza da zona e arredor do Día das Letras Galegas.

Dende o IES O Mosteirón felicitamos a todos os que dunha ou doutra maneira participaron na produción deste vídeo. "GALEGO, TODO O QUE BUSCAS".

Mirade as fotos da visita:

O pasado 14 de marzo, os alumnos de primeiro de ESO foron visitar á Fundación Barrié. Ademáis de ver as obras de arte moderna que expoñen, fixeron o obradoiro de "La pintura se expande".

Aquí tedes un vídeo demostrativo do que fixeron:

O pasado venres, A Esperela entregou os premios do concurso de fotografía con libros Fotolibro. Debido ao éxito de participación e á calidade dos traballos presentados, vímonos obrigados a entregar catro primeiros premios e varios accésits e mencións.

Podedes ver todas as fotos que participaron 

Máis información en: http://biblioaesperela.blogspot.com.es/

O pasado mércores , 7 de marzo, o alumnado de 3º de ESO e 1º Bacharelato fixo este roteiro ,un itinerario que segue parte da vida de Rosalía de Castro, aínda que de xeito desordenado, dende o seu nacemento en Santiago de Compostela, o 24 de febreiro de 1837, ata o 15 de xullo de 1885 en que se produce a súa morte en Padrón. Unha sinxela ruta que percorre os camiños que ela percorreu, que fai meditar nos recantos nos que meditou. Un camiño que nos permite identificarnos intimamente con Rosalía e con Galicia, aínda que nos limitemos á cidade de Santiago de Compostela e á vila de Padrón.

Para ver o contido completo e as fotos ir a http://www.edelingua.blogspot.com/2012/03/roteiro-rosaliano.html

As nais e avoas gañan a contenda...